{抓住暑假的尾巴} - 2014 虎門美思威爾頓美食之旅團 (超多圖)

八月份工作真的很忙, 很想從繁忙工作中休息一下, 無奈假期又要保留俾之後的長旅行, 只可選擇周末小旅行。這次我第一次參加美食之旅的旅行團, 亦是我十幾年第一次跟團, 平衡過各項因素，包括車程、酒店、天氣、性價比，我選了美食之旅兩天團當中最貴的一團 - 虎門美思威爾頓酒店 (周末價 : $799/人) ，算是給自已小奢華的獎勵吧~

集合時間是上午10時於深圳灣口岸，我同肥肥怕遲到特意提前十五分鐘到達，怎料接團導遊竟然遲到25分鐘!!?? 有無搞錯!! 原來深圳灣是最後的接團關口，在羅湖和皇崗好像塞車了，唉!!

這天天氣好熱啊....過關的人又多, 等了40分鐘真不易過

幸好上了車後車上空調強勁, 又有免費派水, 車廂都幾新淨, 算是不錯. 車程大約40分鐘, 到了第一個"景點" - 長安公園...呢個公園真係仲頹過大埔海濱公園, 仲要係三十幾度烈日當空, 真係除左去廁所之外都唔知做咩好, 好難得先搵倒個樹蔭下的長椅坐下傾陣計, 半小時就立即跳上車涼冷氣.....

長安公園要爬二百幾級樓梯先去到塔底, 而個塔又維修中, 全團都無人行上去.

之後就去食午餐, 我同肥肥被編做 " 5 號家庭" , 被安排同另外4對二人家庭一張枱食飯. 同行都有6-7對兩公婆同團. 同D陌生人同枱食飯未免有點尷尬, 大家都好客氣咁. 食物方面是普普通通的小菜, 但都有燒鵝同白切雞, 雖然大家都把食物吃光 , 但份量都足夠啱啱好.

團餐味道是港式風味

食飽飯又跳番上車, 大約30分鐘後又到左另一個景點 - 海月岩. 又是行公園的免門票景點, 不過呢個公園好D, 有個湖, 湖邊樹蔭下又有長椅, 食飽散下步吹下涼風都幾舒服, 難怪D當地人都在長椅上午睡......

唔知咩廟, 聽導遊講求姻緣幾靈, 見倒咁多級樓梯都無咩意欲行上去

湖邊吹吹風, 感覺有D似Fremont的Lake Elizabeth

在這景點又Hea了半小時, 上車就出發到酒店. 大約3點半到達酒店. 酒店位於虎門的旺點, 行街街食宵夜都很方便. 酒店是全虎門最高的建築物, 樓高62層, 是虎門具標誌性的建築.

入到去間酒店, 就好似同出面既老百姓兩個世界咁

check in 大堂在10樓, 我地成團人就坐在大堂酒吧等候分配房間

似乎有提供High tea

我地分配到31樓的房間, 早在報名時已要求要大床房, 果然順利安排到. 房間很大, 大過我屋企.酒店的設計很modern, 亦是5星級的級數, 有d似朗豪酒店.

舒適的King Size大床

另一邊有沙發徧廳

有衣帽間、淋浴間和浴缸，雖然浴缸唔係對住個窗, 但中間有玻璃可望倒床，而且仲部小電視在浴缸前, 可以一邊浸浴一邊睇電視。

之後我地就去左酒店的泳池游水，得10個人左右游水, 唔多人，好自在!

大陸星級酒店的泳池要求男士要穿緊身泳褲同帶泳帽，肥肥為左搵呢兩樣野都幾頭痕. 泳池是玻璃天幕的，不用擔心天氣，呢個亦係我揀呢間酒店既原因之一。

更衣室十分乾淨，似高級會所，有埋桑拿房，男仔果邊仲有Jacuzzi.

游完水肚仔餓了，便去61樓食自助晚餐。導遊特意為我地安排左窗邊的二人位撐枱腳 (之前又話有機會要同其他團友拼枱)，居高臨下，日落時分，個view好正.

自助餐的選擇和質素都唔差，似香港大約400蚊左右的水平. 有生蠔、三文魚，都幾新鮮. 但其他凍海鮮就普普通通.

燒蠔啊~很具大陸特色，多蒜蓉，I like it ~

鐵板燒 - 有燒小黃魚，又有燒羊扒同牛柳，好味道

仲有啤酒任飲，肥肥最開心

生蠔同Haggen-Dazs , 我地都食得好滿意同開心

食飽飽，回到房間休息一會，本想去9樓沐足，點知居然full booking，唯有去大堂吧飲杯免費贈飲的飲料. 怎知我眼花看錯，竟然只是"軟飲料" (soft drinks), 一心諗住去飲cocktail的我未免安點失望....於是同肥肥落左街四周逛逛，出面的世界同酒店內真係好似皇宮同民間的分別咁，又買了點夜宵，回房浸浴後再吃.

雖然這一晚訓得好舒服，但係我地8點鐘就起左身，想在食早餐前再游一次水 ! 游完水後沖身換好衫準備離開更衣室時，點知俾我見倒一個中年女人在更衣室的淋浴間小便，仲要無關門!!! OMG !!!! 個馬桶就係間離又乾淨又無人用，點解唔o係馬桶小便 !!!???? 

早餐同樣在61樓的餐廳, 我地選了在另一邊看別的風景。今天天氣很好，可以看到很遠的地方，很relax.

早餐的選擇都很多, 又有即煎奄列同waffle.

天氣很好，可以看得很遠.

臨走前再浸多一次浴，好舒服. 11點半check out , 大約1小時車程便回到深圳午餐....點知去到深圳時個旅遊巴司機居然唔識路 !!?? 搞左半個鐘先到達午餐地點，是吃粥底火鍋的"母米粥".

起初我還擔心要同陌生團友一齊吃火鍋都幾尷尬, 但原來這間餐廳的粥底火鍋係唔使自已灼，有服務員代勞，就好似去飲咁有待應分好菜.....原來吃粥底火鍋下配料的次序都幾講究架，要先下海鮮類(魚片、蜆仔)，食完再下肉類 (雞、肉丸)，最後再加菜絲，成為了一份鮮味的雞肉丸粥~

行程來到這裡基本上已到達尾聲，下一個景點是深圳博物館，我同肥肥都無咩興趣，剛好博物館位置在福田口岸附近，我同肥肥便先離團了 (其餘有2/3的團友食完午餐就閃左人). 我同肥肥都幾滿意呢個團，尤其適合一家人去參加。大約5點左右回到家中，時間都幾鬆動的 ^^

{二人簡餐} - 臘腸排骨盅頭飯 (附食譜)

在敗家谷內見倒很多谷友大曬自己用LC湯盅, 但我始終覺得過百元一個湯盅太貴了. 幸好在缸瓦佬找到這個類似LC湯盅的, 只售$35, 無慮即決! 立即用這湯盅做了自製盅頭飯! 同肥肥一人一個盅頭飯, 加一份菜芯, 簡簡單單二人晚餐半小時完成，yummy~

 臘腸排骨盅頭飯

材料:

排骨(二人份量) : 約200克

排骨醃料 :

豆豉、豉油 1湯匙

蒜蓉 半湯匙

蠔油、雞粉、酒 1/2茶匙 

生粉、糖 1/4茶匙

胡椒少許

臘腸 2條

米 半嘜/盅

水 1嘜/盅

煲仔飯豉油

豉油1湯匙 糖1茶匙 味醂1湯匙 (拌勻放微波爐叮一會使糖溶解)

做法:

1. 用Staub 30cm先煲滾少許水, 大約到半個湯盅的高度. 同時用排骨醃料醃排骨15分鐘。臘腸一開三。

2. 湯盅內加入米和水，蓋上蓋。煲內水滾後轉細火，放一張廚房紙在水中，再放入兩個湯盅，小火蒸15分鐘。

3. 飯已基本成形，打開盅蓋，放入排骨和臘腸，再蓋上蓋再蒸15分鐘，完成。

4. 上桌前加入煲仔飯豉油即成。

******************************************************

今晚食完飯同肥肥一齊翻開結婚一周年的相薄，裡面有"愛是這樣甜"的歌詞，是蜜月時我地一齊聽的 :

期望每朝早 起身一吻紅的臉

共回味情夢最甜 新鮮早餐奉獻 (當天報紙放身邊)

期望每朝早 返工衣著同挑選

一切一切共分享 愛是這樣甜

但現實是 :

1. 肥肥試過一起身劈頭第一句對我說的話 : 我真係好 X 憎你 ! X你#%

2. 我基本上早上只會說兩句話 : "開飯俾B" "落去撻車"

3. 新鮮早餐......是公司樓下搞掂 ^^

Well.....同理想既婚後生活, 仲有一點距離.

{其實唔難} - 德國咸豬手配香腸

昨天從某煮食谷內看到谷友分享德國咸豬手的食譜, 心血來潮想立刻試做! 材料相當簡單, 大前提係要有一個強勁的焗爐, 我個cheap cheap焗爐開到220度時好似就離cher爆咁, 成個廚房冒曬煙 !! 好驚驚....唔通真係時候要換個焗爐??

做法 :  (參考自網上食譜)

材料 :

金妹嘜急凍咸豬手  1隻

啤酒 (麥啤更佳) 2罐

香葉 5片 白胡椒粒 10 粒 白醋 2湯匙

1. 先把豬手解凍。燒一鍋水(約可浸滿1隻豬手)，加入香葉、白胡椒粒、白醋和250ml啤酒、豬手，水滾後小火煮45分鐘。

2. 把豬手盛起，用廚房紙抺乾水份，用豬插在豬皮桔隆，然後風乾20分鐘。

土炮風乾法 (廚房太小很混亂.....羞≧◇≦ )

3. 之後把豬手浸在餘下的啤酒內約15分鐘。同時預熱焗爐。

4. 把豬手放在焗架上，放入焗爐，盡量令豬手上下有空間，架下再放焗盤盛著焗豬手時滴下的油方便清洗。以220度先焗15分鐘，取出向整隻豬手抺上啤酒，反轉再焗15分鐘即成。

是日晚餐的table setting

吃時可沾黃芥辣來吃，表皮是勁香脆的，而且吃起來亦有很香的啤酒麥香味。沒想到以$60的街坊食材可以做得出德國餐廳$200的風味 v(￣︶￣)y  肥肥說給這一餐100分呢 ! 大成功~!!

紅菇響螺瘦肉湯 (附食譜)

從雲南帶來了優質的紅菇, 香港較少見。紅菇含有人必需的多種氨基酸等成分。具有治療腰腿酸痛、手足麻木、筋骨不適、四肢抽搐和補血、滋陰、清涼解毒及治療貧血、水腫、營養不良和產婦出血過多等疾病，還具有增加機體免疫力和抗癌等作用，對女性是天然的補品。

紅菇到現在為止還是無法人工栽培，所以是純天然食品，但紅菇品種很多，只有正宗紅菇才有獨特的營養價值，其它品種的紅菇只是普通的菜菇。

左邊的才是正宗紅菇，菇傘概頂部中央是深紅色或者暗紫色，菇底呈藍色。

紅菇本身味道一般, 所以我用了美國響螺片令整個湯的味道提鮮。肥肥說這個湯非常鮮味，令人不停添飲!

紅菇響螺瘦肉湯

材料 : 

紅菇  70克

美國響螺片 150克

宣威火腿(去肥)   2片

瘦肉 半斤

做法 :

1. 響螺片洗淨浸軟，因為我用的響螺片較大隻，起碼要浸4小時。浸軟後把浸水隔去沙備用。

2. 紅菇洗淨浸軟，浸軟後剪去腳部泥的部份，把浸菇水隔去沙備用。豬肉出水。

3. 煲水6碗，水滾後放入所有材料、浸菇水和浸螺片水，小火煲2.5-3小時即可。

20分鐘簡單上桌 - 蜜糖刁草芥未汁伴三文魚(附食譜)

有時行Ikea的餐廳會吃到刁草三文魚, 其實自已做也很簡單. 三文魚中含有豐富的不飽和脂肪酸，能有效降低血脂和血膽固醇，防治心血管疾病, 我使用的是在街坊超市買到的挪威三文魚. 我做的方法是簡單用湯煮, 不用油, 吃的時候再配上蜜糖刁草芥未汁, 20分鐘即可上桌, 很適合放工做晚餐.

材料 :
三文魚 2件
雞湯100ml
水 200ml

蜜糖刁草芥未汁:
新鮮刁草(Dill) 1小扎
Cream Fresh (或yogurt) 2湯匙
檸檬汁 2湯匙
蜜糖 2湯匙
芥未 2茶匙

做法:
1. 把水、雞湯煮滖, 放入洗淨的三文魚, 小火煮8-10分鐘, 盛起放於碟中。
2. 把蜜糖刁草芥未汁所有材料拌勻, 淋於三文魚上即成。

20分鐘快速法式早餐 - oeufs en cocotte (Egg in pot) (附食譜)

想在周日享受一頓美味的法式早餐一點也不難, 只要買對了材料, 20分鐘便可做出經典法式菜式oeufs en cocotte (Egg in pot). 這菜式要用到法式酸奶油Crème fraîche (Cream Fresh), 是介乎於Heavy Cream與Yogurt之間的cream, 有點似Sour Cream, 含 30–45% 的牛奶脂肪而PH度約 4.5, 味道帶酸. 是法國菜中常用的乳製品. 在香港, 可以在City Super買到.

法式酸奶油Crème fraîche

材料 (2人份) : 

雞蛋 2 隻

Dill 刁草 適量

煙肉 適量

Paprika , 盬, 黑胡椒少許 (原食譜使用Nutmeg (肉豆蔻) , 但因我沒有又不打算買所以用了Paprika紅椒粉)

步驟 : 

1. 焗爐預熱180度.

2. 取一焗碗, 加1湯匙Crème fraîche, 加少許Paprika , 盬, 黑胡椒略拌調味, 再打入一隻雞蛋

3. 加入少許刁草, 再加1湯匙Crème fraîche, 把整焗碗放入一個有深度的焗盤內 (我用LC 25 Oval), 於焗盤內注入熱水至約半個焗碗的高度.

4. 放入焗爐以180度焗15-20分鐘.在焗緊的同時可把煙肉煎香至金黃香脆. 

5. 焗完後在再加入已煎香的煙肉即成.

配埋昨天在ABC Cooking Studio做的提子玉桂卷, 作為早餐真係好適合. 雞蛋與Crème fraîche真是非常夾~.

貴婦麵包體驗課 - ABC Cooking Studio @ PMQ

烘焙對我來說是一個未知的領域 , 對於各種材料的分量；手感、技巧、時間的掌握實在很難像其他料理般單靠看文字和圖片的食譜就可以有樣學樣, 親身教學對於我呢種超新手來說是必要的。

雖然曾有用麵包機做麵包的經驗, 但做出來的質感始終不及麵包店吃到的, 而且手搓個裝包更加係完全無concept啦. 其實ABC Cooking Studio剛開業時已有留意, 是來自日本的過江龍, 日本麵包一向都令人趨之若鶩 ; 但聽說尖沙咀店很難book位便擱置了...得知最近在中環PMQ開了新分店, 便約了好姊妹一齊貪新鮮一下. 體驗課$280 (like左佢地facebook的粉絲可減$80, 折實$200)

PMQ前身是警察宿舍, 現在已活化成專賣design野的地方, 但內部裝潢仍要保留警察宿舍的舊面貌, 例如這些綠色窗花。

我地做麵包的地方就在這光亮明淨的窗戶旁, 這裡是小班教學, 3-4人一位導師, 有咩問題都可以隨時向導師發問. 她們亦很nice.

原來做麵包的學問很高深, 呢個麵糰就係幾過第一次發酵後的麵糰, 導師教授我地搓麵糰的技巧, 測試發酵的方法, 各種配料放的次序等等, 絕非我等門外漢可從食譜書內可參透出來 , 選擇麵包課作為體驗課是明智之舉!

工欲善其事, 必先利其器 ; 話到明係貴婦麵包課, 工具方面梗係有要求啦, 有日本製的麵糰發酵機, 令麵糰的溫度和濕度都under control, 發出來的麵糰自然有水準啦~

雖然有機器幫手, 但手搓麵包中講求的手感, 必須要靠自已落手落力搓先可以半掌握倒. 呢張係入爐之前的賣相~

入爐啦~呢個爐真係勁野, 係多功能的Toshiba變頻式蒸氣微波爐(型號: ER-GD400HK), 一個爐有齊烤焗、微波、蒸煮、低溫發酵功能, 價值$5xxx, 真心俾佢毒倒了... 

出爐喇~ 玉桂提子包

仲有火腿包

焗得咁成功梗係即刻試食啦, 食落去個麵包真係好鬆軟, 好濕潤, 而且很真材實料, 同出面得一陣風既麵包完全兩回事, 果然係真正既日式麵包. 對於呢個製成品我都好滿意.

整個課堂花了近三小時的時間, 做了六粒麵包出來, 心機  是無價的. 而以$200學習到這些技巧, 絕對是物超所值. 當然在等焗包的時間了解一下這裡的課程, 這裡不像外間的烘焙學校, 反而似美容院, 要開course, 由最基本的6堂蛋糕課程($2,520) 到114堂蛋糕麵包日式料理全包宴master course  ($45,600). 定力少D都隨時一擲千金 (因為佢地環境真係幾好...). 不過我已經練成金剛不壞之身, 清楚明白自已個頭有幾大. ^^

松茸燉鮮雞湯 (附食譜)

在雲南帶來乾松茸片，是世界上珍稀名贵的天然药用菌；松茸含有3種珍貴的活性物質，分別是雙鏈松茸多糖、松茸多肽和全世界獨一無二的抗癌物質—松茸醇，有提高免疫力、抗癌抗腫瘤、治療糖尿病及心血管疾病、抗衰老養顏、促腸胃保肝臟等多種功效。總之就係好野黎架!

在雲南這幾天, 幾乎每天都吃到松茸. 但因鮮松茸只有三天壽命, 所以只可帶點乾松茸回香港. 松茸有獨特的香氣, 而乾松茸用來做燉湯最適合. 

材料 :

松茸(乾片) 大約50克

豬肉  302克

雞殼  1隻

薑片  適量

水  適量

1. 松茸先輕輕沖洗乾淨，用熱水浸15分鐘. 

2. 把豬肉和雞出水，備用。

3. 水煲滾下薑片，豬肉、雞，松茸，浸菇水要隔去沉底的沙，加入湯內，小火煲2.5小時，加鹽調味便可。

(忘記隔油了......有時間記得隔油)

松茸的香味落曬去D湯度, 而煲湯後的松茸就無咩味. 湯水好香, 令人一碗又一碗.