是日晚餐精選：咸魚雞粒炒飯

放工例牌OT半個鐘再買餸再煮飯實不容易，但我平時都會一心多用務求短時間內同時煮幾個餸。
今日試新野：咸魚雞粒炒飯。
我用的咸魚係油浸梅香馬交咸魚，上次蒸肉餅已用過一次，蒸完好香咸香味，蒸好時會林林地果款最香。

材料：咸魚2片、雜豆適量、雞扒1塊、雞蛋1隻、白飯3碗
1.咸魚去骨切粒。雜豆汆水。雞蛋先炒切絲，雞扒切粒，用鹽、胡椒、生粉、豉油、麻油醃15分鐘（留雞皮備用）
2.開鑊加油及雞皮，爆香咸魚，撈起備用。繼續爆香雞粒，熟時加入雜豆再爆一會，盛起。雞皮丟棄。
3. 開鑊加白飯，炒香放入咸魚、雞粒、雜豆、雞蛋即成。

今晚除左呢味炒飯，仲有蒸倉魚同娃娃菜。