是日晚餐精選：梅子蒸排骨

昨天媽咪俾左樽自家醃的梅子給我，是她上年四月醃制的。我唯一懂做的就是梅子蒸排骨，開胃酸咸的下飯菜。

材料：排骨、梅三粒、指天椒少許
醃料：麵豉2元，生抽、麻油、生粉、糖、辣豆辧醬
做法：
1.梅中爛，連醃料加入排骨醃15分鐘
2. 加入辣椒，隔水蒸15分鐘即可。

話說屋企d米食曬，叫肥肥買佢又話眼訓又話累，我一個人放工手拎住幾袋餸仲要買一包5公斤米行斜路返屋企；又買、又煮、又拎。我想，我其實是不是上一世欠了他？

周末晚餐精選：自家制雞煲

「雞煲」，近來火紅的菜式，大概是四川菜系及湖南菜系的產物。近排香港新開了不少專吃雞煲的店，以「先吃雞，後打火鍋」作賣點，一鍋兩食，味道香辣刺激。但街上吃食雞煲湯內總是超多油，單吃雞還可以，但放菜打邊爐的鍋，油太多使青菜都是油，食完多數會肚痛。

我同肥肥都是雞煲常客，尤其是新墟新開了西川雞煲店，足料得來味道香濃，我地每個月都幫襯，但缺點就是太多油。這個周末反正得閒，加上天氣還有少少涼意，決定上網找雞煲食譜自行製作。

原來雞煲一d都唔難做，只要買齊材料便可。當我去南貨店買乾指天椒和桂皮時，老闆即刻問我是不是做雞煲，呵，原來有唔少人都學愛自家制呢〜

材料：
冰鮮雞一隻（購自佳宝）、芫茜、唐芹、清雞湯
醃料：生抽、老抽、蠔油（2湯匙）、糖、酒
調味料：乾指天椒、桂皮、花椒、八角、指天椒、紅蒽頭、蒜頭、薑、洋蒽、九層塔、李錦記辣豆辧醬三大湯匙

做法：
1. 先把雞砍件，略汆水盛起，加入醃料醃半小時。
2. 燒紅鑊，用蒽頭、薑、蒜頭爆香油鑊，加入雞爆炒一會，加入所有調味料再炒一會，然後加入清雞湯加蓋中火4分鐘。
3. 加入芫茜、唐芹再煮2分鐘即可。

完成後我便原煲放到客廳打邊爐專用的電磁爐上一邊滾著一邊吃雞煲，果然味道9成似街上吃到的，但湯汁無咁多油，用來打邊爐都ok! 肥肥話味道不錯之後可番做呢！（沾沾自喜中）

是日晚餐精選：咸魚雞粒炒飯

放工例牌OT半個鐘再買餸再煮飯實不容易，但我平時都會一心多用務求短時間內同時煮幾個餸。
今日試新野：咸魚雞粒炒飯。
我用的咸魚係油浸梅香馬交咸魚，上次蒸肉餅已用過一次，蒸完好香咸香味，蒸好時會林林地果款最香。

材料：咸魚2片、雜豆適量、雞扒1塊、雞蛋1隻、白飯3碗
1.咸魚去骨切粒。雜豆汆水。雞蛋先炒切絲，雞扒切粒，用鹽、胡椒、生粉、豉油、麻油醃15分鐘（留雞皮備用）
2.開鑊加油及雞皮，爆香咸魚，撈起備用。繼續爆香雞粒，熟時加入雜豆再爆一會，盛起。雞皮丟棄。
3. 開鑊加白飯，炒香放入咸魚、雞粒、雜豆、雞蛋即成。

今晚除左呢味炒飯，仲有蒸倉魚同娃娃菜。