美甲分享 - Yama風 ＆ 紋身貼紙

又襯去旅行前做甲，今次揀左Yama風的圖案，大愛呀～

仲有大熱的metallic紋身貼紙，貪得意玩下～幾靚喎

JS Nail

屯門恒威工業中心A2座9樓08室

Jackie : 60181106 

一個女仔獨遊日本 － 出發前感受

呼～終於做了這個決定⋯⋯我將在9月一個人去日本旅行！！（灑花～）

一個人去旅行的念頭一直都在我的To-do List（參考連結：2015 keep young & keep energetic~!! 元旦日在大帽山看日出)中途一度打算放棄，想放棄的理由不外乎是一些很“行”的理由，雖然我已經訂好左機票，但我所憂慮的沒有因此而抛諸腦後，只是自行用另一種說法去游說自己。以下是自問自答的環節：

1）又去旅行，仲要一個人去，無人同你分擔食宿費，又使很多錢了！你好有錢嗎？

我只是一個平凡的打工仔，三十出頭 ，打一份朝九晚六的寫字樓工，幸運地我沒有太大的家庭負擔，每月有少少錢可儲；我不愛名牌，但我也有花錢的地方。旅行可以花大錢，也可以花小錢大享受，視乎個人選擇。今次旅程我都是買廉航的機票，去程什至不加寄艙行李，全handcarry；住的地方也是勁平的旅店，什至是膠囊旅館！別小看自己，其實我也很捱得。

2）一個女仔去到咁遠，不怕危險嗎？

雖然我去過不少聽落很危險的地方（例如中國），也自命是一個經驗的自由行旅者。但安全的確是一個很重要的考慮因素，所以我選了日本為我第一個獨遊的國家，應該會相對其他東南亞國家安全。本身諗過住青年旅館，但太趕訂住宿只剩下mix dorm，在安全的前提下我還是選擇了廉價商務旅館的單人房，及有女性專用樓層的膠囊旅館，青年旅館嘛…下次先啦～

3）自己一個人在外旅行搞得掂嗎？

我份人無野叻，唯獨在plan行程和覓食方面尚算引以為傲。以往同肥肥去旅行幾乎全部都係我一個人plan曬，加上依家資訊發達，有部上倒網的手機就應該無問題 …唯獨係我要刻服我以往的怕醜性格（哈很難相信我是怕醜女吧，其實我是）要鼓起勇氣向人問路，來吧！

4）你同老公係咪出現感情問題？點解丟低佢一個人去旅行？係咪治療情傷？

哈…不是喇…旅伴的性格其實好影响成個trip，而我視這次獨遊是一次挑戰自己的breakthrough。我係一個追求新鮮，喜愛挑戰自己的人，我不停讓自己的人生前進；只是我的另一半不是這種性格，我不是在介意，只是我興幸他沒有阻止我去追逐自己的夢想（其實他也說不上是支持喇）

5) 一個人去旅行好無聊啊，食飯又無人同你食，見倒開心野又無人同你開心share....

無錯，呢一樣野亦都係今次我要磨練同挑戰自己的一環。之前䏲過網絡潮文“毒指數”，我諗我今次一個人去旅行應該係Lv15吧！我唔會因為得我一個人而只去食杯麵／便當呢啲毒食，我會挑戰一個人食拉麵（我在香港也經常一個人去食拉麵，不過聽講日本人好少女仔會一個人去食拉麵），一個人去溫泉旅館一泊二食 （哈，難得人地又肯出啲一人遊的一泊二食package)，一個人食燒肉，一個人去居酒屋（不過肥肥唔俾我去飲之放題）至於點打發一個人的無聊時間，我諗我會自拍一下啦，睇下書啦，影下相咁～我諗住自拍一套遊記vlog，好唔好？

6）成日話要挑戰自己，成日去旅行，都30＋啦，仲掛住玩都未定性！

我最憎人用年齡去局限自己，說什麽都咁大個人啦，不能變喇，這只是籍口！只是30＋而已，人生還未過一半！人生如果不再學習新事物，唔通人生就只是一場等死的過程？睇下TBB既四個小生去旅行就知！

Anyway, 我對於今次的旅程，係期待、興奮多於擔憂，我期待可以改變自己，期待面對尷尬的狀況，在今次踏出左第一步之後，會不會是更多獨遊系列的開始？

I AM READY!

帶著爸媽去旅行～ 台北宜蘭四天三夜之旅 Day 3-4

Day 3

早上起來終於停雨了，還有太陽添! 昨天太大雨無法欣賞民宿的景觀，原來民宿對出有幾幅稻田，綠油油好舒服~ 當然襯好天氣影多幾張相啦~

早餐在民宿的交誼廳食，由女主人親手弄的自助早餐，好豐富啊! 清清淡淡的有地瓜粥，超甜蜜瓜和菠蘿，仲有椰菜、蛋餅，即磨咖啡，好滿足和輕鬆的早餐啊~

吃飽早餐，到附近走走，便要收拾行李離開了~我地去左附近的林場木業逛逛. 這地方是日治時期日本人在台灣砍木製木的地方，依家演變左成一個公園，有湖有樹有日式建築，逛逛都幾舒服的.

行完之後便去在入口處的"林場肉羹"，我對呢類像碗仔翅口感的東西興趣不大，但呢碗肉羹算是這裡的名物啊! 看這小店內擠滿食客就知曉了.

之後我們便去行程最後一個景點 - 國立傳統藝術中心，呢個有少少主題公園的地方，集合了老街文化、懷舊戲劇、古蹟的地方，啱曬一啲想集體回憶的老人家啦!

入到去公園內，先去行一條懷舊街，兩旁開了些專賣舊式手藝的小店，行得累了，有show睇! 可以安排老人家坐在戲棚睇show，爸爸對果啲集技表演很有興趣，不過表演主要係講台語，我就聽唔明喇.....有點悶lor.

在園內的food court吃了午餐，走到河的對岸有個"黃舉人宅"的古蹟，行下草坪便離開. 正式結束宜蘭之旅了.

感覺像沒有盡頭的雪隧

我地大約下午四時開車回台北市，因為是星期天，撞正塞車高峰期，好鬼塞呀! 總共要1.5小時才回到台北市呢! 又回到玩彩格旅店，稍為休息後我和肥肥便和家人分開玩，我地去了東區找LALA吃居酒屋! 和舊朋友把酒談心暢談一番，之後再join了肥肥的朋友再去酒吧飲過，哈哈玩到差不多1點才回旅店呢!

Day 4
被昨天晚上吃的罰單弄得心情遭透了.....無啦啦要俾NT900，在香港我地渣三四年車吃的罰單都不超過四張! 沒想到在台灣開兩日就中招了....

早上把車開回白宮租車後，便回到旅店和叔叔&叔母飲茶，哈，無錯，雖然大老遠去到台灣還是要吃港式飲茶才安落，最合爸爸媽媽口味了.

這間茶樓叫"吉星"，味道都不錯，但當然比香港飲茶不同啦~飲完茶，爸媽便跟叔叔回到他們在鶯歌的家，我和他們就此分別啦~~~終於完成三天照顧爸媽的任務，可以有私人時間啦! 於是我們便立即出發到西門町買手信，買了很多老天祿滷味!

在離開台灣前最後一餐，決定要去"鼎王麻辣鍋"，實在太想念這間麻辣火鍋喇!! 湯底的豆腐和鴨血是任吃的，配豬大腸真係好好食!

食飽飽便回旅店取回行李搭的士到機場，的士司機是昨夜其中一程接載我們的司機，NT1000可到機場，佢手車真係快到嚇死人! 好彩安全到達.....

明明我在買機票時已劃了位，不知為何check in時地勤把我們調到其他位子上，不過算啦個半鐘就到，食個飛機餐睇埋半套戲就落機了. 回家時當然也是call了uber車啦!

就這樣四天三夜就很快地結束了. 無心插柳的台北宜蘭之旅，所謂塞翁失馬、焉知非福，帶著老爺奶奶去旅行，一嘗他們想住民宿的心願！雖然只是短短四日三夜，作為兼職領隊、導遊、旅行社的我比起過往自己去玩更大壓力！不過只希望老人家玩得開心啦！

帶著爸媽去旅行～ 台北宜蘭四天三夜之旅 Day 1-2

Day 1 

這天一早六點半就要出門口, 好彩call左uber車, 依家uber做推廣, 由屯門出發再去屯子圍接埋爸爸媽媽再去機場，埋單只係$14 ! Unbelievable! 順利地去到機場check in, 再去翠華食個早餐就準時上機出發囉~

機上有電影和簡單早餐, 1.5小時就到達台北市! 入境後先買電話卡(NT300), 再去ATM提款, 爸爸之前說自已兌左四千蚊港幣做旅費，點知原來佢搞錯左，只兌了四千台幣! 唯有我用ATM再多提一點現金啦~用ATM兌錢最抵，又唔使排隊!

大約搭左NT1300的士，便到達旅館了. 還未到下午三點check in時間，先去附近四平商圈吃點東西醫肚，肥肥要吃佢最愛的牛肉麵! 今次食的是番茄牛肉麵，都幾好食~

吃飽之後便回到旅店check in, 這時Pat已經來到旅店join我地，攞左房我就安排爸媽先在旅館休息，始終老人家由早上六點一路chur到下午三四點已經很累，要預留充足的休息時間俾佢地先可以再繼續晚上的行程~

五十寸LG Smart TV

大大的窗戶，採光充足

仲有日式馬桶

大約五點半左右，就出發去信義區的饗食天堂食Buffet，我兩年前食過一次，佢地熟食的選擇都幾多，質素未至於五星酒店，但勝在性價比高，只係每人HKD$192左右，一家五口食得飽飽的! (以我了解我的6299，食高級餐廳他們反而不自在，食呢啲大眾化又性價比高的餐廳就啱囇啦)

食飽後天開始下雨，當天下雨都無咩景色好看，上101又要俾門票錢唔抵，我地去左101前影左張相就回酒店休息了。

Day 2 

這天大約9點我就起床，到附近一間cafe店吃份早餐，台灣真係好多早餐店，唔似得香港只係得茶餐廳>.< 吃一份大約HKD30~40的早餐，牛角包超鬆軟，而配菜的地瓜簡直是驚遺天人的美味!! 從來未食過咁甜的番薯!! 原來係用左"台農57號地瓜" ! 好好味啊~

之後我地就搭的士去位於台電大樓站旁的白宮租車取車，裝好GPS就開車啦~ 先回到旅館接回家人，只取了一天用行李就出發去宜蘭啦~

去宜蘭要經一條12.9km的雪山隧道，以時速60公里計都要開12分鐘才可再走畢全程~ 出左隧道就到左宜蘭喇~我地先去附近的礁溪吃甕窯雞，這一帶吃這種甕窯雞好似好出名，位於公路旁已經有三家，網上說"古早甕窯雞"較多傳媒報導，遊客較多，而旁邊的"大灶雞"就是本地人推薦的，所以我地就揀左"大灶雞".

我地五人點了一隻雞，再點了些在地獨有的蔬菜，例如炒過貓(一種有少少潺的菜)、炒三星蔥等等~

炒三星蔥

炒過貓

雞上桌了，其實去年我去阿里山也吃過一次，在阿里山餐廳會幫我地切埋，呢度要自己用手撕~撕雞呢個任務當然係交由爸爸負責啦! 睇住啲雞汁一路撕一路流出來，引死人啊~

這一餐大約一人HKD50左右，很抵食~ 之前便到附近的礁溪溫泉公園泡腳去~ 免費的泡腳好舒服，仲有人現場吹色士風! 吹得好好聽，像CD一樣!

浸溫泉這活動真係好適合老人家，泡泡腳，最緊要係唔使錢呀麻!! 哈哈

浸完腳我地就出發去羅東，打算去梅花湖，只可惜天色不好，我地就無去遊湖，反而去左湖邊山上的三清宮，打算在高處看看湖的景色。怎知三清宮剛剛在進行激烈的道教祭祀儀式，又乩童之類的，唉搞到我呢啲外行人看起來心裡有點毛毛的....

離開梅花湖，我地就去今天入住的民宿check in喇，GPS的位置是在稻田之中，車子駛到田中時真不敢相信，這橦美美的南法風建築就出現在我們眼前，看得出媽媽和Pat都很讚嘆呢~

我們入住的是獨棟四人房，裡面有一個小廳，一張超美公主風的雙人床和洗手間在地下，有一條小樓梯上閣樓，閣樓再有一張雙人床和一張單人床....雖然很想訓果張甜美的公主風的雙人床，但顧及老人家晚上可能要不斷起床上廁所，要他們摸黑上上落不是太好，所以就讓了這張床給他們了....(哈，那些放在床頭的公仔被媽媽狠狠地拿走了...老人家真是一點童真都沒有呢....)

待爸爸媽媽洗過澡後，便出發去羅東夜市囉! 可惜雨一直在下，不但沒有停下反而更加大了....但羅東夜市仍然很多人呢~ 有好幾檔更有排隊人潮! 因為爸爸不太喜歡這些夜市的店，媽媽又怕不衛生，所以我地分頭搵食，我和肥肥和Pat就自行去掃街了!!

來到宜蘭的三星蔥好像很出名，這種用肉捲著蔥燒起來很好味! 

而這一款薯條臭豆腐又係非常美味的! 把臭豆腐切成薯條形狀去炸，再淋上濃濃的車打芝士醬，真係好正呀~

除了在夜市即叫即吃之外，也再外帶些小吃回民宿再食~ 我還點了麻油雞，聞起來好看，可是吃起來好苦啊.....

帶著爸媽去旅行～ 台北宜蘭四天三夜之旅

這次台北宜蘭之旅是無心插柳的，事緣本來美國的大嫂和侄仔會去台灣旅行，老爺奶奶好想見孫仔一面，不惜舉家飛到台灣，可是當機票和住宿都訂好，孫仔又突然病倒，導致他們的台灣之行要取消！正當無奈之際，原訂的AirBnB住宿居然被取消!? 都唔知係咪自己黑仔，不過正所謂"塞翁失馬、焉知非福"，索性BOOK間靚民宿，反正又未去過宜蘭，一於帶著老爺奶奶去闖蕩一番！

團友5人：

老公肥肥 -- 愛吃

姑奶Pat -- 愛拍照，愛美

奶奶 -- 行動較慢，經常嚷著要上廁所，一直很期待住民宿

老爺 -- 心急急燥，細路仔脾氣，百彈齋主

新抱(我) -- 負責整個行程的訂票安排，兼職領隊導遊旅行社

1. 機票 - 4D3N
去程: 10/4 HKG (09:30) --> Taipei (11:30)
回程: 13/4 Taipei  (20:30) --> HKG (22:30)
價錢 : $1058/人 (已包稅及燃油附加費)

因為今次係同老爺奶奶一齊去旅行，所以一定唔可以搭航班時間差的航班，而且一定要有寄倉行李的，所以今次揀左香港航空，價錢平得來之餘，又有齊傳統航空公司的服務，早去晚返時間剛剛好！

2. 行程 : 4D3N
Day 1 : 香港-->台北-->前往玩彩格旅店check IN-->附近吃午餐，在酒店保息片刻-->饗食天堂晚餐
Day 2 : 前往白宮竹租車取車-->接爸媽上車-->開車經雪隧前往宜蘭-->礁溪大灶雞午餐-->礁溪溫泉公園-->梅花湖三清宮-->夏米去散步check in-->羅東觀光夜市食小吃
Day 3 : 民宿早餐-->check out--->林場木業-->國立傳統藝術中心-->回台北市-->與lala和Daniel日晚餐
Day 4 : 還車-->和阿叔飲茶，把爸媽交到阿叔手-->西門町買手信-->鼎王麻辣鍋-->回港

和爸媽去旅行，行程絕對不能太趕，一定要安排足夠的休息時間。老人家會比較喜歡浸溫泉、行公園等靜態活動，而南法甜美風的民宿則啱曬愛拍照的姑奶，羅東夜市就適合為食的肥肥～所以今次的行程安排我可是十分細心呢～

2. 台北市住宿 - 玩彩格旅店
在出發前不足三十天找台北市的住宿，還要找三人房，大部份都full了，而我地budget又唔高，咁啱搵倒呢間新開的旅店做開幕優惠，平日二人房只係HKD$516. 位置在松江南京站附近，其實搭捷運都好方便(不過我地呢四日無咩機會搭)，房間裝修好新淨，仲有五十寸LG smart TV和日式廁板，大單邊窗戶，陽光充沛!

只可惜這間旅店不設停車位，我地星期日渣架車返來打算在旅店門口的小小私人停車處(只可泊兩架車)泊一晚，晚上竟然吃罰單!!! 原因是我們擋住了前面的機車不能駛出!! 嗚嗚....NT900的罰單啊..

3. 宜蘭住宿 - 夏米去散步
宜蘭簡直是民宿的天堂啊，花多見亂! 喜歡泡溫泉的可以住礁溪，也有看海衝浪的，這次我選了這間是走南法風的，除了外表吸引之餘，更好是有獨棟四人房，我地五人可以獨住整棟family房! 
而民宿的早餐是自助式的早式早餐，清淡得來很好吃! 剛好可以為我們這幾天吃太多立集野去清清腸胃!

4. 有關租車 - 白宮租車 - Mazda 5 NT5000/2天
去宜蘭兩天我地打算自己開車，朋友說可以找些連司機包車的，可是我地5人租小車又坐不下，而包司機的又要安排兩天一夜司機的吃住，再者行程安排又無咁彈性(例如要連chur曬一日的景點才回家) . 於是去台灣之前早已在網上找尋租車公司，但搵左五六間都只係得兩間回覆, 價錢不便宜也算, 而取車一定要去車行取，沒有送車到家服務，相對泰國租車真係麻麻地喇....

不過車子是很新淨的, 2014年車，我地特登租一架2000cc的7人車，可以坐得鬆動啲，裝左行李坐滿5人都好夠力~

總使費 : $3164/人

布吉寇立五日五夜之旅 - Day 4-6

連續兩天都安排了出外島浮潛的Tour, 第一天是先去Tachai Island. 因為接送車7:15am就會來我的酒店, 所以我要6點就起床, 在酒店吃過早餐再出發. 無錯, 個schedule仲早過平日番工...

JW Marriott的早餐很豐富, 有煙三文魚, egg station除左有基本奄列菜色, 仲有Eggs Benedict, 又有即做的french crepe, 吃得很飽.

之後搭左半個鐘車就到左碼頭, 未咁快上得船, 等左差唔多大半個鐘先上船. 碼頭有免費早餐食, 有咖啡, 蝦餃燒賣, 仲有免費暈浪藥提供.

Tachai是Similan Island其中最北的島, 是近年才開發的, 所以又叫"處女島". Tachai Island的行程主要是環繞Tachai島兩個浮潛點浮潛, 再上岸enjoy下個沙灘.

呢度啲水同沙都係perfect的, 水好似玻璃水咁, 薄荷綠色, 沙又幼又白. 不過魚仔我覺得唔多, 可能Similan有規定唔俾人餵魚, 所以吸引唔倒魚仔. 而當天可能是星期六的關係, 好多泰國本地人去Tachai.

午餐就食團餐, 難吃, 不值一提.

回程大約5點左右, 得知當天有weekend market, 便和肥肥去逛一逛. 很多小吃檔, 算幾熱鬧.

泰國market必有攤檔 - 炸蟲蟲

我們就在weekend market買了些小吃回酒店當晚餐. 

隔天再去Similan Island. 

上圖女子不是我

Similan Islands的水質和沙灘質素和Tachai差不多, 但Tachai的沙灘長一點. 而Similan的最大賣點是有海龜, 我有緣在浮潛時見倒海龜游過, 只可惜來不及舉機影相.

回程時仲有海豚.

出完兩日外島, 回到酒店, 再游去pool bar度Happy Hour, 有幸欣賞到酒店沙灘超美的日落, 好寧靜, 好舒服. 

晚餐就吃了泰式火鍋, 三十度高溫沒有冷氣下打邊爐, 但其實都唔係好熱.

雖然第二天預約了酒店spa, 但都是忍不住泰按多次. 肥肥做了Aloe Vera的曬後treatment, 我就做了草球按摩.

Last Day, 只有最後一天在寇立才可享受一下酒店. 所以今日的節目是 - 狂HEA. 當然要嘆盡個早餐同私人沙灘啦~

吃飽早餐便去團購附送的酒店Spa一小時泰式按摩, Quan Spa好舒服.

肥肥再一次在按摩中途訓著了, 手法亦很好. 我地request左late check out, 可以延遲到2點退房, 但即使check out左都仲可以用酒店個Late check out lounge, 有更衣室同shower可以用. 於是我地再游下水, 玩下table tennis, hea到5點幾再Happy Hour, 終於6點就離開了.

晚餐我地去左寇立最hit的餐廳 - Smile restaurant, 呢間係食泰法fusion菜, 6點幾去先有位, 晚一點可能要等位了. 

BBQ Tiger Prawn, 好彈牙

呢個串燒係當日推介菜色, 但好UN, overcook, 唔掂, 我同左chef 投訴

最終真的要離開了, 我地開車到Mai Khao 一間英國bar度, Hea到十二點, 貪佢近機場, 凌晨在還車前找不到油站入油, 所以就由車公司估算油價付他就算. 機場很多內地客, 只有在寇立, 才看不見內地遊客的蹤影.