窮遊沙巴 Day 4-5

Day 4: 酒店早餐--> 舊街場飲白咖啡 --> 怡豐茶室食喇沙 --> Warisan Square 按摩 --> 買手信--> waterfront 看日落 -->大茄來海鮮-->到酒店訓覺ZZZZ
這天一早起床就一直下雨, 原本諗住去下沙灘/泳池游下水都勁無mood, 唯有在酒店食下早餐la, 初頭我以為我個package唔包早餐, 點知行到餐廳時講下房號佢就俾我地入去?? 自助餐都多野食既, 不過就好似香港果D三星酒店咁, 同一大班蝗虫搶呀搶......狼吞兩大盤之後, 又返上房間休息下.

 

坐12點的shuttle bus到Wisma Merdeka再唱錢, 但今日個兌換率無咁好, 只唱得RM1=$2.44. 之後就去左舊街場飲左杯白咖啡, 好甜好強庶糖味. 其實這是來自怡保, 不過就是馬來西亞口味.

飲完咖啡就去怡豐茶室食喇沙, 牛雜粉, 雙層拉茶. 可能個早餐仲係太飽, 所以覺得D粉麵都普普通通, 反而個雙層拉茶就幾正!

喇沙

牛雜粉

雙層拉茶

食到飽到頂住個肚, 就行左去Warisan Square 的D'touch按摩, 1小時全身按摩+半小時按腳 RM70 (HKD$170.8). 按腳時安排左個男的按摩師幫肥肥按, 肥肥就覺得毛管棟, 全身按摩時要求換女人按....keke.....全身按摩都幾舒服~用左一D驅風油/lemongrass味的按摩膏, 好爽.

按完時間尚早, 我地買左少少手信, 就去左waterfront一間Irish bar飲杯野, Happy Hour香港價, 算啦反正無野做, 落左成日雨, 飲飲下仲落狗屎添!

飲左一杯, 就再去大茄來再食海鮮!! 再食過大肉蟹, 今次試咸香醬炒, 果然好惹味好香口!

今日的蝦比昨天小一點, 試了乾奶油炒的蝦, 好香好好味啊!

這次試了東風螺, 這裡的煮法是薑蔥灼熟, 俾埋牙簽你"了"出來, 再沾腐乳來吃.

還有甜品, 椰子布甸, 但不是用椰奶, 而是用椰青水加大菜做的, 味道一般.

今次叫多兩枝啤酒, 埋單RM175 (HKD$425). 食完肥肥買多枝榴槤雪條, 就回酒店執行李ZZZZ.

Day 5 : 6:30 (亞庇) --> 9:20 (香港)

凌晨四點起身, 這晚訓得唔好, 怕起唔倒床miss左班機. 5點鐘check out, 點知前枱居然無收我地room dinning的錢?? 預約左5點的的士, 凌晨去機場要收附加費RM45 (HKD$109.35) 以為6點半機無咩人搭, 點知機場已經迫滿曬人, 今次唔敢怠慢, 早D入去等上機.

以往同肥肥去旅行離開時都會唔捨得呢個地方, 但今次無呢種感覺, 可能真係被天氣影響, 返到香港天氣仲好過沙巴......

窮遊沙巴 Day 3

Day 3 : 10:00 Jesselton Point搭船到 Mamutik島浮潛 --> Manukan 島lunch and swim --> 酒店休息-->大茄來海鮮-->菲律賓夜市

這天起床看到太陽伯伯, 真係開心. 所以就搭第一班shuttle bus 10:00去Jesselton Point出外島, 提早左出外島的時間, 所以今日決定玩兩個島 : Manutik 及Manukan 島. 今次都係幫襯Burneo Ferry, 但今次就等都唔使等, 俾左錢(RM120, HKD$291)立即上快船出島.

出發喇!

去到Manutik島, 再俾上島費(RM20, HKD$48.6). 食個早餐先, 一杯美綠及漢堡包, 味道一般啦. 飽飽後就落水了, 但這裡的水很多石, 都算多野睇, 水亦比Sapi相對清些(但仍與蘇梅有很大距離). 玩到1點我地就搭船到Manukan島了.

Manukan島是三島中面積最大, 有些較休閒的餐廳及酒店, 我地選了間較舒適的餐廳食lunch, 聽著音樂對住大海, 點了兩份咖喱雞飯, total大約RM 60(HKD$145.8). 順帶一提, 這裡的服務真係好慢, 得果三枱客, 等到頸都長, 催一催下侍應, 原來一早做好了, 只是侍應沒有留意 !? OMG....

食完飯在沙灘上攤陣再落水, 但呢個島浮潛就無野睇, 只係適合游水, 但浪很大, 呢個島反而無咩遊人. 4點要回去了, 在碼頭等pick up船, 個碼頭好平靜, 好舒服.

 

回到Jesselton Point, 買左兩條牛油果味及榴槤味的雪條, 真係好美味啊!

搭的士回酒店休息, 居然因為塞車要RM20 (HKD$48.6)!? 回到酒店想預約shuttle bus 出番去食晚餐, 居然fully book!! 唉又要使多RM15搭的士出去食飯!!! 愈諗愈覺得揀呢間酒店真係大錯特錯!!! >.<

今晚晚餐決定到大茄來食海鮮, 我地大約7點鐘到, 已經坐無虛席, 不過都幸運地找到一張吉枱. 所有枱都集中在魚缸果邊叫海鮮, 好不容易才找到一名侍應幫我地落單, 呢度揀海鮮就無即場秤重俾我地睇, 但價錢就比華興抵食, 尤其是肉蟹, 大肉蟹(約1kg /2隻) 只是RM60 (HKD$145.8)又係食全海鮮宴, 今次點了四款海鮮一碟菜, 比昨天還要加多一碟, 如下:

超級多人落柯打, 要捉實D侍應

薑蔥煮象拔蚌

咸魚炒芥蘭仔 (原來這是沙巴菜, 起初以為佢俾錯左生菜我地)

超鮮甜沙白蜆湯

濕奶油游水虎蝦仔, 有8-10隻架

正正正, 咸蛋炒大肉蟹! 兩大隻!!

成枱都係海鮮呀~~~好滿足!

 

埋單了, 這一餐居然比昨天仲抵, 只係RM158! (HKD$383.9) 好抵食啊!! 之後我地再戰菲律賓夜市, 呢度除左賣小吃之外, 其實仲係街市咁, 有D魚呀菜呀賣的. 亮點當然係燒烤小食啦!  雖然好飽, 但仍然買少少小吃回酒店當宵夜吧!

又有呢D燒烤檔, 今次仲有燒粟米

有好多擺曬O係度既燒魚, 買左一條燒泥猛(RM20, HKS$48.6), 點知返去食落覺得臭, 即刻唔敢再食.

呢D冰飲又係似乎由早放到晚, 估計含菌量超高, 唔敢試.

幫襯左呢位貌似Mario的叔叔點了一份炒麵, RM7 (HKD$17)

 

 

回到酒店食埋昨天食剩的榴槤 (勁大陣味), 訓覺ZZZZZ.

窮遊沙巴 - Day 1-2

Day 1 : 19:50 (香港) --> 22:45 (亞庇) -->到酒店訓覺ZZZZ

Day 1 我地大約6點到達機場, 一早已經做好網上check in及print埋登機証, 可以唔使排隊check in 直接入登機閘慳番D時間, 所以特登到T2食米芝蓮一星的"阿鴻小吃"做晚餐, 他們的滷水真的好好味, 特別香. 滷水鵝片太貴了, 所以點了滷水鴨舌及豆腐.

 

怎料食下食下食到六點二十分, 飛奔到登機口, 原來班機提早左20分鐘!! 個死人登機口仲要係果D衛星閘口, 要再坐接駁車先去倒, 坐車果時已經final call, 地勤仲打電話來說全架機都上曬得番我地兩個>.<, 好緊張呀落車即刻衝衝衝, 好彩俾我地上倒飛機, 眾乘客則回報一個想殺人的眼神吧........

飛行時間3小時左右, 無飛機餐時間都好易過, 睇左三集半澤直樹就到沙巴. 到埗已經11點幾了, 搭10分鐘的士就到酒店(RM30, HKD$72.9). 果然酒店附近係咩都無得食, 餓住真係訓唔著, 所以同肥肥叫左個馬拉炒飯 (RM19, HKD$46.17), 點知等左半個鐘先到, 來到簽單只係 (RM10.45? HKD$25.39)? 無啦啦優惠左?

Day 2 : Wisma Merdeka唱錢及買電話卡 -->富源食咖央多-->Jesselton Point搭船到Sapi島-->佑記食肉骨茶-->酒店休息-->華興海鮮樓晚餐-->附近買小食及榴槤-->到酒店訓覺ZZZZ

第二天搭10點的shuttle bus到Wisma Merdeka商場, 網上說這裡唱錢最抵, 有好多間兌換店, 稍為找了兩三間對較下, 果然相差幾大, 最後兌了1RM=HKD$2.43, 同我在香港兌一樣. 而電話卡就好抵玩, 連100MB上網只係RM15(HKD$36.45), 又要插卡又要註冊, 全部由店員搞掂. 

Wisma Merdeka商場



之後去富源食早餐, 試了拉茶、牛油咖央多、花生醬咖央多、半熟蛋. 咖央甜甜地幾好味, 配埋半熟食, 不過食得好"呢hea". 拉茶的味道似台式珍珠奶茶, 我覺得港式奶茶好味D. 至於其他中式點心, 熟食(腸仔, 魚旦)就麻麻地.

富源茶室

 

拉茶

半熟蛋沾多士

食完之後慢慢步行10分鐘左右到Jesselton Point碼頭到Sapi島浮潛, 我地選了5號的Burneo Ferry, 2人連租用mask&life jacket約RM110(HKD$267.3). 其實間間價錢一樣, 但我地11:45俾左錢之後, 等到12:30先有船......-_-"

我們用的是5號, 不過其實間間都一樣價錢

搭10分鐘快船就到了Sapi島, 好多人啊!! 仲要俾上島費RM20/2人 (HKD$48.6) 感覺有點似西貢外島咁......沒有locker, 我們就把物品放在沙灘, 貴重野就放防水袋隨身攜帶. 開始浮潛喇......水底都幾多小魚, 但水都幾混濁, 感覺麻麻, 同蘇梅布吉無得比>.<

襯好天氣拍了一張

由香港帶來的水泡

 

 

玩左差唔多1小時, 突然救生員叫曬D人上岸, 原來有storm黎緊!!! 全個島幾十人被迫埋在一百呎的小涼亭內, 好辛苦好狼狽>.< 大雨下了半小時左右, 無咩人再落水, 但因為我地約的pick up time係4點, 就要呆等到4點先有船回去, 好無mood啊.....>.<

暴風雨過後的Sapi

回到KK市, 我地去左佑記肉骨茶, 舊式店舖內人聲鼎沸, 幸運地找到一張枱坐下, 點了豬腸, 排骨, 肉丸, 豬手, 豬肝, 全部都超好味!! 我尤其喜愛肉丸, 豬腸, 豬肝!! 終於可以一掃今天的bad mood. (大約RM45, HKD$109)

 

成枱人就在終極開蒜頭, 開到成枱都係

豬腸(賣飛佛)、排骨、豬手

肉丸(賣飛佛)、豬肝(賣飛佛)

之後再到Wisma Merdeka等shuttle bus回酒店, 等車時仲食左杯榴槤綿綿冰, 超好味啊!!! 濃郁綿綿冰再加榴槤肉, 馬來西亞榴槤果然非同凡響!! 正!!

回酒店沖個涼休息下之後, 就再搭shuttle bus到Sedco Square食海鮮, 這裡有多間海鮮店,以双天海鮮樓及華興海鮮樓最受遊客歡迎, 我地就食左"華興".

 Sedco Square

 

 

D海鮮都是在魚缸裡挑選的, 我地選的都是活的, 選了就放在籃內即場秤重量計錢. 不知道那個籃有幾重, 但感覺都不算十分便宜. 我食左三款海鮮一碟菜, 如下:

濕奶油煮國寶大虎蝦1隻(開邊食)--> 濕奶油是馬拉煮法, 好似白汁咁, 咸咸甜甜, 好味!

白胡椒炒膏蟹--> 白胡椒炒得非常惹味! Yummy!

清蒸魚

 

桔仔冰, 馬來西亞特飲

馬拉盞炒通菜

 

 

呢一餐兩人共吃了RM200 (HKD$486), 感覺價錢一般, 未至於我想像中咁抵食. 食完之後又落雨, 咁啱餐廳旁就泊了一輪貨van賣榴槤, 嘻嘻, 買了一盒貓山皇Mausan King做飯後果回酒店吃, RM35 (HKD$85), 內有四件, 果然係AA級, 口感淋滑, 入口香濃, 好好味!

 

 

原本想去菲律賓夜市再買點宵夜, 可是行到半路突然橫風橫雨, 唯有放棄, 只到餐廳附近的小吃檔買了燒雞翼回去, 十分便宜, 燒雞全翼只是RM1.5/隻 (HKD$3.6). 沒有肚痛.

 

 

搭的士 (RM15, HKD$36.45) 回酒店, 其實很近, 只是5分鐘而已.  吃過宵夜訓覺ZZZZZ.