2011布吉泰好Hea - 後記

今次布吉之旅, 我學會了感恩和懂得放低執著.
眾所周知我是地獄黑仔王(為此我真的會檢討一下,做多點善事吧),凡事計劃周詳,總有一年不逢一遇的突發事件發生.例如一整年泰國都無水災, 偏偏我去旅行是就水災了.
有感此循環將不斷發生在我身上, 我學會的, 是懂得放低執著.凡事看開一點, 就不會太傷心.

想番起今次旅行, 朋友說泰國水浸了, 我說只要飛機能著地我都會照去.結果就沒事啦(其實布吉根本無事).
看天氣報告說逗留期間會有雷雨, 什至在布吉時起床後看了烏雲密佈, 我說下小小雨不礙事, 很快會放晴.果然就很快放晴了,
一早約好的攝影師臨時放飛機,她安排了她的助手幫我影, 反正我都no choice了, 可能都影得唔錯呢.

放下執著, 我還相信上天還待我不薄. 欣賞我還擁有的, 會活得更開心.

2011 布吉泰好Hea – 泰好吃

一砲過寫曬在布吉食過的泰菜! 

Patong 大排檔

第一晚一到埗, 即刻諗住到酒店旁食雞飯, 點知已關門(都好正常啦, 成12點). 於是就在雞飯店的門口大排檔坐下, 同樣叫了雞飯(50b, hkd12), 不過D雞好鞋, 唔好食. 再叫了炒菜, 炒金邊粉, 飲下啤酒, 食到凌晨, 大排檔把枱椅都收埋了, 得番我地最後一枱客. 

Bazaan Fresh Market & My Kitchen

位於Patong地標帆船商場後面, 是一橦街市, 地下果層係街市, 賣魚, 肉, 菜等等, 二樓則是熟食中心. 我同肥肥就在地下果層買左三隻蟹(260b)及半kg的蝦(200b)拿到二樓加工煮, 二樓加工店my kitchen係forum推介的, 加工費連一碟辣到飛起的炒通菜加一碟飯340b, 蟹是薑蔥炒, 蝦是椒鹽乾炒, 這餐合共800b (hkd 205), 蟹及蝦買得太多了, 吃不下浪費左少少. 好好味. 

Patong beach road 燒粟米

布吉必食燒粟米, 把粟米放炭爐輕輕一燒, 加上牛油再灑少少鹽, 好惹味. 

No. 6 restaurant

這間店是網上推介的, 說很抵食云云. 我地去到果然坐無虛席, 老外居多, 但他們大都點碟頭飯. 我同肥肥點了一條甜酸炸魚, 很開胃, 公車number(即生蝦刺身), 冬陰公及甜酸雞. 除了甜酸雞的雞很老之外, 其他都很好味. 但這一餐約1000 baht, 即二百多元, 不是我想像中咁平. 尤其是甜酸炸魚, 雖然很大條, 但350b(hkd89)有點太貴, 這一餐略有中伏之感. 

Lunch@ the boat to James Bond Island

這一餐是團餐, 是1 day tour包的, 和大伙兒在船上吃. 雖然在船上吃, 但全部即場煮的, 餸菜亦多樣化, 同樣有前一晚的甜酸炸魚, 更顯昨晚吃得不值. 

山下小店@cape Panwa

Cape Panwa附近沒有幾多餐廳, 如不在酒店內吃, 這一間泰式小店是港人夫婦推介的, 亦有不少老外光顧.冬陰公, 雞串燒, 鮮蝦粉絲沙律, 鮮蝦炒菜等果然做得不錯, 最正係個甜品芒果糯米飯, 好好味, 這一餐亦爆分. 

元春堂@Phuket Town

這一餐是影婚紗相中途的午餐, 是攝影師介紹的, 布吉town很多華人開設的小店, 這一間又係食住華人佈置而做的小餐廳, 布吉面做得佷出色, 面很香蛋味, 好食. 

Natural Restaurant @ Phuket Town

最後一天到機場前順道前往的, 08年已經想食, 但因為潑水節休業了, 今次終於食倒. 這裡的佈置頗特別, 可以影好多相, 不過也頗有呃遊客之感. 點了冬陰公, 公車number, 燒雞, 炒蟹肉, 還有一杯鮮榨菠蘿汁, 布吉面. 肥肥因為早餐未落格所以少吃了, 所以我食得很飽很飽. 這一餐我記得要2XX港幣, 以布吉消費有點小貴了.

2011 布吉泰好Hea – 泰好玩@包車一日遊

今次搵Man哥包車,被肥肥評為滿分的安排, 其中一程就係由The Nap到Cape Panwa轉酒店順便包車遊. 因為還掂都要租車轉酒店, 順便環島玩一下, 去玩有司機又唔使肥肥渣車, 佢非常樂意呢! 

當日十二點check out, 在76bar飲埋goodbye drink同果盤, 司機非常準時12:30到達. 是私家車, 司機幫我地搬行李上車, 車上冷氣強勁, 又舒服. 很容易同司機溝通今天的景點, 我地就由The Nap 出發到距離芭東15分鐘的Kata Beach. 

原先諗住去Karon Beach游水水, 但司機說Kata游水較好, 我便信佢啦! 到左Kata, 租了兩張沙灘椅, 就同肥肥曬下太陽落下水玩下肥豚擱淺. Kata Beach的海灘很適合游水, 沒有任何礁石, 水清沙幼. 不過浪不少, 所以亦吸引不少人玩滑浪. 

功夫熊貓在練功

很多老外都在玩水, 老外曬太陽, 大都帶埋本書一齊睇. 我都係, 有卓韻芝的書陪我. 我地D錢同passpot都留在車上, 但仍帶了相機同電話到沙灘, 在我同肥肥落水時把物品放入環保袋內就落水了, 雖然一路目及住d野, 不過如果在大陸的話一定唔敢呢! 游完水便俾左50B到沙灘旁的公廁沖身, 但其實都幾乾淨企理, 好過大陸好多! 

玩下玩下四點幾, 同肥肥到沙灘旁的小店行個圈, 司機就已經在接我們了. 之後我地出發到20分鐘外的Rawai Beach. 果度唔係游水水, 而係到小market買海鮮! 我同肥肥鑽入一些貝殼店後, 便有幾檔海鮮檔賣海鮮的, 講真規模很小, 屯門街市的魚檔分分鐘多過佢. 不過, 細心揀都搵水荀野. 

今次豪一豪佢, 去左一檔龍蝦檔, 揀左一隻生猛龍蝦(活的), 才1100b (hkd256). 再買左250b(hkd64)的生猛蟹3隻, 又買多6隻大虎蝦(睡的)約200b, 仲有活的大蜆1kg 50b (hkd12)絕對平過自己捉, 最後想食蒸魚, 但係呢度D魚唔知係咩魚, 都是五顏六色的珊瑚魚, 但全部睡的, 而且仲有好多污蠅褸住, 唔敢買. 最終買了一條在冰堆內的, 沒烏蠅, 約40b. 

之後司機帶我地去一間餐廳(SALALOY)內交低海鮮俾佢加工, 因這店就位於往日落崖的途中, 我地可以交低海鮮後去日落崖睇日落之後回來食就時間啱啱好. 果然係幾十年老店, 加工有曬相片餐牌唔怕溝通困難. 

之後我地就去日落崖了, 距離SALALOY 5分鐘車程, 呢度似一個旅遊點, 日落時間很多人, 又有旅行團, 個指示牌都有中文的…不過我幾乎都肯定密雲的當天一定沒有日落看了, 果然不出所料, 不過還是買了個椰青, 吹吹海風看看風景(其實個心掛住D海鮮多D, 嘻) 

肥肥說他在扮我影相時的笑容, 一D都唔似, 是嗎?

離開日落崖回到SALALOY, 一早就預留左海堤邊的位置俾我地了. (順帶一提坐海堤邊很多蚊, 即時去便利店買左支蚊怕水). 這裡晚上吹著涼涼的海風, 很舒服. 有時覺得在泰國坐沒有冷氣的餐廳很不可思議, 但實情係好舒服的, 香港才是真正冷氣之都. 

餸菜隨即端上了, 中式蒸魚: 出奇地合口味, 沒有蒸得太老, 只可惜魚本身是死的, 不好吃. 炭燒虎蝦: 彈牙香口 , 蒜蓉炒蜆: 好味鮮味, 咖喱炒蟹: 蟹有高, 咖喱不辣好味, 最重點係芝士焗龍蝦, 一隻龍蝦分開兩邊, 同肥肥一人一半, 好似食雞脾咁食龍蝦, 彈牙滋味非常, 我同肥肥什至太集中食龍蝦都唔得閒講野, 係咁默默地吃! 

食到嘴jiu jiu 2011版

這一餐再點了啤酒, 炒通菜, 白飯, 連加工油料錢同材料費約HKD605, 是整個行程最滿足的一餐. 

食飽飽司機就接我地去Cape Panwa酒店, 要行40分鐘, 要8點半先到達. 其實我book這個司機是6小時的, 但卻overtime了兩小時, 下車時我問他要俾幾多錢, 他沒有收我extra錢, 都仲係1200b (HKD307), 他服務太好了所以我決定多付100B(HKD25), 合計1300b(hkd333)開心錢.

2011 布吉泰好Hea – 泰好按

在布吉主要活動, 除了食同沙灘, 最正既係泰按. 08年去布吉, 唔知係咪鬼um眼只去過一次spa,仲要好貴果隻. 今次終於醒覺, 7日行程去左4次泰按, 真係dup到骨頭都散埋! 

泰按的舒服, 非大陸正骨可媲美. 大陸的骨女就算柯打泰式, 都係以指壓方式幫你按. 在布吉, 尤其是嬸嬸級的, 更加厲害, 下下有力, 用盡她的全身各部份幫你按, 以手掌、手前支、腳掌等加壓, 有力之餘唔會按到痛, 總之好能C服. 

Emotion Spa @ Patong

Patong有好多小店做泰按, 部份比較簡陋, 有些更有大批骨妹(om, 其實分唔清佢地係男定女)站在門口拉客, 邪骨味很重. 芭東街頭亦有不少做fish spa的, 在這個色情工業咁發達的地方做fish spa真係搵命摶, 我打死都唔會做. 

Emotion Spa在Forum很多人推, 而且就在The Nap酒店同一條街, 店子小小, 技師嬸嬸們就坐在店子出面, 打開門進去, 床與床之間用布廉分隔, 雖然小店模式, 換衫, 音樂, 燈光, 小佈置都全部做到足, 按完仲有杯甜茶暖胃. 最緊要係價錢, 我光顧了兩次, 第一次300b(hkd76)/hr做香熏推油, 第二次250b(hkd64)/hr泰式按摩, 唔使貼士唔使加一, 真係沒有唔按的理由! 

Cape Spa @ Cape Panwa Hotel

因為酒店有8折coupon所以去左做, 呢D酒店附設既spa都係賣裝修為主, 我地book左一粒鐘泰按, 雙人私家房間, 先坐在沙發上一對一幫你以浴鹽浸腳, 之後先幫你做泰按, 不過唔知係咪D技師較年輕, 我覺得唔夠小店咁舒服. 一人一小時要花674b (10% sc + 7% VAT)(hkd172), 有點小貴, 同樣價錢在小店可按三次了. 

山腰小店

在超累的拍攝日後, 實在忍唔住要再去泰按. 在叫天不應叫地不聞的cape panwa hotel, 其實行上山路兩旁都有一兩間泰按店的, 不過要行一條好似恩記果條斜路既路, 但都不影響我同肥的決心, 找到了這一間小店, 當時店內沒有一個客人, 價錢都係250b(hkd64)/hr泰式按摩, 即時OK啦! 果然, 這間小店是我按咁多次最舒服的一間, 爆分.

同場加映:

1. 在芭東的按摩店, 很有色情成分, 所以正骨場(尤其這間是在酒吧街上的), 更要清楚表明”NO SEX”.

2. 芭東的fish spa店, po這幅圖的原因, 除了我覺得條女咁樣俾魚叮著很核突之外, 係想同大家講fish spa容易傳播性病, 唔好亂試.

2011 布吉泰好Hea – 泰好住@Cape Panwa Hotel

行程的第二間酒店, 是位於cape Panwa的Cape Panwa Hotel. Cape Panwa位於布吉東南部, 距離旺區Patong有40分鐘車程, 酒店四周沒有任何街街去, 飲食玩樂主要逗留在酒店內. 可幸的是酒店出面還有一兩間泰菜餐廳, 幾檔車仔檔, 一間較貴的便利店, 數間泰按店, 已經足夠三天所需. 

經travelzoo團購book這酒店, 只需$780/天,一般預訂要$2xxx/天. 這裡的住客, 很多是歐美家庭, 而且是年老家庭. 亦有泰國人, 日本人等等, 香港人佷少, 只是咁啱有一對香港夫婦同我地一齊出外島. 

這間酒店是走resort feel路線, 酒店內已經有三間餐廳, 兩間酒吧, 兩個泳池, 一個私人海灘, 還有私家纜車來往lobby及沙灘. 不過我估這酒店都已經很多年了, 感覺有點似康樂園鄉村俱樂部, 除了房間是重新翻新外, 其他設施都很舊了, 但舊是舊, 不過全部都用得, 設備齊全. 

The lobby and hotel

酒店走泰式設計風, lobby亦是以泰式圓拱形的樹屋, 陣陣涼風吹來, 都幾舒服.

酒店分幾橦building沿山而建, 來往lobby至沙灘亦有纜車接駁(10分鐘/班), 不過我的房間步行落沙灘只需3分鐘, 沒有坐纜車的必要, 不過過下隱都好. 

酒店亦有接駁車(10分鐘/班)到山下的姊妹酒店Kantary Bay, 車程3分鐘, 步行亦可, 不過上山落山都幾辛苦, 架車好得意, 由一架貨車改建,好有布吉feel. 

上網 - 是這酒店最弱的一環. 第一晚來到酒店, staff告訴我上網設施壞了, 全間酒店都上唔倒網, 這正是我急需用電腦的時候, WTF. 第二天再到front desk取1天用的上網pw, 只有公眾地方才有免費wifi, 房間沒有, 但個pw廢廢地, 成日自己log out…就算用我電話本身的上網咭, 都收得好慢, load張相等10年咁... 

The Room

房間是新翻新的, 而且是套房, 空間很大, 比起我家更大. 大大的沙發, 兩部LCD電視, 超大的浴室, 有兩個面盤, 一個浴缸, 一個企缸. 床超級大, 左碌右碌都唔會趺落床, 而且非常舒服, 120分! 更有衣帽間, 內有化粧台及衣櫃, 落地玻璃外是超大陽台, 看到椰林樹影, 少少海景. 最開心是獨立宅姑池, 一張雙人day bed, 第一次浸宅姑池, 同肥肥一齊浸好C服啊~ 

而且, 房間內有Ipod的speaker, 可以播放Iphone內的音樂, 很貼心. like.

The Breakfast

早餐的餐廳同樣是open air的, 種類款式同The Nap差唔多, 即煎痷列, 脆卜卜煙肉, Italian sausage, 一杯咖啡, 果汁, 面包. 這裡的餐廳更居高臨下望著Andaman Sea, 陣陣海風吹送, 十分舒服. 早餐+海風+書+咖啡, 陪我度過三個早上. 

The French Restaurant

呢度有一間法國餐廳, 要求smart casual 的dress code, 唔俾著拖鞋同短褲, 心諗使唔使咁大牌呀, 不過間餐廳好靚, 對住個海, 有鋼琴現場伴奏及有人在演唱, 好有feel. 於是我地決定在影相當晚就著得靚D去食下, 

三道菜dinner set 720baht (hkd184), 連埋加一同VAT7%只係hkd217, 超級抵食. 我以為呢D fine dinning無咩人去, 但又唔係喎, 都有5-6枱客人, D鬼佬個個都著番件恤衫長褲黎食. 而我因為keep住朝早影相時的化妝同set頭, 有少少over左. Hehe.

三道菜有龍蝦沙律作頭盤, main course係羊肉, 同樣係好好味, 非常juicy. 另有山楂雪巴, 很開胃, 甜品是椰子pudding, 稍甜. 仲有一杯免費紅酒, 呢一餐好滿足. 

The Bar - the Lighthouse

這裡有幾間bar, 我同肥肥第一晚到酒店便去了The light house裡飲野, 10點半前happy hour全部買一送一, 一杯cocktail 約180baht(hkd46) 仲要買一送一, 咁平又係唔飲唔得. 酒吧走懷舊風格, 有live band唱經典英文歌, 又有飛標(是手動的, 不是電子標), 又有美式桌球, 40baht/局, 我同肥肥都玩左一局. 這裡消遣還不錯.

The Beach

酒店有兩個泳池, 一大一小, 可是我都沒有游過, 因為酒店有一個私人沙灘, 仲點會再游泳池呢, 一定直奔落海啦. 游海灘要配合潮漲, 潮涱時游水較少礁石. 沙灘的沙很幼滑, 水很清. 水深到肩時, 望入水中仍可清楚見到自己的腳趾. 岸上亦有酒店的沙灘椅, 很relax. 三天內我共游了兩次, 還是覺得唔夠皮. 

The Staff

這裡的服務有部份地方有點不到位, 例如房間裡沒有牙刷!? 要我特意打電話到house keeping問才送過來, 而有次執房拿走了沙灘毛巾亦沒有補回. 不過, 在拍攝婚紗相時攝影師想拍攝沙灘旁的餐廳, 但當天是餐廳休息日, 但我打電話到guest relation查詢, 他們即肯為我們開門, 加番不少分數.

2011 布吉泰好Hea – 泰好住@The Nap Patong

行程第一間酒店是在布吉最旺的遊客區Patong的The Nap Patong. 選這間酒店是因為在Patong的位置和型格裝修. 時尚簡約的風格我最like, lobby和餐廳是open air的. Front desk和library room的電腦都用I Mac, 酒店內四處都有高速免費wifi, 酒店員工亦很friendly. 

The Room 

房間以淺藍色為主調, 床很大而且很舒服, 很喜歡有一個很大的balcony, 可惜是房間很靠近泳池, 有點不夠privacy. 廁所雖然只有企缸, 但很大, 特別喜歡它有一個衣帽間的area,把行李全放進去又有全身鏡十分好. 

The Pool 

布吉的酒店其中一個重要的point是泳池. The Nap的泳池在我的房間轉個彎就是, 不過泳池不大, 游兩步就游完, 而且沒有海景, 有點失望. 不過可能住客不多(值得一提的是, 住這裡的住客都以年輕人居多, 與另一間酒店有明顯分別), 或者大家都愛在外溜連, 所以泳池的使用者很少, 我三天內去過三次泳池, 每次都不超過6人在使用. 我愛在泳池消磨時間, 在池邊看書, 睡覺, 十分relax. 

The Breakfast 

早餐是我去旅行的重要point之一. 我盡可能不會miss酒店的早餐, 因為我認為早餐是旅程每天的能量始發點, 滿足的早餐可使我開心一整天. 這裡的早餐在open air的餐廳內, 座椅是sofa, 滿足我同肥肥無腰骨的人. 自助形式的早餐, 我每天必吃的有即煎痷列, 焗到脆卜卜的bacon, sausage, 即烘多士, 新鮮生果, 另有乳酪甜品, 各式cereal. 每天我都帶埋書本到餐廳食早餐(肥肥通常較遲起床, 通常我一個人去食早餐), 吃飽飽後喝杯咖啡看看書, 十分hea. 

The drinks 

酒 - 酒店的酒吧76bar, happy hour的價錢是無敵價, 50baht(HKD12.8)一支啤酒, cocktail 110baht(hkd28), 仲要調得好好飲, 唔飲真係對唔住自己. 可以在泳池邊飲, 又可以在有live band的酒吧飲. 我同肥肥坐在酒吧的巴枱, 一排客人一人一Iphone在手, 看來大家都是steve job的奴隸. 

酒店亦有兩杯免費的welcome drink, 乳酸味飲品很好味, 亦有免費果盤, 很滿意. 

The Food

有一天的晚餐因為下雨了, 不想行出去, 我同肥肥就在酒店的餐廳食晚餐. 這裡的晚餐提供italian and thai food, 忌廉湯, 羊架, 炸春卷大蝦, 蜆肉意粉, 碟碟賣相精緻, 端出來好像藝術品咁, 羊架超級juciy又唔穌, 唯上菜速度稍慢, 但性價比很高, 這一餐才$287,椰林閣價錢, 意大利餐廳享受, 抵食抵食. 

The Location

位於芭東, 但距離酒吧街要步行15分鐘, 夜間走走還可以, 但日間步行很熱有點吃力, 如果近點會更好. 不過距離最愛的emotion spa只在街口, 加分. 肥肥愛夜間活動, 早上睡覺. 我同佢相反, 所以我有兩天都一個人早上到酒店附近閒逛. 早上的芭東, 是另一番景象, 自己行下影下相, 很自由.