半職人妻

2015年4月6日星期一

布吉寇立五日五夜之旅 - Day 3

這天起床便去酒店餐廳食buffet早餐, 餐廳不是很大選擇不算很多但足夠, 有我喜愛的egg session, 在開揚的環境下吃份早餐, 是每次我去泰國旅行最享受的事之一.

吃完早餐肥肥便說要回房補睡, 我就再到泳池游一下, 又在沙灘椅曬下太陽, Wow, 布吉的太陽好舒服啊~難怪咁多老外要曬了. 這間酒店大部份都是外國人入住, 少有亞洲人面孔的.

游完水再泡一泡澡才check out離開

之後我們便要出發到寇立! 由Karon去寇立共要開車兩小時才到, 為了令負責駕駛的肥肥無咁辛苦, 我便安排了在一半路程的Mai Khao一間泰國餐廳午膳, 吃飽再出發!這間餐廳叫Kin Dee Restaurant, 是吃泰菜幾有名的. 就開在一個園林的涼亭下, 放眼下去一篇綠意, 挺舒服的.

炸軟殼蟹, 比想像中細碟, 但味道不錯

吃泰菜怎能不點"公車number"? (即泰文生蝦刺身), 鮮甜味美

吃完午飯便繼續路程開往寇立, 可能我地開得比較慢, 用了差不多1.5小時才到! 所以先到town度報左第二天去外島的Tour, 才到JW Marriott check in. Marriott的位置一點都不近寇立Town, 如果在寇立搭的士去酒店, 要300baht! 而酒店的位置就在一堆落後的民居之中, 開進去時我差點以為自行走錯路!

直至來到酒店的大門, 簡直是柳暗花明又一村, 酒店很有氣派, 感覺好像沙漠裡的皇宮一樣.

check in時的welcome drink, staff的服務很好, 個個都很nice面帶微笑, 對得住5星酒店的招牌.

我們的房間是2030, 位置是近海灘的pool access房型, 打開落地玻璃的露台出面就是貫通全酒店的運河泳池, 可以游到酒店內任何地方, 直接游到pool bar飲一杯也可~

我一早已經send定email到酒店安排結婚周年的arrangement, 酒店送了朱古力蛋糕給我們.

因為天色已晚, 我和肥肥沒有在酒店游水, 反而回到寇立的Town度食晚飯~ 寇立的晚上都有不少餐廳, 按摩店和酒吧, 雖然不能和布吉的規模相比, 但都充夠了. 很喜歡這些泰國的小鎮, 好像上次去清邁的Pai一樣, 小而美.

晚餐我們隨便選了一間意大利菜Pinocchio Italian Restaurant, 蜆肉意粉不錯的. 其他就不過不失.

之後便到按摩店按一個shoulder neck & back, 回到酒店早點休息準備第二天出外島的行程.

布吉寇立五日五夜之旅 - Day 1 -2

晚上23:35的飛機, 我同肥肥九點幾就到機場check in. 沒有付錢俾行李費和劃位費, 貫徹廉航的作風. 慢慢食埋晚飯買定零食就上機了, 準時出發, 仲比原定早左少少落機! 根據經驗, 立即衝去入境counter, 不用等行李的我們很快就步出機場了!

上文提及過我地張Dtac Happy Sim變左unhappy sim, 開通唔倒打唔倒電話俾旅館, 凌晨2時幾機場的商店全關門! 我地勁慘用身上僅餘的5 baht散紙去payphone度希望打電話, 但不知是我們搞不懂泰國區碼定係旅館本身無人聽電話, 用曬5 baht都打唔通....心灰意冷之際竟然有一個information counter仲有人在! 所以我地就拜託她幫我們打電話到旅館, 大約5分鐘後旅館的接送車倒到了.

正打算行上車時, 我大頭蝦掛住影相, 叉錯腳拗左柴, 隻腳勁痛!! 估唔到一到布吉就禍不單行!! 不過到達酒店, 環境比我想像中好, 起碼係好乾淨, 而且亦很新淨. 終於大約四點鐘先可以上床訓覺.

起初以為係炮房格局, 估唔到都好乾淨, 有驚喜!

呢間酒店唔包早餐的, 不過三百蚊一晚無咩所謂啦, 周圍一間便利店都無, 我地10:30am取車後便離開渣車到芭東的Banzaan Market吃海鮮去!

Banzaan Market我2011年去過, 印象海鮮是平靚正的, 可是已經今時唔同往日, 入到街市已經俾內地遊客攻陷左, 啲海鮮檔全部變左sell內地人, 仲多左啲克人憎的呃遊客sales, 人釘人咁sell你買海鮮, 搞到啲海鮮價錢貴曬! 以前個標價係代表1kg,依家變左1市斤(500g)!! 而二樓的加工店由2011年的兩三間, 變左十幾間, 全部都有中文! 以內地人做目標! 而客人幾乎坐滿, 全部都係內地人!! 嗚......已經不再是四年前的Banzaan Market...(哭..) 我知道我以後都不會再來了.

這一餐有龍蝦, 炒蜆, 兩隻肉蟹, 一碟炒通菜, 冬陰公湯, 共hkd700!! 是今個旅程最貴的一餐.

食飽之後便去Big C買手信, 諗住買啲比較hit的零食, 點知又全部都俾強國人掃清光!! 顧客有70%都是內地人, 唉, 真係....

之後便離開芭東開車去Karon, 芭東已經同以前唔同了, 凡是多強國人的地方, 就會變質. 香港如是, 布吉亦如是. 到達Karon, 這裡無芭東咁熱鬧, 但又不失旅遊感, 有旺中帶靜的感覺! 無咁多強國人, 反而多啲外國人! 來到入住的酒店Mandarava Resort , 這間酒店建在山上, 我們住的房是在山上的main pool附近, 有池景得來又有privacy, 房間是在一間間兩層的別墅內, 我的房間是二樓, 樓底較高又有一個L型的兩排大落地窗.

之後便把握時間到泳池游水relax, 又在pool bar enjoy happy hour酒料, 十分舒服. 游完水稍為梳洗一下, 便到Karon的旺區吃晚飯~ 今晚晚飯的餐廳是EAT bar & Grill....

這個燒牛肉是非常好食的, 很林. 肥肥的漢堡也不錯, 來Karon不要錯過這間餐廳, 他們做的西餐真的不錯啊~

肥肥本身打算食完晚飯回到芭東夜蒲一下, 但發現原來Karon的夜生活都不錯, 無芭東咁糜爛, 我地去左Two Chefs坐下聽歌飲野, 她們的live band唱歌真係好好聽, 我同肥肥簡直聽出耳油. 而當日特價的Rum Coke只係79baht (hkd19.2) , 非常抵飲! (肥肥飲左幾杯, 我就不勝酒力, 只飲西瓜汁...) 其實Karon都幾舒服, 有機會應該多留2天 ^^

2015年4月5日星期日

布吉寇立五日五夜之旅 - 總篇

這次是第三次去布吉, 真的很愛泰國這地方! 這次是我同肥肥結婚三周年之旅啊, 而且亦是一些債務還清的重生月! 所以今次就玩豪一點啦!

1. 機票 - 5D5N
去程: 18/3 HKG (23:35) --> Phuket (02:00)
回程: 24/3 Phuket (02:55) --> HKG (07:22)
價錢 : $744/人 (已包稅及燃油附加費)

是航班時間超差的HK Express飛機, 價錢是超平, 但凌晨兩三點到布吉要多付一晚的酒店錢(我不能訓機場啊>.<) 所以其實麻麻地.

2. 行程 : 5D5N
Day 1 : 香港-->布吉-->機場附近酒店訓覺
Day 2 : 取車-->芭東Banzaan Market-->Karon Mandarava Resort -->在Karon晚餐
Day 3 : 離開Karon-->到Mai Khao 午餐-->寇立JW marriott-->寇立晚餐
Day 4 : Tachai Island -->寇立weekend market
Day 5 : Similan Island -->寇立晚餐
Day 6 : 酒店hea到六點-->寇立晚餐-->開車到Mai Khao附近酒吧hea到12點-->機場還車-->香港

今次是第三次去布吉了,想去點新的地方, 所以一心要去較少內地人會去的寇立. 適逢十一月至四月是斯米蘭群島開島季節, 當然要把握機會多去外島感受美麗的海灘!

2. 機場附近住宿 - Sonwa Resort - hkd$311/night
不能訓機場的我要搵一間在機場附近的便宜住宿過一晚, 我無咩要求, 乾乾淨淨就可. 我選這間酒店的原因是因為有免費機場接送(可惜我之前不斷send email給他們也沒有回應, 出發前在香港打電話給他們還是回覆要我們到埗後再打給他們)...抵達後這裡比我想像中好, 房間夠大又非常乾淨, 仲有個露台! 冷氣又靜又強! 作為機場酒店我俾100分!

3. 布吉住宿 - Karon Mandarava Resort - hkd$1273.36/night
訂這裡其實是有點轉折, 因為最初我計劃的行程是先去寇立3日平住, 最後一天才去布吉住貴一點. 二月時見到Travelzoo有做寇立JW Marriott的團購, 為了就團購的使用時間唯有把Karon訂的一晚調前了(因為我訂的是"不可取消"的房間, 更改日期還要打電話到hotels.com才可)

這間酒店是tripadvisor在Karon的第一位啊! 我特意request了近main pool而又privacy的房間, 可是代價是距離酒店門口很遠, 出入要call酒店shuttle接, 這也不打緊, 可是有一次call他們接我出去晚飯時, 在門口呆等了十多分鐘都未到, 再打去時竟說忘記了!!?? 這不是5星酒店的服務吧....

4. 寇立住宿 - JW marriott - hkd$3378/3 night
一路捕住travelzoo的團購優惠, 終於在出發前一個月俾我等倒, 點知佢竟然同我計劃日期差了一天! send email去問等了1天才回覆說不能改, 我專登改了Karon的酒店日子就了他, 但JW回覆我竟然已經full了, 只可以訂較貴的房型pool access.

肥肥就非常滿意這間酒店, 我也是. 可惜的是有兩天我們都出了外島玩, 真正嘆酒店的時間不多.其實酒店內本身的設施已經很多, 足夠你足不出戶享受渡假.

5. 有關外島tour - Andaman Sea Sun Travel
這是在寇立的agent隨便找的, 因他們說這tour是外國人較多,內地人較少. 這是真的, 但最多是德國人, 其次是泰國人. 在船上什至有德國的guide, 講一大輪德文. 而去tachai同similan的船上待遇有點不同, tachai時有雪糕, 小吃, similan只有飲品供應. 而浮潛點比較多不同公司的船, 人較多我覺得一般.

6. 有關租車 - SMC Phuket - 5500baht
因為去的地方較多和徧遠, 租車自駕是必然的. 這間SMC Phuket真是100分!!價錢比起連鎖店平不但只, 老闆Sawat回覆email的速度非常快! 出發前仲有whatsapp我提示見面, 把車子開到酒店取車很方便, 有埋GPS, 車子仲係2014年的, 很新淨! 還車凌晨十二點半在機場, 很好! 誠意推介俾香港人!!

7.有關拍攝
我今次用了山狗和相機影相同拍片, 但山狗忘記關掉循環拍攝, 所以頭兩天的珍貴片段被覆蓋了 (哭....)

8. 有關通訊 - Dtac Happy Sim
因為希望一到埗就要打電話到機場酒店, 所以一早在香港買定7日無限上網的Dtac Happy Sim.怎知買左之後朋友說Note 3使用時上網要手動setting, 朋友更加搞唔掂張咭....所以我出發前都花左啲時間搵手動setting的方法. 點知去到布吉機場, 不只上唔倒網, 連電話都打唔倒!! 簡直是一張unhappy sim, 一路等到早上七時才開通倒!! 所以如果大家搭凌晨機而想落機即用的話, 呢張卡係唔得既.

總使費 : $15020/2人, 平均每人$7505

2015年3月8日星期日

購物的糾結

最近2個月的生活又有了新的玩意~ 喜歡露營、喜歡行山、喜歡用action cam拍片，而且又開始歷時1年的減肥大作戰；喜歡動感單車班、喜歡玩body combat，生活被充充實實地填滿了，很開心被喜歡的事物包圍著，感受生命是滿滿的Energy!

熟識我的朋友或許知道，我對很多新玩意都感到好奇，但有時可能只有三分鐘熱度....所以每當我因為呢啲新興趣而衍生出來的buying list....我就會好糾結喇....

1) Macbook Air/Pro
魔鬼 : 好想用Final Cut Pro或者 I Movie去edit我拍的片呀....呢啲pro既software去剪片出來型好多喎! 而且我依家部notebook的software好唔穩定咁, 成日都會開唔倒某啲software, 又慢左....

天使 : 依家用啲免費的software去剪片都OK呀，有聲有畫咪得lor ! 都係業餘姐，唔使咁pro喎，特登換部機去剪片，又有幾多人識得欣賞呀?

2) Gopro Hero 4
魔鬼 : Gopro拍出來的質素真係好過你部山狗好多喎! 山狗又無防手震、啲白平衡又怪，Gopro拍出來有4K，清好多又定好多! 去旅行你拎部山狗出來，笑死人喇!

天使 : 你買山狗都係貪佢潛水攝影壞左都唔肉赤姐! 幾百蚊貨仔勝在性價比高，俾你過足拍片癮! 而且拍片係講技術同角度的麻，又可以用film edit來彌補片源的不足 (back to pt 1).....先磨練好技術再升級啦!

3) Gregory Deva 60 露營背囊
魔鬼 : 依家個背囊只有35L，露營時有50%的物品都要掛在背囊外面，而且背包設計承重能力較弱，所以只能在有限的地點露營，不能去一些要行一會山的秘境露營啊.....而呢款背囊在香港的登山用品店試背過，質料很好，但要$2980，在Amazon.com連運費到香港只是$2210, 打75折呢.....

天使 : 今年的露營季差不多結束了，要來年尾天氣轉涼才去露營吧~買了新背包出場的機會不多，不如等年尾才買吧!

好糾結啊....黎緊三月中就會去期待已久的布吉之旅，四月又會去台北玩.....可唔可以幫我揀呀??????????

2015年1月7日星期三

新手進階級露營 - 東龍島日出日落露營提案

繼上一次同肥肥兩人初次南山露營後，一直等了又等，期待下一次去露營。期間一直在物色新的campsite, 既要交通不太麻煩，不用背著行李走大遠路；又想有些遠離煩囂的感覺，不要太多人；終於....搵倒東龍島作為今次露營目的地!!

東龍島可由油塘三家村碼碼乘船半小時便到，分官方營地及非官方營地，兩者均要由碼頭步行十五至二十分鐘。官方營地有枱椅等設施，但只有旱廁，而且景觀沒什看頭；而非官方營地則在"假日士多"後的草坪上，270度環迴海景，可以借用士多的廁所和水喉，但缺點是沒有枱椅和遮掩，所以風勢頗大。我當然揀左景觀較靚的非官方營地啦，所以為了這次露營我又添置了些新的裝備，例如一個新的輕便營幕 (取代以前的大大個2秒張開營幕)，一些輕便折疊的露營枱椅，和一盞夠亮又輕便的營燈。

這天天氣不錯，等鐘點姐姐打掃完之後，便開車由家裡出發到油塘三家村碼頭.....一東一西，單是車程已經要45分鐘，在碼頭旁邊的爛地停車場停下後，才知道這裡日泊要$80，夜泊又要$80 (根本沒有網上search的$25日泊這回事).....泊兩日一夜要三百多!! 騎虎難下唯有迫住泊啦，下次分分鐘搭的士或泊街食ticket仲划算。

乘搭三點鐘的船出發到東龍島，乘客不多，只有十人左右，應該大部份都是來露營人士，半小時船程便到達。

天色晴朗, 出發囉~

上岸囉，我的背包只有30L，左右加放了帳幕和天幕，上蓋再放睡袋，手上再拎住食物保溫袋，實在重到叔叔不行鳥!!

碼頭一上就係呢間合全士多，我地要向左邊步行20分鐘到假日士多

20分鐘的路程是要上坡落坡的.....背著沈重的行李真是頗辛苦

攀過山頭終於到了假日士多，由這裡向右直走就是官方營地，而非官方營地就要走進士多由士多的廁所後的小路走過去 (BTW, 這間士多真是十分貼心，為露營人士提供好多補給)

到了營地喇~ 個view真係好靚, 270度環迴海景，對岸是淺水灣哥爾夫球會

之後我地就開始扎營喇，有一對熱心的夫婦教我地可在較厚的草地上扎睡起來會舒服些. 今次呢個營係我第一次扎的，以往一直都是用2秒自動開啟的帳幕，不用花心思扎營，今次為了輕便些便用了新營，但怎麼搞極都搞唔掂!!??

搞下搞下搞到左成個鐘差唔多日落都未搞得掂，隔離營的兩個小伙子好快手就已經扎好自己個營同個天幕，佢地終於忍唔住睇唔過眼，好親切咁問我地使唔使幫手，他三爬兩撥已經扎好我地個營喇.....哎呀.....我地真係好柒呀.....

我個營係粉紅色架，連埋淘宝的椅同枱，十足十好似女仔房咁~~

(肥肥無奈中

)

本身我地都有帶天幕，但扎完個營都快日落了，又要趕及去士多打水，只怕沒有時間再慢慢研究個天幕點扎，唯有放棄天幕了-_-

打完水回到營，休息一會，便開始準備晚餐!

今晚的菜單是醉雞窩加火鍋，滋補暖胃，天寒地凍最啱食!

夜晚個營地真係好大風，幸好我地在營的後面煮食，靠個營擋了風，晚飯後再煲了一杯熱茶，和肥肥一人一杯暖身，兩個人煮下飯仔估唔到煮到十一點幾，食飽飽就訓覺lu~

成晚個營出面都好大風，營入面就算溫暖，加埋個充氣床墊同睡袋，都算訓得可以。

第二朝諗住六點半起身睇日出，起來後便知今次要食白果了....

雲多看不見日出，只有朝霞和大浪拍岸

以為唔多人會起身看日出，點知營地8成人都已起身，我地都決定煮早餐 !

午餐肉係肥肥的強項

炒蛋、公仔麵、昨晚吃剩的丸--->十分豐富的早餐!

100分早餐點少得熱朱古力，調左張椅的角度對住大海飲朱古力，好relax~

食個早餐又花了兩小時，九點左右我地出發去東龍島行下山! 目的地係東龍島暸望台! 由營地出發大約來回1.5小時~

行山過程幾乎完全無人行~~ 我地仲好old school咁邊行邊播譚詠麟的"我愛大自然"來聽^^

暸望台的風景都唔錯，可以望倒市區

順便去沙灘行下

行完山之後回到營地，看看書，看看海，十二點半就收拾，沒想到一收拾就就執左成個鐘!! 一點半先離開營地，勁驚趕唔切兩點鐘船!! 背著沈重的行李都不敢怠慢，急急腳衝去碼頭!! 幸好趕及船期~

回到油塘，去了大本營商場禁錢繳付昂貴的泊車費順便食埋飯，吃個韓燒只是$78任飲任食! 好抵!

飲飽食醉，一個Happy Ending

如果下次再去東龍島，應該要 :

1. 下次唔好泊車在停車場，一係泊街，一係搭的士

2. 可以搭早一班船去、或遲一班船走，咁可以多啲時間休息下，或者放下風箏又得喎~

3. 要帶頭燈 (又要添置新裝備~)

結束今次露營，我同肥肥都好滿足，可以咁充實地親親大自然，並不是如其他人眼中的"有自唔在攞苦黎辛"，難得肥肥都係咁諗 ! 好開心同肥肥一齊發掘倒一個新的共同興趣~

2015年1月1日星期四

2015 keep young & keep energetic~!! 元旦日在大帽山看日出

在2014年完結時，我為2015年訂下了新的目標，看到身邊的朋友都在來年也有新的方向，我也決不能讓自己"企左喺度", 無論是好是壞，Life must go on! 重要的是自己的心態!

下班的時候，在回家的車上看到大帽山的山頂，那個圓形的"Major Tom" (是氣象設施，因"那夜凌晨"的電影得了另一叫法)，才發覺今天的天色十分晴朗，反正每年的倒數活動都沒什新意，倒不如踩上大帽山看2015年第一道日出吧!

我看日出的經驗不多, 成功的經驗只有鳯凰山和10年前的泰山，失敗的經驗較多(例如兩次去台灣阿里山、峨眉山...), 也知道日出的成功率很視乎天氣，難得天朗氣清的元旦日，就去碰碰運氣吧!

除夕夜當晚我和肥肥只是落了樓下食雞煲，之後草草看了電視倒數後便早點睡覺。凌晨三點半爬起床，收拾簡單的行裝，大約4點便出門去! 車子在沒車的屯門公路向荃灣開去，路上只有零星的車，的確有點"那夜凌晨"的感覺! 開到荃錦公路，漸漸發現迎頭有很多吉的士，想必是很多人搭的士到大帽山吧! 車子過了大帽山郊野公園遊客中心，開始轉入一條單程的上山車道，沿途盡是步行上山觀日的人，由於閘口前的停車坪應該爆滿了，我們就在閘口前少少的位置把車子停下，免得在單程路的盡頭阻塞著。

一件厚褸、一頂冷帽、一雙手套、一條頸巾、一個手電筒和一個暖水壺，靠著這六樣寶貝我和肥肥就一步一步行上山。氣溫可能只有5度，加上強勁的風，我和肥肥行山的經驗很少，只可以極緩慢的步速行上山，即使周遭的人一個又一個超越我們。風很大，路很斜，我和肥肥也不多說話，只是默默地行，這令我想起十年前我也是這樣登上泰山吧!

一般人行30-45分鐘的路程，我和肥行了個幾鐘才到。山上看回香港的夜景，萬家燈火，寧靜而又漂亮。