2014 海洋公園哈囉喂優先玩小攻略

早前透過飲四罐四洲咖啡參加抽獎，"幸運地"抽中了9月18日的海洋公園園哈囉喂的門票，這是比公開發售更早玩的企業包場時段，換言之亦是小眾的參加者可以免受排隊的痛苦兼享頭啖湯率先試玩^^ 梗係第一時間請假去玩啦~

由於是企業包場時段，鬼屋五點才開放，我大約4時多到達海洋公園，此時公園內遊人仍是很多。雖然有不少"嘩鬼"在園內供遊人拍照，但始終天未黑還是沒太大氣氛吧~~先了解地形再說！

位於海洋公園正門"海濱樂園"的鬼屋設施:

1. 奧屍卡製片廠 (驚嚇度 : ★★★★)

2. 多啦A夢哈囉喂派對  (合家歡類別)

3. 地獄群魔翻叮騷 (合家歡類別)

位於大樹灣"高峰樂園"的鬼屋設施:

1. 彊屍LIVE  (驚嚇度 : ★★★★★)

2. 森靈慌塚   (驚嚇度 : ★★★★)

3. 萬壽終醫館  (驚嚇度 : ★★★★)

4. 東瀛魔界遊 (合家歡類別)

5. H14  (驚嚇度 : ★★★★★★)

我的小心得是 : 先玩"高峰樂園"的鬼屋設施，再玩"海濱樂園"的鬼屋設施，可避開人流.

路線圖是 : H14(需預先登記) --> 森靈慌塚-->彊屍LIVE-->東瀛魔界遊-->萬壽終醫館-->奧屍卡製片廠-->地獄群魔翻叮騷-->多啦A夢哈囉喂派對

在乘纜車前剛好遇到表演

在動感天地定時有嘩鬼巡遊，很佩服他們烈日當空下還跳得這麼賣力

一上山我就立即衝往H14，但原來要先向主辦單位登記才可進入，很失望啊.....唯有轉往另一個鬼屋....

森靈慌塚   (驚嚇度 : ★★★★) - 以中國古代鬼故做題材的鬼屋，是我第一個挑戰的鬼屋，亦是他們當天第一個客人，我亦剛好排在最前的位置....可能我都未warm up, 所以覺得好鬼驚呀.....推薦度★★★★

鍾馗

看到這疆屍，代表我要挑戰第二個鬼屋- 彊屍 LIVE

 彊屍LIVE  (驚嚇度 : ★★★★★) - 以JUNO執導的電影為題材，呈現電影內的主要場境，屋邨鬼好貼身的題材，真係好好玩，推薦度★★★★★

真係周圍灑溪錢的婆婆

電鋸人，把鋸仲會發聲

東瀛魔界遊 (合家歡類別) - 很"光猛"的鬼屋，沒有驚嚇的元素，志在可以周圍影下相

推薦度★★

長頸鬼

終於入黑了~~~鬼怪的氣氛來了~~

萬壽終醫館  (驚嚇度 : ★★★★) - 以人體內臟作主題，但我覺得一般.

推薦度★★★★

園內消費很高，一枝水索價$25，如不打算進入餐廳晚飯，推薦動感天地的"動感美食廊"，可以自攜小食亭的食物入內進食，重點是....有 ! 冷 ! 氣 !! .......你懂的~

動感天地的火把演出

之後便回到正門一面，一出海洋列車就見倒這個.....

奧屍卡製片廠 (驚嚇度 : ★★★★) - 這個鬼屋每人都會手持一枝熒光棒入內，有一段路還要趴低行，而且仲有隱藏式鏡頭拍攝各位的驚嚇樣，出到鬼屋即時可睇番playback, 幾過癮~

推薦度★★★★★

 地獄群魔翻叮騷 (合家歡類別) - 以一些流行的港式笑話來做題材的歌舞show, 沒有驚嚇成分，表演時有些烟火效果還不錯看~推薦度★★★

多啦A夢哈囉喂派對  (合家歡類別) - 這基本上是俾小朋友玩的展館，不過真正的小朋友可能唔識邊個係叮噹, 可能都係俾我地呢D大細路玩的^^

推薦度★★★

今次除左H14之外，可以玩曬所有鬼屋，而基本上唔多洗排隊，每次只需排15分鐘左右便可進入。而入夜後園內的內地遊客都離開了，得番小眾的香港人，真係玩得特別盡興!!! 臨走時更參觀了沒有遊人的海洋館，在寧靜的魚缸前發呆，是這晚的小Bonus.

{家中居酒屋} - 氣炸雞軟骨

宵夜時分，一碟炸物配一罐啤酒，幾嘆~近排好多劣質油的新聞，防不勝防，出街食不如在屋企煮更安全啦! 而這道氣炸雞軟骨根本完全唔使用油! 氣炸過程中更加會把食物中過多的油份迫出，感覺更加健康! 吃起來同樣有脆卜卜的口感, 超好下酒，肥肥說這個有100分呢!

材料:

雞軟骨  1包

調味 :

少許鹽、胡椒粉、米酒1/2湯匙

生粉 3大茶匙

做法:

1. 雞軟骨用少許鹽、胡椒粉、米酒1/2湯匙醃一會。

2. 炸之前下生粉 3大茶匙拌勻，使每粒雞軟骨都沾上生粉，放入氣炸機以200度炸13-15分鐘(中途可取出翻一翻)即可。

炸雞軟骨配啤酒，正呀

同場加映 :

今晚的晚餐是由肥肥一手一腳由買到煮的泰式喇沙麵。

超大碗

{點心時間} - 沒有蟹籽的燒賣小王子

去茶樓飲茶時很喜歡食燒賣，但我其實不知道燒賣是由什麼組成。在偶然的機會看見燒賣的食譜，原來其實不難，只要買齊材料也不用什麼特別的工具，包燒賣的手法也是在youtube學的，剛好今天到元朗合益街市，在一些傳統的麵舖買到燒賣皮，順道在街市買埋蝦滑、墨魚滑和攪碎豬肉，可惜沒有買蟹籽(因為買唔倒咁少分量的蟹籽)，而且燒賣皮是小size的(即魚蓉燒賣的大小)，所以唔算係燒賣皇，頂多可以叫"燒賣小王子" ! 

材料 (份量是22粒小燒賣)

燒賣皮       4兩 

蝦滑           50克 

墨魚滑       4兩

豬肉(攪碎) 70克

麻油 1/3湯匙

胡椒粉  適量

做法:

1.  蝦滑和墨魚滑可在淡水魚檔買倒，已經調好味的。把蝦滑和墨魚滑撻一撻，可排走空氣。加入豬肉混合；下胡椒粉和麻油拌勻。

2. 開始包燒賣，我是參考youtube的方法 (http://youtu.be/usbIDw_kmzo) , 用一枝濕水的鐵湯更作為工具，濕水可以避免痴走餡料。包好的燒賣放進一個搽左油的盤子內，每粒燒賣上放蟹籽(我沒有)，大火蒸15分鐘即成。

進爐前 (第1次包燒賣難免有幾隻有D樣衰，但出黎都見得下人架!! )

氣炸乳鴿 (附食譜)

近來很流行的Air Fryer 氣炸機, 其實早已被我娘家玩厭了, 眼見近來很多人分享氣炸機食譜, 便從娘家借來呢件"新"玩具, 自己也在家裡氣炸一番~

這個氣炸鍋，烹調原理跟光波爐相似，都是用強力熱風把食物燒熟。食物表面掃上食用油以後，再用熱風加熱，可令食物表面有油炸效果。所以不像傳統炸鍋，要用很多油，感覺健康很多。

而且煮食過程中，食物被密封在氣鍋之中，熱風又在爐內循環再用，因此不會釋放油煙，是清潔煮食的新技術。而且廚房亦不會很熱很多油煙，夏天煮食都不怕，而清洗亦算是方便。

上星期已經第一次試炸薯條，十五分鐘就有新鮮炸薯條食，好Amazing. 今個星期決定試做D特別野，一樣從來無諗過喺屋企可以自已煮既野 -- 炸乳鴿. 

材料:

急凍乳鴿  2隻

汁料:

水 3杯

薑、蔥 適量

八角 5粒

桂皮 4片

花椒 1茶匙

老抽 1/2杯

生抽  1杯

冰糖 1 - 1.5湯匙

酒 少許

做法:

1. 先把乳鴿解凍洗淨，把頭、爪切掉。

2. 煮滾汁料，把乳鴿放入煮滾，轉小火煮10分鐘 (其間中途把乳鴿翻轉一下務求均衡上色)，然後熄火焗30分鐘。

2. 取出風乾1小時。我用土炮風乾法，準備一個焗盤，一個焗架和一個蒸架，把焗架放在焗盤上，然後把蒸架反轉，把乳鴿插進去，這樣乳鴿便可凌空 "站"起來。

簡易土炮風乾法

3. 用氣炸鍋180度焗15分鐘便可。 (我覺得下次可以試焗10分鐘，或者用錫紙包住D手腳位以免炸焦)

一次過啱啱好可放兩隻

吃的時候配埋淮鹽風味更佳。在家可以吃到新鮮炸乳鴿的感覺真係好Amazing~ 不過凍肉舖一隻急凍乳鴿賣$30, 好像同出面街買一隻炸乳鴿差唔多價錢.....不過呢個唔用油炸的，健康一點!好味啊~

簡易甜酸齋自己做 (附食譜)

屋企樓下的小食店總是放著一盤盤的甜酸齋，我最喜歡吃的就是甜酸齋和齋腎，貪佢酸酸甜甜的味道；原來自己屋企也可以做，而且十分簡單，雖然糖份高少少，但係夏天食真係又清涼又開胃~作為派對食品也很好!

材料:

麵筋 1斤 (可在豆腐舖或齋檔找到)

汁料 :

茄汁  1枝

白砂糖   3/4杯

醋  半杯

水  2杯

鹽  1茶匙

做法 :

1. 先把麵筋飛水備用。

2. 把汁料煮滾，加入已飛水的麵筋拌勻，再滾起後熄火待涼便完成。我把酸齋連汁放入雪櫃雪一晚，隔天吃更入味~凍食亦很開胃!

{抓住暑假的尾巴} - 2014 虎門美思威爾頓美食之旅團 (超多圖)

八月份工作真的很忙, 很想從繁忙工作中休息一下, 無奈假期又要保留俾之後的長旅行, 只可選擇周末小旅行。這次我第一次參加美食之旅的旅行團, 亦是我十幾年第一次跟團, 平衡過各項因素，包括車程、酒店、天氣、性價比，我選了美食之旅兩天團當中最貴的一團 - 虎門美思威爾頓酒店 (周末價 : $799/人) ，算是給自已小奢華的獎勵吧~

集合時間是上午10時於深圳灣口岸，我同肥肥怕遲到特意提前十五分鐘到達，怎料接團導遊竟然遲到25分鐘!!?? 有無搞錯!! 原來深圳灣是最後的接團關口，在羅湖和皇崗好像塞車了，唉!!

這天天氣好熱啊....過關的人又多, 等了40分鐘真不易過

幸好上了車後車上空調強勁, 又有免費派水, 車廂都幾新淨, 算是不錯. 車程大約40分鐘, 到了第一個"景點" - 長安公園...呢個公園真係仲頹過大埔海濱公園, 仲要係三十幾度烈日當空, 真係除左去廁所之外都唔知做咩好, 好難得先搵倒個樹蔭下的長椅坐下傾陣計, 半小時就立即跳上車涼冷氣.....

長安公園要爬二百幾級樓梯先去到塔底, 而個塔又維修中, 全團都無人行上去.

之後就去食午餐, 我同肥肥被編做 " 5 號家庭" , 被安排同另外4對二人家庭一張枱食飯. 同行都有6-7對兩公婆同團. 同D陌生人同枱食飯未免有點尷尬, 大家都好客氣咁. 食物方面是普普通通的小菜, 但都有燒鵝同白切雞, 雖然大家都把食物吃光 , 但份量都足夠啱啱好.

團餐味道是港式風味

食飽飯又跳番上車, 大約30分鐘後又到左另一個景點 - 海月岩. 又是行公園的免門票景點, 不過呢個公園好D, 有個湖, 湖邊樹蔭下又有長椅, 食飽散下步吹下涼風都幾舒服, 難怪D當地人都在長椅上午睡......

唔知咩廟, 聽導遊講求姻緣幾靈, 見倒咁多級樓梯都無咩意欲行上去

湖邊吹吹風, 感覺有D似Fremont的Lake Elizabeth

在這景點又Hea了半小時, 上車就出發到酒店. 大約3點半到達酒店. 酒店位於虎門的旺點, 行街街食宵夜都很方便. 酒店是全虎門最高的建築物, 樓高62層, 是虎門具標誌性的建築.

入到去間酒店, 就好似同出面既老百姓兩個世界咁

check in 大堂在10樓, 我地成團人就坐在大堂酒吧等候分配房間

似乎有提供High tea

我地分配到31樓的房間, 早在報名時已要求要大床房, 果然順利安排到. 房間很大, 大過我屋企.酒店的設計很modern, 亦是5星級的級數, 有d似朗豪酒店.

舒適的King Size大床

另一邊有沙發徧廳

有衣帽間、淋浴間和浴缸，雖然浴缸唔係對住個窗, 但中間有玻璃可望倒床，而且仲部小電視在浴缸前, 可以一邊浸浴一邊睇電視。

之後我地就去左酒店的泳池游水，得10個人左右游水, 唔多人，好自在!

大陸星級酒店的泳池要求男士要穿緊身泳褲同帶泳帽，肥肥為左搵呢兩樣野都幾頭痕. 泳池是玻璃天幕的，不用擔心天氣，呢個亦係我揀呢間酒店既原因之一。

更衣室十分乾淨，似高級會所，有埋桑拿房，男仔果邊仲有Jacuzzi.

游完水肚仔餓了，便去61樓食自助晚餐。導遊特意為我地安排左窗邊的二人位撐枱腳 (之前又話有機會要同其他團友拼枱)，居高臨下，日落時分，個view好正.

自助餐的選擇和質素都唔差，似香港大約400蚊左右的水平. 有生蠔、三文魚，都幾新鮮. 但其他凍海鮮就普普通通.

燒蠔啊~很具大陸特色，多蒜蓉，I like it ~

鐵板燒 - 有燒小黃魚，又有燒羊扒同牛柳，好味道

仲有啤酒任飲，肥肥最開心

生蠔同Haggen-Dazs , 我地都食得好滿意同開心

食飽飽，回到房間休息一會，本想去9樓沐足，點知居然full booking，唯有去大堂吧飲杯免費贈飲的飲料. 怎知我眼花看錯，竟然只是"軟飲料" (soft drinks), 一心諗住去飲cocktail的我未免安點失望....於是同肥肥落左街四周逛逛，出面的世界同酒店內真係好似皇宮同民間的分別咁，又買了點夜宵，回房浸浴後再吃.

雖然這一晚訓得好舒服，但係我地8點鐘就起左身，想在食早餐前再游一次水 ! 游完水後沖身換好衫準備離開更衣室時，點知俾我見倒一個中年女人在更衣室的淋浴間小便，仲要無關門!!! OMG !!!! 個馬桶就係間離又乾淨又無人用，點解唔o係馬桶小便 !!!???? 

早餐同樣在61樓的餐廳, 我地選了在另一邊看別的風景。今天天氣很好，可以看到很遠的地方，很relax.

早餐的選擇都很多, 又有即煎奄列同waffle.

天氣很好，可以看得很遠.

臨走前再浸多一次浴，好舒服. 11點半check out , 大約1小時車程便回到深圳午餐....點知去到深圳時個旅遊巴司機居然唔識路 !!?? 搞左半個鐘先到達午餐地點，是吃粥底火鍋的"母米粥".

起初我還擔心要同陌生團友一齊吃火鍋都幾尷尬, 但原來這間餐廳的粥底火鍋係唔使自已灼，有服務員代勞，就好似去飲咁有待應分好菜.....原來吃粥底火鍋下配料的次序都幾講究架，要先下海鮮類(魚片、蜆仔)，食完再下肉類 (雞、肉丸)，最後再加菜絲，成為了一份鮮味的雞肉丸粥~

行程來到這裡基本上已到達尾聲，下一個景點是深圳博物館，我同肥肥都無咩興趣，剛好博物館位置在福田口岸附近，我同肥肥便先離團了 (其餘有2/3的團友食完午餐就閃左人). 我同肥肥都幾滿意呢個團，尤其適合一家人去參加。大約5點左右回到家中，時間都幾鬆動的 ^^