窮遊世界 - 復活廈門 2014 Fighting之旅 - Day 1

出發日是復活節假期的第二天, 約好了其他朋友一起在旺角太子搭環島旅運的直通巴出
發, 我地買的是10點發車的班次. 原來不是用大巴直達, 而是到深圳灣後再轉細車的.

過關的關口是深圳灣, 對於我住屯門來說其實都幾轉折, 不過多人出遊最怕一個半個遲
到的, 所以約埋一齊出發都有好處, 幸好大家都是很準時的.

在深圳灣口岸其實都有一兩間兌換店同電話卡店, 可以順便買埋, 我覺得自己在香港
7-11買左一咭兩號電話卡其實蠢左….

過關後原來我地唔係搭番之前架大巴, 而是一架11人的面包車, 坐滿人就開車, 其實都
有D迫…..大約30-40分鐘左右就到達深圳北站了.

大約11:40我地就到左深圳北站, 比原先預計要2個半小時早得多, 而且我地架火車是
14:55發車, 有足足3小時的時間呆了….

不過大陸既野都係唔好咁老定, 因為我地在網上訂的火車票, 要經出票窗口人工憑回鄉
咭出票才可入閘.

人龍都幾長, 一排出票窗口只開了兩個櫃台…. 排隊…. 等…等…等

排隊中 - "借貸賺大錢  連鎖成富豪"是什麼口號呀??


估佢唔倒, 居然等左40分鐘 !! 經我地觀察, 幾乎每一個排隊人士都與售票員拉扯5分
鐘以上 ! 對話內容圍繞著有票、無票、有座、無座等等，對話中途又加插無數個打尖
的人….唉…..

終於輪到我地, 居然遇上阻濟! 原來我們其中1人Y小姐的登記姓名用了繁體字, 而回鄉咭上
的名字是簡體字, 售票員居然以這個理由不予出票!

面對這等事, 我地只好頓出 “Fighting” 的黑嘴臉 (背對多個想中途打尖的人), 但
只換來”入閘時再向工作人員查詢”這答案….

這是大陸文化, 各人只按自己的本子辦事, 他們的Flexibility=0.

(btw, Y小姐在廈門回程時再嘗試在廈門那邊的窗口出票, 好簡單就出倒, 所以真係想打柒個售票員)

取完票, 便入了車站內的”真功夫”食個蒸飯套餐, 不便宜啊, 一個套餐要RMB38,

食飽飽, 朋友買埋”周黑鴨”的鴨舌同鴨翅上車食, 之後再在大堂玩下遊戲消磨1小時,

發車前15分鐘開始檢票…. 有票的可從閘口插票入閘, 出唔倒票的朋友就在”人工入
口”找到”工作人員”, 那人只是輕輕望了一下就俾朋友入閘了! 異常簡單….

登上列車, 對號入座, 車箱很新淨, 每卡車都有廁所, 而大部份的乘客都算清潔, 不會
有隨地掉瓜子殼的情況.

站票的人不多, 一卡都是5-8個左右, 途中有售賣飲料小吃的, 一樽水才2蚊, 仲平過深
圳北站的便利店.

聽聽歌, 看看手機內的電影, 雖然最高速度只有206km, 但三小時的路程都算容易打發. 到左廈門北站, 出閘後就打俾早就預約好的面包車司機, 我地5個人坐架8人座的車, 寬敞又舒服. 40分鐘左右到達曾厝垵. 下車後感覺同一路過來的氣氛好唔同啊, 星期六的曾厝垵好有夜市feel, 一路行入旅館的路上驚喜源源不絕, 小路兩旁開滿夜市般的小吃店, 小酒吧, 精品店等, 好熱鬧啊!

到了旅館 - 垵垵的花園, 打算先放下行李再出去晚飯. 我訂的是家庭套房, 是位於三樓, 三樓有一個小徧廳, 右邊就是家庭套房, 內有兩間房, 一間是雙人床附小陽台, 另一間是榻床. 朋友Y小姐就睡榻床那邊, 怎料一開燈.....居然看見 有 蟑 螂  !!! 太嚇人了! 立即召喚旅館的人攪掂佢....看著他殺掉了三隻大中小蟑螂.....雖然立即放了滅虫芯片....但係都心有餘悸....

安頓了後, 便出去有名的"亞尖大排檔"晚餐, 大排檔格局, 我地5人就坐門口那張枱, 點了醬油水鮑魚、墨魚丸湯、銀魚抱蛋、海苔角、香蘭雞, 特別出色的是海苔角, 用紫菜包住肉末炸香, 好好味, 墨魚丸湯清清地幾有嚼口, 5人食左二百蚊左右.

前面是香蘭雞 (味道麻麻), 後面果碟海苔角才是亮點

醬油水鮑魚(rmb60)味道都可以, 但鮑魚size就細左d

食完飯雖然仲好鮑, 但都急不及待要周圍遊覽一下, 呢度愈夜愈精彩, D舖頭一般都開到十一點左右, 逛下小店又買下宵夜~

 "吃奶請搖鈴" 這間是一間賣酸奶、奶茶的店, 成廿蚊一杯奶茶, 貴左啲



"蠔不魷魚" 又玩食字, 食蒜蓉燒蠔等海鮮小炒

青芒果 - 可以用支付宝、全國包郵、可刷卡

海蠣煎, 即係蠔餅, 台灣人叫蚵仔煎

又一間"慢遞"店, 好多人鍾意寫明信片寄俾未來既自己

陳罐西 - 又係食字, 用普通話就是"陳冠希"

"張伯芝華仕清吧" - 呢個食字玩得很爛, 就好似高登仔改果D"一死以謝天華"一樣

估唔到呢到有個"台灣觀光夜市", 單看招牌真係以為去埋台灣, 但其實入面咩都無.

回到旅館, 差唔多十二點了, 買左少少宵夜, 我地就在旅館的小偏廳度食宵夜, 沖個涼就休息了. 這裡的廁所雖然唔係乾濕分離, 但都好乾淨, 而且熱水夠猛夠熱, 唔錯...

窮遊世界 - 復活廈門 2014 Fighting之旅 - 總篇

這次廈門之旅一心諗住襯復活節放假加上高鐵票都幾抵諗住平玩而速成的，其實早在兩三年前我已經想去鼓浪嶼, 聽說這裡很有"小資"感, 應該是那些文藝青年消磨時光的地方吧 ! 早知道這裡是要用慢調子去感受的地方, 所以這次的行程都沒有編排趕景點的行程.

查看廈門旅遊攻略, 廈門的景點中我只挑了兩個 - 曾厝垵和鼓浪嶼, 鼓浪嶼也沒有去任何景點, 只是看看海, 逛逛街. 而其他廈門景點我興趣不大, 像南普佗寺、廈門大學等, 總是覺得把大學當景點好怪.

1. 行程 (4D3N)

Day 1 : 旺角--> 深圳北站-->廈門北站-->曾厝垵

Day 2-3 : 鼓浪嶼

Day 4 : 鼓浪嶼-->廈門小眼鏡海鮮大排檔-->廈門北站-->深圳北-->香港

人數: 5人 (3人於第3天回程)

2. 火車票

深廈高鐵於2013年底開通, 雖然最高時速只有206km, 全程大約三個小時. 車內十分新淨又乾淨.

去程: 19/4 深圳北 (14:55) --> 廈門北 (18:42)

回程: 22/4 廈門北 (14:50)-->深圳北 (18:42)
價錢 : rmb 301/人 (二等座)



有關購買火車票詳情可參看 : 香港人購買深廈高鐵初體驗篇及搶票攻略

3. 有關交通
從香港前往深圳北站, 可購買環島旅運 (參看連結 )的直通巴車票. 香港各點都可出發, 出發時間視乎地區. HKD$80/人. 大約兩小時可到.
而其實如果你住新界區, 由深圳灣搭的士到北站約rmb 50, 半小時可到, 如果截到車的話其實更划算.
當然你也可以搭地鐵由羅湖或福田到深圳北站, 時間較長又要轉線. 背著大包細包挺麻煩的..

從廈門北站前往曾厝垵 : 乘的士大約rmb 120/車, 大陸的士只可載4人, 所以5人以上要分兩架車. 看攻略時聽聞廈門北站"黑的"不打標等情況都幾多, 所以我早在淘寶網上預約了司機, 8座位的商務面包車都幾舒服, 司機都算準時, rmb 190/單程, 5人或以上推薦使用. (參看淘寶網連結), 車程約40分鐘. (如果搭巴士要2小時....)

廈門市內搭的士, 要當心在旅遊景點前等客的的士, 本人親身中伏搭左"黑的". 所以如果你上左架的士而司機的駕駛証刻意遮蓋住的話, 千萬要當心, 最好不要乘坐.
幸好最後遇上好心的後生仔司機, 人很好又老實....有需要可留言索取手機號.

4. 有關住宿
曾厝垵住宿 - 垵垵的花園旅館 (大床房周未價 : rmb 210 ; 家庭套房周未價 : rmb 310)
於藝龍網預訂(www.elong.cn) , 藝龍網就像大陸版的booking.com, 預訂時只需用信用卡凍結信用額, 房費於到達時才於前台支付, 十分方便. 而且於入住1天前仍可取消房間(不收手續費), 加上有香港查詢電話 (普通話), 推介使用.
至於旅館方面硬件尚待改善. 要求不高可以入住.

鼓浪嶼住宿- 紅堂生活旅館 (205房大床房 : rmb 498, 303雙床房 rmb698 + rmb 80加1人)
鼓浪嶼上的住宿比廈門較貴, 這間是於淘宝網預訂的(因為旅館沒有把我想要的房型放到藝龍網), 個人認為205大床房的性價比較高, 很喜歡這間旅館, 推薦入住.

5. 有關鴨屎 (Apps) 及 旅游攻略
現在大陸旅行很方便啦, 只要裝幾個Apps就 "一機在手, 天下我有"
1. 螞蜂窩 (http://www.mafengwo.cn/)  - 有齊超詳盡旅游攻略, 圖文並茂, 資料多到你看不完.
2. 百度地圖 (http://map.baidu.com/) - 大陸版google map, 有手機版可下載 (不過好像play store裡沒有), 超強大的Apps, 有離線地圖可下載, 超級極力推薦使用.
3. 大眾點評網 (http://www.dianping.com) - 大陸版openrice, 想知附近有咩餐廳推介一目了然, 有需要仲可以即時團購.
4. QQ - 大陸人人都有QQ, 開番個QQ可以方便和旅館聯絡
5. 擔心在大陸上唔倒facebook無得即時分享? 以前翻牆好麻煩又要付費又要搭來搭去, 依家手機裝個Apps就得! 自已search keywords "VPN" 有多個翻牆工具下載使用.

6. 總使費(4D3N) = rmb 2096/人

美甲分享 - 春日小蛋黃

5天長假期開始了，一抹淡黃為長假期掀開序幕，主題是春天的小蛋黃，用漸變淡黃營造春日感覺。

香港人購買深廈高鐵初體驗篇及搶票攻略

啱啱先去完泰國，又被人撩起復活節假期旅行，呢個港人其中一個最旺旅行檔期，出國的話機票貴到飛起....想平玩的話，火車遊大陸確是好選擇。

回想起當年我都會在復活節平遊大陸, 廣西、丹霞山等等，上年啱啱開通左深廈高鐵，搭高鐵由深圳到廈門只係三個多小時，火車票二等座都係Rmb 150, 來回三舊水，機票最平都千幾人仔，絶對是復活平玩的好選擇!

相信同我一樣諗法的人實在太多，復活節期間高鐵票簡直係一票難求. 以下是一些小資料, 方便一下有興趣購買的人:

香港人如何購買深廈高鐵票 :
1) 直接於大陸火車站窗口排隊 (不建議) - 親身購買火車票，最早可預售18日的車票. 如果你不是住在大陸，可能要分兩日上去買(因為往返不同日子啊). 而且內地買火車票依家要實名認證，即係你要提供埋同行親友的回鄉証上去買，十分麻煩。 而且網上購票比直接購票早2天開售，假設大家都係share同一個票源(未經查證)，咁好可能一早已經比人搶曬票。

2) 於中旅社代出票 (不建議) - 中旅社同樣有代購大陸火車票，可直接出票，不過同樣最早可預售18日的車票，假設大家都係share同一個票源(未經查證)，咁好可能一早已經比網上的人搶曬票。

3) 於 中國客戶鐵路服務中心網站 - www.12306.cn 網上購買 ( 無奈地建議) - 這是內地鐵路局官方網站, 最早可預售20日的車票 , 接受港人購買, 但一次只可買4張, 只可用內地信用卡或支付宝付款. (此網站是非常多人會在開售時搶票，即使你坐定定在電腦前買票，也是一票難求，大陸有人專門研究各種搶票軟件，日新月異)

4) 於內地旅行社代購 - search淘寶網會搵倒一些代購高鐵票的旅行社, 他們除了安排代購高鐵票, 亦有辦法買到中轉票，即可能轉一次車，總車程比直達多半小時左右, 聽起來的確是買不到票時的2nd choice. 不過他們會針對港人收rmb 50元的手續費, 如購買他們自由行套票就可免手續費. 本人未親身試過, 大陸黃牛票假票情況屢見不鮮, 請自行衡量.

上述方法各有利弊，遇上客運高峰期(復活節) 都係要第一日開售時立即搶票, 先買去程, 過兩日再買回程, 所以是豁出去的決定啊 !!!  我選擇了在- www.12306.cn 網上購買，以下是一些網上購票小貼士 :

1) 先註冊帳戶，並向同行親友先索取回鄉証姓名及號碼，把他們的名字及回鄉証號碼先加入到 "常用聯絡人"內。同一日最多可買4張票，如有超過4名親友，就要開多個account. (留意 : 如回鄉証的名字是用簡體字，必須於登記時用簡體字啊! )

2) 付款方式 - 如果你有大陸信用卡/中銀信用卡 (不確定是否要內地發行的) 可以使用，另外有支付宝也可使用，所以要預先充值支付宝 (建議先以一等座等票價充值, 購買時可靈活使用).本人使用vvcity充值支付宝 (http://www.vvcity.com/)

3) 到左開售當日，深廈高鐵係上午11點開始發售20天後的車票，如果要購買復活節車票，就要11點坐正在電腦前準備啦 !善用"自動查詢"功能及"更多選項"功能可以更快搶到票。"自動查詢" 可以5秒自動刷新一次，"更多選項" 可以自動送出訂票內容及指定時間車次，更快搶票



善用"自動查詢"功能及"更多選項"功能

3) 開售時搶不到票嗎? . 因為同一時間在搶票的人很多, 有時即使餘票顯示還有票，當你按進去時已經被人搶走了. 但不用灰心. 因為預訂左票之後有45分鐘時間你去完成付款，45分鐘內不付款，票便會再free出來. 所以不同時間都有些人之前hold左票又free番出來的, 可以等一下再碰碰運氣.。 (親身經驗 : 我由早上11點等到下午4點才"浮" D 飛出來"

全部票都賣光的情況

4)如果真都咁不幸，都係搶唔倒票，如果唔介意車程一半時間要企，可以試下買到中途站的票。例如原先要買由廈門-->深圳的票，但理想時間賣光，可以試下search廈門-->潮汕的票，因為"潮汕"站其實係廈門-->深圳的中途站，只要你有辦法登上果班車,，根據高鐵條例在火車可以乘載倒的情況下係唔可以趕你落車既，所以你只要一上車20分鐘內向乘務員進行補票及交手續費就可以繼續坐到終點站. 咁當然啦, 去到潮汕站如果有人憑票要坐你個位你就要站起來了.

5) 最溫馨的提示 : 最好都係唔好在客運高峰期去廈門啦，好似今次我都係請多一日假才回來，時間又好又可以坐足全程, 不然只剩下10am就要回程的車票了.

而且最好兩三個人同行係比較易買飛.

祝大家旅途愉快 !

延伸閱讀 - 窮遊世界 - 復活廈門 2014 Fighting之旅
窮遊世界 - 復活廈門 2014 Fighting之旅 - 總篇
窮遊世界 - 復活廈門 2014 Fighting之旅 - Day 1
窮遊世界 - 復活廈門 2014 Fighting之旅 - Day 3-4

清明齊踏青 - 沒有紅葉的大棠

成個星期都落大雨，只有今天星期六就天朗氣清。唔想浪費左咁好既天氣，決定去郊外踏青去! 肥肥提議去大棠, 我諗住唔係紅葉季, 應該無咁多人, 動身就出發!

本身諗住二人一狗輕身走我路, 入油時肥肥又想叫埋佢屋企人....好啦, 都係問下姐, 點知佢阿媽一聽就想去, 又叫我地渣架車入建新邨飲茶之後一齊去....恐怖塞車一小時就開始了....

都唔明佢地一家點解要入到建新咁遠飲茶，我懷疑佢父母想食勻全港茶樓。入到建新, 因為鄰近青松觀, D人拜完先人就去飲茶食野, 所有停車場、街位、標位全部full, 幾個停車場前都有十幾架車等入....根本無可能泊倒車, 經歷恐怖塞車一小時我地決定放棄落車，轉去元朗飲地痞茶!

這間位於元朗廣場後面的 東方(勝記)飯店, 就是飲地痞茶的地方，基本款式的點心都有，就在路邊搭幾張枱的大排檔風味格局. 我同肥肥都係點心控，人地老人家嘆茶一盅兩件點到即止，但次次我同肥肥都係點到成枱都係點心先夠皮!

 

 



點了五款點 : 心蝦餃、燒賣、鳳抓、雞扎、牛肉，味道一般，埋單$92。價錢不比茶樓平很多，但看著一籠籠的點心山推出來，吃的是風味。

在朗屏站接埋肥肥一家 (他們自己飲完茶搭西鐵過來喇....), 出發到大棠去 ! 渣車十幾分鐘就到達大棠燒烤場，遊人不少，私家車都幾乎泊滿車道....

這裡可以眺望元朗十八鄉的景色，居高臨下，景色開揚. 燒烤場在大草坪上，有人燒烤，有人玩風爭，享受家庭樂~ 我地就四處走走，欣賞下風景~ 空氣都格外清新~

 

 

這裡亦是大棠自然教育徑的入口，全程行三小時，我們就隨便行了15分鐘，吸收下樹木的芬多精~

 

就在郊野公園hea下又過到了4點，聞說附近有有大棠荔枝山莊，有小動物看，便駕車前往，距離郊野公園大約5分鐘車程, 便到了大棠荔枝山莊的入口.

入口處除左個公廁係免費之外，入去參觀下都要收$30/人的入場費. 俾$80可以玩埋騎馬仔，餵錦鯉，坐牛車等....我堅決不付錢，揪身離去.

我決定抵制呢個荔枝山莊的原因如下:
1. 呢個山莊之前已經有欺凌隔離 "流浪牛之家" 的新聞, 如今眼見一隻牛在拉一架載滿5-6個大人的牛車， 於心不忍.
2. 呢間野個負責人 - 十八鄉主席 梁 X 元 (看他身上掛著"齊心"襟章，可知其背景) 起呢個山莊原來係霸佔官地，家陣佢霸佔官地仲要收我地入場費?? 我係唔會屈服俾佢. 加上收銀處D職員黑口黑面, 真係令人火滾.

詳見昔日新聞 : 荔枝山莊咆哮 連環陣阻清拆  <-- BTW,  D村民使用"三桶屎尿夾雜的疑似有機肥料擺出屎尿陣迎戰 不時有村民用木棍翻撈肥料，看得旁人心寒" 是亮點.





帶著傲骨揪身而去，肥家姐提議去錦田鄉村俱樂部玩，果邊同樣有士多啤梨摘，有小動物，有燒烤場，重點係唔收入場費. 都幾好呀, 襯天色未黑，趕快渣車出發去!

錦田鄉村俱樂部位於錦田水尾村，距離大棠約十幾分鐘車程，都幾入架，但估唔到有咁多人去，熱鬧得很 ! 但呢個俱樂部佔地很大，所以唔覺得迫人喎，又有大草地、有機農田、兔仔樂園、燒烤場、仲有兒童彈床、兒童電單車等，好適合一家大細郊遊玩樂. (最緊要係唔使入場費，所有野按使用收費，豐儉由人)

這是什麼卡通人物 ? 四腳叮噹 ?

 

 

行下hea下又到六點，我地決定去 大榮華酒樓 吃晚飯，早去唔使等位，佢個餐牌好似加左價 (!?) 全部小菜要 $80 !! 什至是一客8件的馬拉糕 !!!!! $80/份馬拉糕......吃不起了.....

 

 

圍村五味雞 - 雞滑、入味

 

陳皮豆豉蝦 - 陳皮炒得幾香，但蝦細隻左D

鳳凰蟹肉炒長遠 - 即係雞蛋蟹肉炒粉絲，被個咁有霸氣既名呃左，其實平平無奇.

 

 

食飽飯今天行程結束，踏青之行表現滿意，雙腿累了，心靈卻大滿足。

窮遊世界 - 泰國清邁拜縣之旅 Day 5-6

Day 5 : Pai hot spring --> mini van to Chiang Mai --> Vieng Joom On tea house -->walk in Thepae Gate
Day 6 : 清邁 -->香港

這天我同肥肥6點半就起床了, 倒屎咁早起身的原因, 就是要襯一早清涼的氣溫(大約15度左右)去浸野外溫泉! 清晨的氣溫真的很涼, 我和肥肥著件風褸, 帶條毛巾就騎車出發, 野外溫泉大約要騎車30分鐘左右, 早上的馬路不見一架車影, 我和肥肥就即管開快一點吧.....D風凍到呢.....

開往溫泉的路其實還算好找, 只係我傻傻地轉錯左個彎所以要稍為問路一下才到, 溫泉的票站早在7點已有人駐守, 只好乖乖付入場費 (想逃票的話請7點前到達), 每人200baht的門票, 在泰國來說是天價吧....(聽說這針對是外國人收費, 泰人好像便宜很多)

溫泉入口好似郊野公園咁, 人形都無個, 走著走著, 看見小溪上有煙啵, 就知道到了目的地. 時間約7點半, 只有2位泰人女士剛浸完在收拾, 其餘人影都無個, 我同肥肥可以話係浸曬 ! 這個溫泉是超天然啊, 就是在森林中一個水潭內, 池底還是沙石, 有個告示牌說水溫是36度, 這溫度太舒服了吧, 有少量的煙冒出來....

我同肥肥二話不說立即脫光衣服 (泳衣我一早穿上了), 就跳入水潭內, 超舒服呀!!!! 面對著這自然的景色, 實在太Amazing了!! 想想要跟人說我在泰國浸溫泉, 大家也會覺得很匪而所思吧!
其實這裡可以浸得的溫泉只有4個"池", 由37度至35度, 以我浸的36度最舒適, 35度就加多了些冷的溪水, 浸腳最啱.

肥肥說叫我不要PO他的出浴照, 放心啦我好尊重私隱的,這張相我打左格仔架, 一定無人知係佢lor~

山上還有一兩個池, 是80度的溫泉水, 可以在小食店買雞蛋煮溫泉蛋呢.....這裡說明了這野外溫泉是靠地熱令泉水加熱, 所以絕對是純天然啊. 大約9點左右, 太陽的溫度開始加溫了, 是時候離開. 其實這1個小時內都只有小貓三四個來浸啊, 所以這裡絕對值得推介! (這裡設有更衣室, 不用擔心, 但就沒有locker之類, 所以個人財物都係放係池邊)

80度的溫泉水

不知怎的每次浸完溫泉都十分肚餓, 回到酒店再食番個最後早餐, 就是收拾行李準備回清邁了...結帳的時候酒店說昨天的香檳是免費送給我們的周年紀念禮物, 實在太貼心了~ 行李就叫酒店的tuk tuk車送到Aya service, 我就騎車到aya還車....要離開這可愛的小鎮了....好唔捨得啊....

這小茅屋其實是酒店的前台啊

酒店專屬的tuk tuk 車

又再經歷辛苦的三小時, 終於回到清邁. Aya service把我們送到Tha Phae Gate, 我地再截雙條車回到Pak Chiang Mai. 今天住的房型是standard room, 床是queen size bed, 相比之前的king size bed小一點, 但沒關係啦, 反正這晚都係訓幾個鐘就要走.

之後我地就去我計劃已久位於Ping River旁的Vieng Joom On Tea House去High tea, 這附近都是很具設計感的modern浪漫餐廳, 選了這間是因為聞說這裡的佈置都專為女性而設呢~ 有臨河的半露天位置和二樓的冷氣房可選, 我地還是選了冷氣房啦.....

這餐廳是素食餐廳, 我和肥都未食午餐, 於是又點了些餐點吃. 可能因為我其實是食肉獸啦....吃完素菜還是夠得肚很空虛的....

這裡的茶配得很獨特, 我選了Paradise Night, 是多種花茶的混合, 而肥肥選的是Vieng Joom On Tea, 是餐廳的signature tea, 茶是不錯喝. 這裡還有售賣可愛的紀念品, 可是價錢貴得很, 沒法下手啦.

飲完下午茶, 我地去左Tha Phae Gate附近逛逛, 看看有什麼手信買. 走進了一間香薰用品店Herb Basic, 一次過掃左1400baht手信, D香薰香皂都幾靚架, 唔太貴好適合做手信....好啦我承認我係一個無心肝的人, 只是一次過買齊交差就是了.

這是買給自已的 (^0^)

然後我同肥肥來個最後一按, 再來一次1小時的Thai Massage, 這次幫我按的姐姐太大力了, 按得我很痛呀 >.<  而肥肥果個就按得不錯, 所以話按摩好睇彩數吧. 晚飯時間, 原先諗住去一間鬼佬口味的泰菜而氣氛有情調的餐廳, 怎知按完摩出來見倒對面間大排檔feel的泰國菜餐廳好似幾多人幫襯喎, 而且好多仲要係本地泰國人添! 於是改變主意就走進去了...

又是冬陰公

腰果炒雞

甜酸醬炒"大"蝦, 其實一點也不大

蛋炒牡蠣

蝦醬通菜

這間其實是著名的壹銖粥店, 以一銖一碗白粥聞名, 其實就只是噱頭吧. 小菜還是幾有鑊氣的.

吃飽後, 又回到民宿稍息一下. 民宿說因為我們明天要4:15am離開, 沒有時間吃早餐, 所以就為我地打包了三文治和果汁給我們在機場吃.....真係超貼心啊~

還幫我們影了臨別的合照

第二天要凌晨三點幾起床啊, 但仍心有不甘地逛多次附近的夜宵檔, 試了這裡的豬肉粥....味道麻麻地....



 訓得麻麻, 訓得三個鐘就起床, 由民宿車我地去機場. 明明我一早已經online check in 仲print 埋boarding pass, 但來到又要再排多次double confirm, 仲要俾佢地秤下我hand carry行李有無超重!! 真係俾Airasia殺個措手不及, 我的hand carry行李有10kg左右, 比佢地的限重7kg重左, 搞到即場好狼狽咁左調右調D行李, 妖, 其實咁整來整去咪又係拎同樣既野上機, 真係浪費時間 !!

要離開清邁了, 象徵著假期的結束.....好唔捨得啊......

一個不捨得的扁咀樣

上機立即睡覺, 很快回到香港, 又回到現實. 到底我係唔捨得清邁, 定係唔捨得假期? 其實都沒必要分得咁清吧. 可能我只是討厭現在的生活而已.