蘇梅回來快三星期了, 遲遲未寫blog,係因為今個假期實在太無行程, 基本上係全HEA, 所以實情無咩好寫.
Day 1
搭曼谷航空直航早機, 9:05am的飛機, 我地準時check in, 只是因為吃早餐和買煙的關係成了差不多最尾上機的乘客. 小型飛機, 沒有私人電視, 但起碼有飛機餐, 有公用電影, D椅都幾舒服. 空姐都幾靚幾醒神, 以小型airline來說算是不錯.
其實飛機餐都唔錯.
3小時之後便來到一個與香港完全兩個世界的地方. 呢度一落機就好有渡假feel, 淨係睇個機場就知. 呢個時候我興幸自己係HK人, 可以咁近咁方便就來到世外桃源.
由於我同肥肥完全無行程, 到達機場後搞下電話卡, 又八掛下租車價格, 才私私然搭的士到第一間酒店, 為於Lamei偏遠的 Silawadee resort. 我地住的是為於三樓的jacuzzi seaview deluxe room. 露台有jacuzzi及day bed, 酒店對海, 好寧靜, 亦天朗氣清. 酒店俾左心形玫瑰及朱古力蛋糕我地作為honeymoon setting.
午餐唔想諗, 就在酒店的餐廳內搞掂. 落地玻璃的餐廳內, 只覺得此情此景, 夫復何求!
之後唔使講, 梗係去久仰大名的infinity pool度浸下, 果然不負期望.
晚上我地搭酒店的shuttle bus去全蘇梅最旺的地方- Chewang, 我地以為係好似布吉的patong咁, 點知可能因為唔係旺季, 條街無咩人, 一D都唔熱鬧, 同我地想像有D落差. 之後去旅遊書介紹的鐵皮屋平價餐廳食, 好多人等位, 到我地坐下時又說海鮮沽清. 加上我感冒發作, 第一晚就很隨便的回到酒店訓覺.
Day 2
這天早上起來便去食早餐, 任食前菜, main course就要向待應order, 同樣有我最愛的奄列同crispy bacon. 看著無敵大海景食早餐, 同肥肥真係食足食粒鐘. 跟住肥肥回房訓覺, 我就去游下水曬下太陽.
下午又搭shuttle bus 去左Lamei beach, 行左去海灘果邊找了海邊的餐廳食lunch, 太陽勁猛, 但吹住海風食lunch都幾寫意. 這間餐廳的公車number好大隻, 冬陰公又好味, 唔錯.
因為原來間spa係收五點既, 我地食完lunch要立即飛的去做spa. 這間Silrom spa十分出名, 因為佢係對住大海聽住海浪聲做Spa. 我地做2小時的herbal hot pack massage, 做之前佢地安排我同肥肥去一個其實可以俾人目及倒沖涼既岩洞內沖花曬, 之後就帶到一個對海的涼亭內做按摩.
2小時按摩, 用了熱草球來按, 舒服到暈. 盛惠每人HKD$500. 價錢尚可.
按完之後已經傍晚, 我地又返去Lamei, 啱啱好撞正Sunday market, 好多小食檔, 我同肥肥勁興奮, 這晚決定掃街. 重點有120baht的BBQ牛肋條, 仲有50baht的cocktail, 過了一個平民化又Happy的晚上~我同肥肥既心情又放鬆又enjoy.
Day 3
這天join了Day Tour去龜島及南幽島, 特登揀左個貴D既package搭快船可以訓晏D早上9點上車, 否則慢船就要6點出發.
慢了一步上船, 只剩下船頭沒有遮陰的位置, 不過唔緊要, 反正我都預左曬黑. 不過快船真係好浪好chok, 好彩我都無暈船, 仲訓得著tim.
先到龜島的後面浮潛, 蘇梅真係一個浮潛的好地方, 好多珊瑚, 好多魚. Lunch在龜島食快餐, D野食一D都唔好味, 求其是但食飽算數. 龜島原來都有D大街, 個沙灘仲鬼死咁靚, 如果可以在龜島住番幾天應該會不錯.
食完飯去南幽島繼續浮潛, 南幽島係一個私人resort, 個海乾淨到好似游泳池咁! 原本打算在沙灘椅坐下, 但全部滿座, 唯有繼續浮潛~玩兩小時後便離開搭番40分鐘快船番蘇梅.
夜晚我地又去Lamei, 先食個車仔檔的phad thai 打底, 好味又有鑊氣. 之後去左小店做泰按, 第一次做shoulder , neck & back, 佢地會用D虎標來按背, 薄荷感真係爽到暈, 我同肥從此愛上呢個按法!
按完好想食seafood, 來了蘇梅咁耐都無食過真正的seafood (即係炒蝦刷蟹果D!), 問D local人邊度有得食, 佢地介紹左我地去一間當地人食seafood的, 點知去到無曬蟹, 得番普通野, 算啦是但都叫個公車number頂住先, 聽日再食過~哼
Day 4
Silawadee resort其中一個賣點, 就係有全蘇梅最靚的日出, 我地較啱時間, 晨早六點起身, 在露台的jacuzzi內浸住咁睇日出, 雖然俾雲遮左少少, 但係都好靚~ 好浪漫啊~ 我問肥肥睇日出時應該聽咩歌, 他答我是譚詠麟的愛是這樣甜, 即刻在酷狗下載來聽, 是啊, 真的好match. 1984年的歌, 28年來都咁啱聽.
期望每朝早 起身一吻紅的臉
共回味情夢最甜 新鮮早餐奉獻
期望每朝早 返工衣著同挑選
一切一切共分享 愛是這樣甜
共做晚餐談笑 你要呷醋我落鹽
飯後你織毛衣 還未著上都溫暖
住在這小房間 說說笑笑也纏綿
但願我的旁邊 長伴有你天天見
睇完日出之後, 我又同肥肥去食一小時的早餐. 食完早餐都係八點左右, 我地就行左落沙灘. 這個時候沙灘向東, 好曬, 一個人都無. 同肥肥行左一陣就返去房繼續訓~
午餐我同肥肥決意要去旅遊書介紹的seafood餐廳食, 睇地圖寫在Lamei附近, 我地諗住在Lamei租電單車騎過去, 點知去到租車果度登記好曬俾曬錢, 俾個老闆娘發現我唔識渣, 佢驚我整爛佢架車唔肯租俾我…..唉, 無計, 咁唯有跟住個地圖行去間餐廳啦….點知…..!!!! 行左鬼死咁耐, 烈日當空, 三十幾度的情況下, 又上斜又落斜都未到!!行行下有個鬼佬發現肥肥個樣唔多妥 (好似半死咁既樣), 佢好好人咁用他的電單車載埋我地兩個去, 原來我地果度行去可能要行多一公里….
終於去到間餐廳, 咁辛苦梗係食餐勁, 兩個人食六個人野都係$400左右, 間餐廳無咩人, 對正一個好靚既海灣, 一路食一路諗, 點解我地平時要咁辛苦工作, 為生活忙碌? 在這裡, 快快活活食番餐, 已經好開心好滿足.
食到飽曬我同肥終於忍唔住, 之前諗住慳錢唔租車, 終於頂唔順用1000baht/day租左架車. 我地渣左去big C諗住入定貨買定啤酒, 去度俾錢時才發知, 點知泰國都唔知咩法例, 下午2點-5點唔俾賣酒!??? 咩世界咩原因呀????????痴線架!!
無計, 酒又買唔成, 我同肥返酒店happy hour. Cocktail買一送一, 各自飲左兩杯. 晚上再去Lamei食dinner, 食左一個”呃老外”的BBQ拼盤, 有肉有海鮮, 都係1000baht.
食完我想做泰按, 肥說想自己行下飲下野, 咁我咪自己去做lor, 做完出來搵番肥肥, 問佢有無飲野, 佢話只係自己一個人遊遊盪盪, 唔敢入去D 酒吧, 怕一個男人入去會俾"女"撩, 呵, 原來佢咁怕醜, 算你啦~
