2014 雲南野生菌之旅Day 1-2

因工作關係去了雲南出差一趟, 出差很累, 令人特別想家. 這趟行程搭了很多車, 真係疲憊不堪. 剛聽到雲南今天發生地震, 希望佢地平安!

今次的行程主要由別人安排. 我和一位同事原定先由深圳飛到昆明, 在昆明會合另一成員後, 再由昆明飛到保山. 點知到達昆明時正準備到櫃檯check in飛到保山的飛機時, 才驚覺對方訂錯了早上八點起飛的班次 !!?? 下一班飛到保山的飛機要等到第二天早上, 而且要$1000/人!! 結果我地被迫要由昆明機場包車到保山....要坐7小時的車.....真係OMG.....

而我在雲南的第一餐, 是在公路旁的野生菌餐廳, 大約是開了車兩小時後的地方.

由昆明機場去保山市，路程是483公里，車程是7小時. 雲南的日落時間下午8點, 而一般雲南人大約六七點就食晚飯, 所以食晚飯時個天都仲光.

雲南是中國出產野生菌最多的地方, 這裡的人幾乎每一餐都食野生菌. 野生菌要在高海拔和雨水多的地方才可生長, 而雲南就具備有良好的條件.

松茸酒, 酒精濃度有60%, 我貪得意喝了一口, 那道火好像灼熱了我的食道, 受不了...

這是黃牛肝和黑牛肝炒的菜式

松茸用來做雞湯很夾.

終於在凌晨十二點到達保山市, 那個包車司機還在公路出口處的馬路旁(未出收費站)就丟下我們自行截的士(原因是他為了慳番路費), 幸好找得到的士開到市內. 這晚下榻的酒店是全保山市最好的四星級酒店 - 官房大酒店. 因為得番最後兩間房, 所以我有幸一個人獨享套房!! 房間很大, 單單是個廁所已經同我屋企個廳一樣大!! 好舒適.

套房有一房一廳, 這是客廳. 

客廳有一扇大窗, 窗外是保山市的景色. 這個市十分簡樸, 連鎖商店幾乎絶跡, 連便利店也沒有.

單單是個廁所已經同我屋企個廳一樣大, 還有浴缸和浴鹽泡澡用.

睡房空間很大很舒適, 一個人訓咁大間房未免有點怕. 所以我帶埋Kumamon陪我.

保山的天氣乾燥左D, 所以有埋噴濕機可以用.

第二天的午餐, 我地去左距離保山市36公里的海棠洼村, 這是在一個位於深山裡人跡罕至的鄉村, 經歷一小時攀山越嶺才到, 我地食的是正宗農家菜 ! 

吃農家菜的地方, 看似尋常百姓家, 但牆上掛滿咩咩領導, 咩咩常委都曾經係坐上客! 

呢D係剛剛採摘的松茸, 準備去烹調

新鮮的松茸可以生吃! (只有松茸才可以, 其他野生菌生吃的話隨時中毒架) 當地人的吃法係好似刺身咁沾芥末醬油吃!

繼續係松茸雞湯, 今次味道濃好多, 果然即採即食係唔同啲.

農家自己腌製的火腿, 豬味很濃.不設售賣啊.

簡單的農家菜, 不簡單的味道.

走進農家裡的廚房, 偷了一籃新鮮松茸出來拍照~

之後我們便出發去附近的山裡準備採摘野生菌喇~

嘩, 松茸呀~ 想摘野生菌, 梗係無咁容易啦, 人地農民天未光就上山採摘, 有時一日都摘唔倒一只, 無可能係我地呢d外行人求其走上山就搵倒. 所以呢張相......keke (奸笑)

晚餐我地試下傳統雲南米線, 正唔正宗我就唔知喇, 但咁多配料唔打得都睇得~

一碗熱湯, 再逐樣配料放入去, 先放肉類, 再放菜, 最後放米線. 咁就係過橋米線喇. 味道都唔錯, 算係清淡很合廣東人口味.

呢樣野叫"大救駕", 云南腾冲县最出名的小吃之一. 據說明朝永历皇帝逃往滇西, 農民把家中最好的食物炒埋一堆俾皇帝食. 主要有"饵块", 係好似年糕片咁既野. 其實味道不怎麼樣, 試一試就好.

晚上要去應酬.....飲酒....食二手煙.....很累......那種麋爛的活動確實沒什麼好寫, 在內地傾生意就是要咁樣.....我明白的.....

Kumamon粉絲報到 ! Kagome X Wired Cafe X 期間限定Kumamon Fair

得知銅鑼灣Wired Cafe最新變左Kumamon的Pop Up Cafe, 作為Kumamon的死忠粉梗係第一時間要去朝聖一下 ! 為左氹掂肥肥陪我去銅鑼灣, 唯有用在團購買的按摩+按腳+拔罐package引佢啦, 佢先肯"山長水遠"陪我去銅鑼灣╰（‵□′）╯

大約6點鐘到達位於希慎廣場14樓的Wired Cafe, 有十多人在門口等位, 先取票吧! 幸好大約等10張2人枱的叫號. 餐廳門口就有一個非常醒目的Kumamon的立像, 粉絲們梗係唔好放過同佢合照啦! 

這次Kumamon主要係推廣熊本縣的蕃茄, 所以Kumamon菜式都係用Kagome蕃茄做的. 選擇不多, 只有3款主食和2款特飲.

餐廳內部環境就保持住原先日式cafe的佈置, 無特別為Kumamon Fair 加添特色佈置, 只是在牆上貼了兩三張海報點綴下.....有少少失望....

Kumamon 的杯墊啊, 好像點特飲贈送的, 可是沒有送給我〒.〒

大約等侯十分鐘便可入坐, 比想像中快啊. 作為Kumamon Fans梗係重點order了熊本熊的菜式啦!!

熊本熊Latte @ $52  - 好可愛呀!!! 除左用Kumamon杯盛載, 仲有Kumamon的樣子在咖啡上, 大愛呀 !! 即使比一般普通咖啡賣貴$20, 也是要試一試~~

肥肥飲的是番茄特飲 @$43......說真的只是普通的蕃茄汁用Kumamon杯裝住.....(￣.￣)+

Kumamon Hot Cake @ $78 - well...原本呢個鬆餅係印左Kumamon的嘜頭的, 但俾D糖霜遮住左o(〒﹏〒)o   兩塊熱香餅要七十幾蚊....值唔值心中有數啦

Kumamon蛋包飯 @$78  - 蛋皮煎得OK, 不會過熟, 可是蛋只是放在茄汁飯上面, 不是包飯

(￣口￣)!!  未免hea左D喎, 這怎算蛋包飯呀......

單單點了上述幾款, 盛惠$276, 肚皮的滿足感只有40% (肥肥說他只有20%), 基於這裡性價比太低的關係, 我地決定唔再在這餐廳再浪費彈藥. 離開時有更多人在門口排隊, 我相信這是Kumamon的威力吧! 講真食物真係普普通通....純粹為左Kumamon而來 !!

我地決定再到附近覓食, 一於試下人氣長龍拉麵店 - 豚王. 小小登龍街內開了三四間日本拉麵店, 可能被其他拉麵店搶左少少生意, 8點鐘呢D peak hour只有6-8人在門口排隊, 很快便可入座, LUCKY!v(￣︶￣)y 

點了最classic的豚王拉麵, 可是半熟蛋剛賣完了o(〒﹏〒)o . 自已加的即磨芝麻和泡芽菜, 好好味~

超濃的豚骨湯, 和我喜歡的細拉麵, 同一蘭一樣, 可以自已揀湯的濃度和麵的硬度.....整體來講我覺得同一蘭是不相伯仲, 好開心又找到一間喜歡的拉麵店.

食完呢個拉麵, 真係飽到上心口呀! 肥肥則說後悔吃了Kumamon Cafe, 寧願多吃一份拉麵....(￣.￣)+ … (無語)

萬寧Staub開光 - 自家制花甲雞煲

等到頸都長的萬寧Staub終於有得攞喇! 足足等左三個月呀! 儲印花一向不是我的習慣, 幸得有一個好叻儲印花的同事慷慨送我一張貼滿印花的換購劵, 所以才得以入手 26cm Round 的Staub鍋.

其實我一直想要一個黑裡的鑄鐵鍋, 因為手上的Le Creuset是白裡, 不能爆炒, 以免損壞塗層. Le Creuset也有黑裡, 但我真心不是貴婦, 沒辦法三四千元買一個鍋吧. 而Staub就正好是黑裡的, 正好合乎我所需.

好重啊, 好彩在兆康站的順豐取貨, 如果唔係真係拎死! 包裝盒有中文說明書及開鍋步驟.

打開個煲，見倒一條條痕既 !??? 大為震驚 !!! 好彩只係污糟野, 一抺就無左.....

yeah~ 我們家的鑄鐵鍋又多加一成員了 ^^

早在未取鍋之前我已經諗定煮咩菜式作為開光菜, 就係雞煲喇! 之前一直無用過LC做雞煲, 因為怕爆炒會弄傷煲, 依家有左個Staub就無問題啦! 今次決定參考樓下雞煲店的其中一道招牌菜 - 花甲雞煲. 

其實煮法同普通雞煲差唔多，只係加左蜆仔. 本身想買大花甲, 可是今天街市沒有, 只有$25/2斤的蜆仔, 我買左, 但見咁平, 驚佢唔新鮮, 所以我另外用一個煲用清雞湯煮開左D蜆先, 再把蜆起肉, 蜆湯要保留做湯底. 之後再用Staub煲做好雞煲, 最尾加入蜆肉和蜆湯略煮一會便可.

Woo~起鍋了, 肥肥話勁好味, 食完D雞之後再加入剛才的蜆湯打邊爐, D湯吸盡蜆肉精華, 真係食啖菜都咁鮮味~

亮點的打邊爐配料 - 白鱔片 !! 屯門新墟街市最平都要$128/斤,買半條要$100 !! 其實算平, 因為依家白鱔真係好貴>.<  但食雞煲配白鱔片真係好好味!!! 下次都一定要落白鱔片!!! 

用左新的餐枱後, 以後打邊爐就多左空間放配料~ 可是這晚的焦點落左係雞煲同白鱔片度, 盒肥牛都無開過 !! 

肥肥說這餐是100分的晚餐~

尋找隱世美食 - 屏山華嫂冰室

周未早上起床在思索食咩早餐, 心血來潮想去拜訪傳說中的華嫂冰室. 久聞這冰室的開店時間尤如銀行一樣, 一至五休5點, 星期六只開半天, 星期日休息. 有一次星期六曾想在11點半趕去吃, 但考慮到網上聽說有機會提早截單, 所以還是沒有成行. 但今天一起床就有這一道火, 決定趕快出門尋食去!

Google Map顯示華嫂冰室距離我家17分鐘車程, 位於元朗屏山文物徑其中一段. 實際地址其實很近天水圍.  但冰室不在大路當眼處, 一排排的圍村不算易找. 問了兩位村民的路, 才找到這間冰室. 原來就在鄧氏祠堂旁 ; 還好冰室對出就有免費的停車場, 都算幾方便駕駛人士.

一落車立即飛撲去取飛, 找到59號籌, 距離叫號還有十多張枱, 冰室門外有數十人捱著酷熱天氣在等位, 足見食客們對美食的忠心!!

網上聽說在這裡等位一小時是閒事 !! 我同肥取籌後就到旁邊的鄧氏祠堂逛了一逛 (這成了屏山文物徑的其中一個景點). 沒想到回來時還有9張枱就到我地, 而且可能前面的都是大枱, 剛好有2人枱的位置讓我和肥可以插隊上座 ! LUCKY~只是等了二十分鐘~

小店內部連埋小騎樓可以坐客的空間不大, 幸好大家食完就走, 所以算流轉得快. 我同肥肥點了一份蕃茄豬扖雞翼通粉, 兩個招牌菠蘿包和兩杯凍奶茶.

奶茶的茶奶比例啱啱好, 算是一杯做得不錯的奶茶. 但始於奶茶太common,未至於驚艷的程度.

蕃茄豬扖雞翼通粉 - 蕃茄湯非常濃郁, 而且還加了少許芫茜, 豬扒煎得剛好, 是剛熟又保留肉汁的程度, 算是上佳之作. 但單憑這款菜色, 未至於要輪候一小時吧 !?

重點的招排菜 - 招排菠蘿包 ! 一吃便知輪侯一小時的箇中原因 ! 半熟又煎香的流心蛋, 厚薄適中的一片牛油和一片蕃茄, 加上香脆的菠蘿包, 實在沒想到平凡的食物可以變化出不平凡的美味, 我同肥肥的舌頭都甘心被俘虜.

見其他食客點了芫茜豬潤米線好像不錯, 還有一些益力多特飲也可以嘗嘗, 我想我會再有衝動再次拜會這裡. 

輕量敗家 : Franc Franc X 淘宝 X 缸瓦佬 X 花粉熱

今日在朗豪坊做左團購的facial + 淋巴按摩 ; 45分鐘推淋巴加1.5小時的facial, 都只是$116, 十分抵做, 當然我已練成金剛不壞之身, 對所有外來推銷都堅定不移啦.....

之後便去左傳聞中的缸瓦佬尋寶去, 買左少少碗碟, 放埋上次在Franc Franc買的小碟旁都唔輸蝕喎 ^^

兩個紅色的小焗盅, 同LC相似度80%, 只係$15/個, 打算用來做Croque Madame Muffin, 黑色小花盅和紫色方形焗盅都酷似現時大熱的LC款式, 果斷買下 ! (雖然暫時未諗倒用途, 哈哈) 而兩隻紫色小花小碟簡直同LC近排熱炒的 French Pastel 系列的紫色相似度90% !! 用咁平既價錢買左之後真係自我感覺良好 !!! 買曬全部都唔夠買一個真既LC stoneware !!  (自欺欺人中....傻笑)

一個人逛下逛下又去左花墟, 大熱天時真係好難頂下.....入左Hay Fever諗住觀賞一下, 原來開左cafe, Mocha做得很好飲, 還有拉花, 真是花墟中的清泉.

這扎花的配搭真係好靚, 粉紅配粉綠.

參觀完都忍不住敗下一盆日本植物, 希望可以打破我種咩死咩的宿命啦.......

回家後還有時間煮新的菜式 - 花雕煀雞. 超好味, 果然是米芝蓮名菜 !!一定有下次 ! ^^

花雕煀雞 食譜來源 : 玻璃朱城. 

團購狗狗雞批

聽說森美在一個電台節目中說過, 有些港女連飯都唔識煮, 卻去報名學做蛋糕給狗狗吃! 今天我就是這種港女喇~!!

這又是另一項我為自己安排的7月周末活動, 波波6歲生日時我都親手造過一個紅蘿蔔蛋糕給牠, 但佢唔太鐘意食(後來個蛋糕卻俾好識食既Whity食曬). 呢次經歷得出的結論係 : 波波都係鐘意食肉多啲 ! 所以今次我揀左學狗狗雞批, 希望啱食肉獸波波既口味啦~

團購價: $150, 課室位於尖沙咀一間樓上舖內, 有一個很大的窗戶, 沒想到只有三個學生上課, 所以很舒適. 

其實材料都係一般在超市可買到的材料, 只是沒有用糖及鹽, 所以口味會較清淡. 親手搓批皮很累呢.....還好都最後也似模似樣地完成了.

放滿波波喜歡的雞柳絲做餡

出爐啦~賣相唔錯

 

波波聞下聞下, 似乎唔相信呢件雞批係做俾佢食咁喎!!

咁美味既雞批, 波波梗係至LIKE啦 ! 不消5分鐘就食左四份一件 !! 波波唔可以一次過食咁多啊, 其餘的要留番下一餐食. ^^

團購陶一陶 & 開心house warming

這個七月的周未節目早被我編排好. 對於我編排給自己的節目很滿意啊, 不會太累也不會太無聊. 最近的日子我感到生活又好像再次注滿能量! 可能是找到一些新的目標, 或者係學會放手!

Anyway, 這周日的節目是和姑婆參加團購的陶藝班! 又是一個靚太聚會的活動~~$144/堂(1.5小時), 地點是位於九龍灣的工廠區, 由地鐵站行過去大約10分鐘, 都算幾方便. 

因為黃遲到, 所以我地去到已經開始左少少, 先由阿sir示範做一個碗, 齋睇已經覺得好難捉摸, 到自己做的時間, 真係好難控制, 幸好阿sir會逐個學生捉住手仔拉胚, 所以我地每個學生都可以成功做倒一個碗.....

一人一部的拉胚機, 過程要不斷加水, 以免胚太乾而拉裂

前面的碗是我的制成品, 後面的是黃的, 但其實問心我都唔exactly 知道我係點樣拉好我舊泥, 因為大部份都係由阿sir執手尾.

刻了自己的名字, 隔一個月就可以攞得~

睇人鬼情未了時覺得拉胚好似好浪漫咁, 但其實都幾難, 做錯一個步驟隨時要由頭再做過 ; 要燒陶、上色、修腳還要額外加$120, 所以計落一件制成品造價要$265. 經濟角度一定唔抵, 但當作係消閒活動都幾好玩的.

之後就去了xiao的新居, 和羊夾分送了靚靚的francfranc餐具給她做house warming禮物, 好靚啊, 自己永遠唔捨得買~ 啱曬佢係屋企"發花癲"時用....呵呵....

還有她的四隻小狗, 我比較鐘意蝦~夠肉感又可愛~ 不過還是覺得波波最幸福, 由細到大都有爸爸媽媽鍚~