團購狗狗雞批

聽說森美在一個電台節目中說過, 有些港女連飯都唔識煮, 卻去報名學做蛋糕給狗狗吃! 今天我就是這種港女喇~!!

這又是另一項我為自己安排的7月周末活動, 波波6歲生日時我都親手造過一個紅蘿蔔蛋糕給牠, 但佢唔太鐘意食(後來個蛋糕卻俾好識食既Whity食曬). 呢次經歷得出的結論係 : 波波都係鐘意食肉多啲 ! 所以今次我揀左學狗狗雞批, 希望啱食肉獸波波既口味啦~

團購價: $150, 課室位於尖沙咀一間樓上舖內, 有一個很大的窗戶, 沒想到只有三個學生上課, 所以很舒適. 

其實材料都係一般在超市可買到的材料, 只是沒有用糖及鹽, 所以口味會較清淡. 親手搓批皮很累呢.....還好都最後也似模似樣地完成了.

放滿波波喜歡的雞柳絲做餡

出爐啦~賣相唔錯

 

波波聞下聞下, 似乎唔相信呢件雞批係做俾佢食咁喎!!

咁美味既雞批, 波波梗係至LIKE啦 ! 不消5分鐘就食左四份一件 !! 波波唔可以一次過食咁多啊, 其餘的要留番下一餐食. ^^

團購陶一陶 & 開心house warming

這個七月的周未節目早被我編排好. 對於我編排給自己的節目很滿意啊, 不會太累也不會太無聊. 最近的日子我感到生活又好像再次注滿能量! 可能是找到一些新的目標, 或者係學會放手!

Anyway, 這周日的節目是和姑婆參加團購的陶藝班! 又是一個靚太聚會的活動~~$144/堂(1.5小時), 地點是位於九龍灣的工廠區, 由地鐵站行過去大約10分鐘, 都算幾方便. 

因為黃遲到, 所以我地去到已經開始左少少, 先由阿sir示範做一個碗, 齋睇已經覺得好難捉摸, 到自己做的時間, 真係好難控制, 幸好阿sir會逐個學生捉住手仔拉胚, 所以我地每個學生都可以成功做倒一個碗.....

一人一部的拉胚機, 過程要不斷加水, 以免胚太乾而拉裂

前面的碗是我的制成品, 後面的是黃的, 但其實問心我都唔exactly 知道我係點樣拉好我舊泥, 因為大部份都係由阿sir執手尾.

刻了自己的名字, 隔一個月就可以攞得~

睇人鬼情未了時覺得拉胚好似好浪漫咁, 但其實都幾難, 做錯一個步驟隨時要由頭再做過 ; 要燒陶、上色、修腳還要額外加$120, 所以計落一件制成品造價要$265. 經濟角度一定唔抵, 但當作係消閒活動都幾好玩的.

之後就去了xiao的新居, 和羊夾分送了靚靚的francfranc餐具給她做house warming禮物, 好靚啊, 自己永遠唔捨得買~ 啱曬佢係屋企"發花癲"時用....呵呵....

還有她的四隻小狗, 我比較鐘意蝦~夠肉感又可愛~ 不過還是覺得波波最幸福, 由細到大都有爸爸媽媽鍚~

周未晚餐精選-西班牙海鮮飯

西班牙海鮮飯之夜，要足料的話材料很多，用上蝦、青口、蜆、西班牙辣肉腸、雞肉、白酒，還有名貴香料藏紅花，仲貴過出街食……

食譜來源 : 玻璃朱城

配上蜜糖柚子沙律，我一向都對生的菜麻麻，怕那種草青味，但只從學識調蜜糖檸汁醬之後，可以中和生菜的草青味，入口酸酸甜甜，好味道～

當然還有漂亮的table setting ^_^

今日師奶D

今日睇倒網上一篇小文章分享, 說生活一些小瑣碎事都可以令人開心一點. 今天就在一天內出現左兩樣屈機式著數, 完全將我體內的師奶激素一下子全爆發!!

話說偶然一次在網上看到有"富臨集團"的午市團購優惠, 剛好在長沙灣的分店也有參與, 你知啦在工廠區吃午飯十分悶, 除左茶餐廳都無咩選擇, 所以各間酒樓是我們有特別活動偶然去輕鬆一下的好選擇. 所以就果斷地買下6張團購券, 成team人襯lunch time去試下.

團購券1張$48, 共買了6張, 共$288 ; 但包含的食物其他寫得幾含糊. 我們共6人, 可選2款炒粉麵 ; 3款點心; 3款小食, 3款即製小炒 ; 每位1款甜品.

於是粉麵類選了(2款) 瑤柱蛋白炒飯、瑞士干炒牛河 ;點心(3款)選了 蝦餃 x 2, 蘿蔔千絲酥 x1 ; 小食(3款) 選了 泡椒鳯爪、脆鹵豆腐、咸菜豬肚 ; 小炒(3款)選了菠蘿生炒骨、碧綠鳯片珊瑚蚌、泰式班塊 ; 甜品(每位1件)選了芒果糯米卷x5、桂花糕x1.

先來的竟然是甜品, 剛好5件芒果糯米卷, 一人一件份量正常. 再來的是蘿蔔千絲酥, 同樣是一人人件. 蝦餃12隻, 每人2隻.

味道不錯, 是一般午市水準, 沒有因為團購就將貨就價. 接下來就開始屈機, 正確來說可能是系統漏洞.....下一道是脆鹵豆腐, 竟然一次過上了6碟?? 一人一碟脆鹵豆腐 !?

接下來泡椒鳯爪同樣上了6碟 !! 正當我們傻了眼之際, 瑤柱蛋白炒飯居然一次過送了5碟過來 !!全部是正常酒樓炒飯size !! 菠蘿生炒骨、碧綠鳯片珊瑚蚌、泰式班塊也每款送了2碟, 瑞士干炒牛河也送了1碟  (原來是2碟, 但侍應發現太誇張, 就彈弓手自己收起一碟) !!??  我們都覺得太誇張了, 於是問侍應是否下錯單? 他則說可能是廚房出錯了, 叫我們把吃不下的食物打包, 下次不可能再有這漏洞...

實在太屈機了, 我地6個人不斷食都要打包7盒飯菜回去....

我想這次他們蝕大本了......哈哈.....

今天下班時, 剛好在forum內看到屈人氏的牙膏大特價!! 我就去了屋企樓下果間屈人氏看看, 看來今天可能係全年牙膏最平的一天, 我買了一年用量的牙膏, 哈哈哈!!!

總共12支牙膏 !! 我家一個月大概用1支, 足足1年的份量呢!! 沒關係吧, 反正牙膏同廁紙一樣, 一定用得曬~~共$130.3. 而贈品就勁喇, 有$20麥記券, $20大家樂券, 2罐午餐肉, 1包5包裝出前一丁 !!單單是贈品已經高達$88 !!! 連肥肥都不得不投降 !!! 

對於攞倒少少優惠我就已經好開心, 師奶仔的世界果然係簡單D. 

King Ludwig Beerhall - 洪水橋有質素德國菜

慶祝德國嬴波, 上周六忽發奇想要去食德國菜賀一賀~~這間距離我家只有10分鐘車程的德國餐廳牽逢周六日都有Buffet Lunch, 於是在沒有訂位下便去看看.

這間餐廳就在洪水橋的大馬路旁, 餐廳門口有一個專屬停車場, 車可直接泊在門口, $30/車(有代客泊車服務), 格局令我想起美國的餐廳, 通常都是一間平房, 車子就直接泊在門口的parking lot, 下車三兩秒就直接跳入餐廳.

餐廳門口的專屬停車場, 露天的...曬死 -_-"

有半露天的座位, 咁啱見倒有一枱客人帶埋狗狗食, 如果秋冬可以考慮下

這裡周六下午有buffet Lunch, $215/人, 因為不知道食物如何, 侍應說可以入去望下食物啱唔啱食先決定. 餐廳不算很大, 但裝修得幾有氣氛. 我同肥肥都被香噴噴的德國豬手吸引, 決定坐下.

沒想到當天的入座率有9成滿, 很多家庭帶著小朋友去食.

說真的, 這裡的回本菜不是很多. 一般自助餐生蠔刺身都欠奉, 最回本的算是煙三文魚. 冷盤選擇有凍蝦、青口、翡翠螺、凍肉批等等, 但我覺得滿意, 因為起碼佢擺得出黎既野都幾有質素同埋新鮮, 唔會求其俾D難食野敷衍你, 貴精不貴多.

選擇不多的冷盤

重頭戲當然係德國咸豬手, 這裡以正宗德國風味燒豬手最受歡迎，每燒15分鐘便噴灑啤酒一次，令豬手皮脆鬆化, 所以在開放式廚房內見倒廚師們不斷將豬手噴酒入爐, 味道果然唔錯, 而且表皮十分香脆! 正~!

自助餐每人包一杯飲品, 可以揀德國啤酒, 這款啤酒麥味很香, 配豬手一起吃十分夾.

吃肉實在不能一次過吃得太多, 剛好我們的座位就在甜品桌旁, 很多小朋友圍著甜品桌上的朱古力噴泉玩. 甜品質素幾好, 做得幾好味同精緻, 每一款都做得很好味.

雪糕櫃有兩款Dreyers雪糕可供選擇, 士多啤梨和開心果味,  開心果味是我的選擇, 另外還有即制格仔餅. 大人細路都食得開心.

這間餐廳令我喜出望外, 沒想到在屋企咁近范圍就有一間咁有質素的德國餐廳, 我同肥肥都決定要再次光顧 ! (哈, 等德國贏埋冠軍就再去慶祝!! Yeah!!)

少少甜 - My Classy moment

Julia Roberts & Richard Gere - Pretty Woman (1990)

Me and Fat - My big day (2012)

最近番看一套小時候超愛的經典作品, 終於知道當初我為何會對這套紅色晚裝如此著迷....

呀~不要臉(≧◇≦ )

蝸居佈置part II - 添置ikea小傢俱令蝸居置物更見使

住了四年, 有些傢俱雖然不盡合心意, 但一直都湊合著用. 例如我們家的小圓枱, 是一張只有80cm直徑的固定圓枱, 設計和餐椅(淘宝的Eames Chair)是perfect match, 倆小口子使用剛剛好, 又不會令空間有壓迫感. (詳見舊網誌 : 我的家具採購經歷1 : Taobao designer chair & Table) 

可是每當有朋友到訪(雖然很少機會) , 這小圓桌都令我頭痛, 因為實在太小, 家中超過三人吃飯的話都坐不下, 又或者打邊爐時, 要另外搭一張經典摺枱, 十分不美觀又麻煩.....

而住久了便愈覺得家裡儲物空間不夠, 一些小擺設全都堆在電視櫃頂 , 出街的小包包在客廳裡隨處擺, 所以總是在想家中還有什麼地方可以改善呢?

先介紹一下我的小蝸居, 這是一個只有378呎實用面積的典型眼鏡房蝸居, 客廳有一道173cm闊的窗, 望開揚山景, 綠意連綿. 所以窗邊的空間一直被用作飯廳用. 

我選擇了在Ikea添置一些小傢俱, 我知道Ikea的質素不好, 家中有兩個ikea櫃已用得支離破碎, 但口袋不夠錢, 實木傢俱實在無法effort. 我的舊電視櫃也是ikea的, 用了四年還是很好condition啊...

在倘大的Ikea看傢俱一定要量好尺寸, 因為ikea是設計給外國人用的, 而且在ikea的空間很大, 很多傢俱要是放到小蝸居內會變得太大了, 一定要小心選購才可. 最終選購了BORGSJÖ玻璃門貯物櫃 , NORDEN摺板檯, HENRIKSDAL樺木椅子, VETTRE湖水綠色床頭几, 添置後家中的平面圖如下 :

NORDEN摺板檯的闊度和舊的小圓枱差不多, 但可伸延至152cm, 4-6人坐都鬆動有餘, 配埋Lilac色的樺木椅子, 很合心意.

很喜歡這款Lilac的紫色, 懂我的朋友也知道我是個紫色控~

想盡腦汁終於想到把置物櫃放在沙發與牆之間僅僅30cm的空間 !! 哈哈!! 對! 就是只有30cm厚, 闊一點都不行. 而BORGSJÖ玻璃門貯物櫃可以只要上半部的玻璃門, 正合我意, 下半部根本開不了門啊....

另外還在櫃頂加了櫃燈, 晚上開起射燈十分有情調. 旁邊的湖水綠色的茶几顏色好靚, 有小滾輪可以隨意活動.

這次家具採購的效果滿意, 多謝收看.