窮遊世界 - 復活廈門 2014 Fighting之旅 - Day 2

第二天約好上午十點集合出門食早餐, 這晚睡得不好, 因為床太硬, 醒左幾次, 而且張床好似就快冧咁, 我同肥肥都幾重, 訓上去都"衣衣"聲, 真不敢在床上亂動.
房間的空調很給力, 都幾涼快又靜, 不過Y小姐說她那邊空調晚上發出隆隆聲, 被迫關掉冷氣.

晚天抵達的天色已晚, 沒有好好地為旅館拍拍照, 其實這間旅館的佈置幾有心思, 這也是吸引我訂的原因.

 門口的牆上用手寫上葡萄成熟時的歌詞



這就是家庭套房外的小偏廳, 三五知己聊天最啱

雙人床望落唔錯, 但其實太硬, 而且感覺不穩固

這是家庭套房附設的小陽台

廁所設備符合要求 - 坐廁, 熱水, 夠力

十點出去一齊找早餐吃, 早上的曾厝垵一樣都係咁熱鬧, 早餐店都十分火紅, 這裡很流行的厚吐司店都有排隊的人龍, 最終我地入左"乾龍包"內點了沙茶面, 小龍包, 我又買了芝士煙肉厚多士一齊食~

厚吐司店都排著人龍啊

芝士煙肉厚多士 - 食落有D似我地去麵包舖買的pizza包

沙茶面- 是廈門其中一款代表性的小吃

大魚的酸奶酪 - 做得出乎意料咁好食, 推介

食完早餐我地打算去海灘行下, 普通沙灘一個, 有一條木棧道可以看看海吹吹海. 同一般沙灘不同的是, 遊人當中穿插左幾個著得又污漕、又求其、又老翻的卡通人物在沙灘度行來行去四圍搵獵物....分別有 紫面版偽米奇、民工加菲、民工喜羊羊同污漕黃鴨.....

朋友Y小姐同朋友膠小姐可能好耐無返大陸旅行, 太天真, 不虞有詐, 竟然主動向偽米奇揮手示好....這次真係中伏了...

偽米奇梗係好主動咁即刻衝過來撩Y小姐同膠小姐合影啦, 一路行仲一路擺出成龍招牌V字手勢.....

偽米奇心中OS : 仲唔俾我搵倒水魚! 位位廿蚊....

於是兩位朋友就好開心咁欣然同偽米奇影相, 影完又同我、肥肥又影, 影曬之後就黎料啦, 上一秒可愛, 下一秒猙獰, 鬼鬼鼠鼠咁由件衫袋度show張pass出來, 寫住"影相位位廿蚊'...-_-"

太天真太傻...咁就俾偽米奇呃左廿蚊. 偽米奇呃左我地廿蚊後, 肯定去左嘆茶啦....我地先發現民工加菲、民工喜羊羊同污漕黃鴨久唔久會除低個卡通頭傾計.....肯定係度交換獵物情報啦....

回旅館時又經過剛出爐的雞蛋布甸, 熱辣辣好香濃, rmb5/個, 一人一個下淡氣吧~!

回到旅館拎埋行李就check out出發到鼓浪嶼, 其實在村口有巴士29號可以20分鐘直達輪渡碼頭, 不過見倒巴士上擠滿人上都上唔倒車既情況我地都係放棄, 截架的士廿蚊就到, 只係5分鐘.

去到輪渡碼頭, 遊人超多呢, 買了來回船票, 給你一個膠幣, 回程時要使用呢. 登船後如果上一樓要俾多1蚊, 船程得5分鐘, 轉眼就到.

大陸人有二代身份證可以不用購票, 好彩購票條龍唔算長, 好快買倒.

排隊先上船

下層船倉大部份是企位的, 這張相是回程是補影的, 去程時多人到好似繁忙時間搭地鐵咁

原本的鼓浪嶼碼頭好像在維修啊, 我地落船的碼頭轉左去三丘田碼頭, 下船後就打俾旅館的人接我地去旅館. 等候接待人員時, 留意到碼頭附近的人真多, 好比假日的西洋菜街, 有不少影婚紗的, 旅行團的, 人多到好像快要把小島陸沉一樣.....

小島上沒有任何交通工具, 只有用作遊覽用的電瓶車, 所以去邊都係靠步行. 由三丘田碼頭行去紅堂生活旅館要行20分鐘呀, 雖然旅館是位於島的中心位置, 但一路走都是暗斜,揹住大包細包的都幾吃力. 而且小島上的小路很多, 沒有明顯的路標, 就算拿著百度地圖都很容易迷路啊.

終於到達了(中途被肥肥無限次complain)~ 旅館的佈置是走工業風加少少懷舊風的, 好啱我的taste~而且就是位於島上較入的位置, 所以與大街上的遊人完全隔絕, 相反空氣十分好, 環境清幽.

這是旅館入口的樓梯

 我住的房間是205號房, rmb498/晚, 一分錢一分貨啊, 無論床、衛浴等等都合乎心意, 而且仲有佈置風格我都幾喜歡. 房內有一道窗, 望到旅館的內園景, 採光好, 景觀佳. 不過就是在地下, 久不久會有人在窗外走動, 私隱度低.

安頓好我地就出外吃午飯. 從旅館走往龍頭路約15分鐘, 半路途中經過"海角8號"旅館餐廳, Y小姐說想食薑母鴨, 我地就在這裡午餐了.

"海角8號"旅館餐廳的園子, 我估我地某程度是被園子吸引入去的.



薑母鴨 - 不便宜啊, 要rmb100/半隻, 膠小姐說這不是正宗的口味 

飯後膠小姐說要買咖啡

這是途中經過旅店 - 楊桃院子的花園, 好靚呀, 可惜這次遺憾沒有入住

經過橫街窄巷左穿右插, 我地突然由一條僻靜後街鑽進龍頭路, 好似去左大三巴咁, 人們熙來壤往, 熱鬧得不得了. 剛剛才食完飯, 忽然又好似有第二個胃去食街頭小吃咁.....

 超大枝炸蝦棒, 但好睇唔好食



一個好方便的設計, 下層是汽水, 上層是爆谷, 可以一手攞曬. 不過D爆谷淋曬, 難吃.

龍頭路商業街, 四周都是"趙小姐的茶和餡餅"店,看來這位"趙小姐"是鼓浪嶼的大紅人

這種牌子放在店子的門口任人拍照, 免費宣傳又OK喎

佈置得好靚既"香草舖子"

走得累了, 我們便在碼頭旁坐坐休息片刻, 這種人來人往的環境都唔係咁啱我地, 我地決定回到旅館的小清吧打打桌球, 飯杯cocktail.



在淘寶網或前台直接訂房的房客可以獲免費贈飲1杯雞尾酒啊....超濃的....

小清吧的環境很好, 有情調得來人客不多, 可以好好享受三五知己打桌球, 玩玩牌.....玩到八時多, 我地又出去晚餐了, 這天晚餐的地方是 - 那些年和家菜餐廳, 這間是食閔菜(褔建菜)的餐廳, 在大眾點評網都幾高分數架.

因為我地就坐在園子裡吃, 點起燭光, 所以食物拍得不清楚. 我地點了金牌雞、小黃魚、茶葉炸蝦、回鍋肉、福建炒飯，果然味道不錯啊, 全部都好好味.....價錢不便宜, 我地5人食左rmb 470. 果然島上就是消費高啦.

晚飯吃完, 肥肥又逛左去龍頭路買宵夜燒魷魚, 回到旅館看球賽. 這天行左好多路, 實在太累了...早就睡了.

窮遊世界 - 復活廈門 2014 Fighting之旅 - Day 1

出發日是復活節假期的第二天, 約好了其他朋友一起在旺角太子搭環島旅運的直通巴出
發, 我地買的是10點發車的班次. 原來不是用大巴直達, 而是到深圳灣後再轉細車的.

過關的關口是深圳灣, 對於我住屯門來說其實都幾轉折, 不過多人出遊最怕一個半個遲
到的, 所以約埋一齊出發都有好處, 幸好大家都是很準時的.

在深圳灣口岸其實都有一兩間兌換店同電話卡店, 可以順便買埋, 我覺得自己在香港
7-11買左一咭兩號電話卡其實蠢左….

過關後原來我地唔係搭番之前架大巴, 而是一架11人的面包車, 坐滿人就開車, 其實都
有D迫…..大約30-40分鐘左右就到達深圳北站了.

大約11:40我地就到左深圳北站, 比原先預計要2個半小時早得多, 而且我地架火車是
14:55發車, 有足足3小時的時間呆了….

不過大陸既野都係唔好咁老定, 因為我地在網上訂的火車票, 要經出票窗口人工憑回鄉
咭出票才可入閘.

人龍都幾長, 一排出票窗口只開了兩個櫃台…. 排隊…. 等…等…等

排隊中 - "借貸賺大錢  連鎖成富豪"是什麼口號呀??


估佢唔倒, 居然等左40分鐘 !! 經我地觀察, 幾乎每一個排隊人士都與售票員拉扯5分
鐘以上 ! 對話內容圍繞著有票、無票、有座、無座等等，對話中途又加插無數個打尖
的人….唉…..

終於輪到我地, 居然遇上阻濟! 原來我們其中1人Y小姐的登記姓名用了繁體字, 而回鄉咭上
的名字是簡體字, 售票員居然以這個理由不予出票!

面對這等事, 我地只好頓出 “Fighting” 的黑嘴臉 (背對多個想中途打尖的人), 但
只換來”入閘時再向工作人員查詢”這答案….

這是大陸文化, 各人只按自己的本子辦事, 他們的Flexibility=0.

(btw, Y小姐在廈門回程時再嘗試在廈門那邊的窗口出票, 好簡單就出倒, 所以真係想打柒個售票員)

取完票, 便入了車站內的”真功夫”食個蒸飯套餐, 不便宜啊, 一個套餐要RMB38,

食飽飽, 朋友買埋”周黑鴨”的鴨舌同鴨翅上車食, 之後再在大堂玩下遊戲消磨1小時,

發車前15分鐘開始檢票…. 有票的可從閘口插票入閘, 出唔倒票的朋友就在”人工入
口”找到”工作人員”, 那人只是輕輕望了一下就俾朋友入閘了! 異常簡單….

登上列車, 對號入座, 車箱很新淨, 每卡車都有廁所, 而大部份的乘客都算清潔, 不會
有隨地掉瓜子殼的情況.

站票的人不多, 一卡都是5-8個左右, 途中有售賣飲料小吃的, 一樽水才2蚊, 仲平過深
圳北站的便利店.

聽聽歌, 看看手機內的電影, 雖然最高速度只有206km, 但三小時的路程都算容易打發. 到左廈門北站, 出閘後就打俾早就預約好的面包車司機, 我地5個人坐架8人座的車, 寬敞又舒服. 40分鐘左右到達曾厝垵. 下車後感覺同一路過來的氣氛好唔同啊, 星期六的曾厝垵好有夜市feel, 一路行入旅館的路上驚喜源源不絕, 小路兩旁開滿夜市般的小吃店, 小酒吧, 精品店等, 好熱鬧啊!

到了旅館 - 垵垵的花園, 打算先放下行李再出去晚飯. 我訂的是家庭套房, 是位於三樓, 三樓有一個小徧廳, 右邊就是家庭套房, 內有兩間房, 一間是雙人床附小陽台, 另一間是榻床. 朋友Y小姐就睡榻床那邊, 怎料一開燈.....居然看見 有 蟑 螂  !!! 太嚇人了! 立即召喚旅館的人攪掂佢....看著他殺掉了三隻大中小蟑螂.....雖然立即放了滅虫芯片....但係都心有餘悸....

安頓了後, 便出去有名的"亞尖大排檔"晚餐, 大排檔格局, 我地5人就坐門口那張枱, 點了醬油水鮑魚、墨魚丸湯、銀魚抱蛋、海苔角、香蘭雞, 特別出色的是海苔角, 用紫菜包住肉末炸香, 好好味, 墨魚丸湯清清地幾有嚼口, 5人食左二百蚊左右.

前面是香蘭雞 (味道麻麻), 後面果碟海苔角才是亮點

醬油水鮑魚(rmb60)味道都可以, 但鮑魚size就細左d

食完飯雖然仲好鮑, 但都急不及待要周圍遊覽一下, 呢度愈夜愈精彩, D舖頭一般都開到十一點左右, 逛下小店又買下宵夜~

 "吃奶請搖鈴" 這間是一間賣酸奶、奶茶的店, 成廿蚊一杯奶茶, 貴左啲



"蠔不魷魚" 又玩食字, 食蒜蓉燒蠔等海鮮小炒

青芒果 - 可以用支付宝、全國包郵、可刷卡

海蠣煎, 即係蠔餅, 台灣人叫蚵仔煎

又一間"慢遞"店, 好多人鍾意寫明信片寄俾未來既自己

陳罐西 - 又係食字, 用普通話就是"陳冠希"

"張伯芝華仕清吧" - 呢個食字玩得很爛, 就好似高登仔改果D"一死以謝天華"一樣

估唔到呢到有個"台灣觀光夜市", 單看招牌真係以為去埋台灣, 但其實入面咩都無.

回到旅館, 差唔多十二點了, 買左少少宵夜, 我地就在旅館的小偏廳度食宵夜, 沖個涼就休息了. 這裡的廁所雖然唔係乾濕分離, 但都好乾淨, 而且熱水夠猛夠熱, 唔錯...

窮遊世界 - 復活廈門 2014 Fighting之旅 - 總篇

這次廈門之旅一心諗住襯復活節放假加上高鐵票都幾抵諗住平玩而速成的，其實早在兩三年前我已經想去鼓浪嶼, 聽說這裡很有"小資"感, 應該是那些文藝青年消磨時光的地方吧 ! 早知道這裡是要用慢調子去感受的地方, 所以這次的行程都沒有編排趕景點的行程.

查看廈門旅遊攻略, 廈門的景點中我只挑了兩個 - 曾厝垵和鼓浪嶼, 鼓浪嶼也沒有去任何景點, 只是看看海, 逛逛街. 而其他廈門景點我興趣不大, 像南普佗寺、廈門大學等, 總是覺得把大學當景點好怪.

1. 行程 (4D3N)

Day 1 : 旺角--> 深圳北站-->廈門北站-->曾厝垵

Day 2-3 : 鼓浪嶼

Day 4 : 鼓浪嶼-->廈門小眼鏡海鮮大排檔-->廈門北站-->深圳北-->香港

人數: 5人 (3人於第3天回程)

2. 火車票

深廈高鐵於2013年底開通, 雖然最高時速只有206km, 全程大約三個小時. 車內十分新淨又乾淨.

去程: 19/4 深圳北 (14:55) --> 廈門北 (18:42)

回程: 22/4 廈門北 (14:50)-->深圳北 (18:42)
價錢 : rmb 301/人 (二等座)



有關購買火車票詳情可參看 : 香港人購買深廈高鐵初體驗篇及搶票攻略

3. 有關交通
從香港前往深圳北站, 可購買環島旅運 (參看連結 )的直通巴車票. 香港各點都可出發, 出發時間視乎地區. HKD$80/人. 大約兩小時可到.
而其實如果你住新界區, 由深圳灣搭的士到北站約rmb 50, 半小時可到, 如果截到車的話其實更划算.
當然你也可以搭地鐵由羅湖或福田到深圳北站, 時間較長又要轉線. 背著大包細包挺麻煩的..

從廈門北站前往曾厝垵 : 乘的士大約rmb 120/車, 大陸的士只可載4人, 所以5人以上要分兩架車. 看攻略時聽聞廈門北站"黑的"不打標等情況都幾多, 所以我早在淘寶網上預約了司機, 8座位的商務面包車都幾舒服, 司機都算準時, rmb 190/單程, 5人或以上推薦使用. (參看淘寶網連結), 車程約40分鐘. (如果搭巴士要2小時....)

廈門市內搭的士, 要當心在旅遊景點前等客的的士, 本人親身中伏搭左"黑的". 所以如果你上左架的士而司機的駕駛証刻意遮蓋住的話, 千萬要當心, 最好不要乘坐.
幸好最後遇上好心的後生仔司機, 人很好又老實....有需要可留言索取手機號.

4. 有關住宿
曾厝垵住宿 - 垵垵的花園旅館 (大床房周未價 : rmb 210 ; 家庭套房周未價 : rmb 310)
於藝龍網預訂(www.elong.cn) , 藝龍網就像大陸版的booking.com, 預訂時只需用信用卡凍結信用額, 房費於到達時才於前台支付, 十分方便. 而且於入住1天前仍可取消房間(不收手續費), 加上有香港查詢電話 (普通話), 推介使用.
至於旅館方面硬件尚待改善. 要求不高可以入住.

鼓浪嶼住宿- 紅堂生活旅館 (205房大床房 : rmb 498, 303雙床房 rmb698 + rmb 80加1人)
鼓浪嶼上的住宿比廈門較貴, 這間是於淘宝網預訂的(因為旅館沒有把我想要的房型放到藝龍網), 個人認為205大床房的性價比較高, 很喜歡這間旅館, 推薦入住.

5. 有關鴨屎 (Apps) 及 旅游攻略
現在大陸旅行很方便啦, 只要裝幾個Apps就 "一機在手, 天下我有"
1. 螞蜂窩 (http://www.mafengwo.cn/)  - 有齊超詳盡旅游攻略, 圖文並茂, 資料多到你看不完.
2. 百度地圖 (http://map.baidu.com/) - 大陸版google map, 有手機版可下載 (不過好像play store裡沒有), 超強大的Apps, 有離線地圖可下載, 超級極力推薦使用.
3. 大眾點評網 (http://www.dianping.com) - 大陸版openrice, 想知附近有咩餐廳推介一目了然, 有需要仲可以即時團購.
4. QQ - 大陸人人都有QQ, 開番個QQ可以方便和旅館聯絡
5. 擔心在大陸上唔倒facebook無得即時分享? 以前翻牆好麻煩又要付費又要搭來搭去, 依家手機裝個Apps就得! 自已search keywords "VPN" 有多個翻牆工具下載使用.

6. 總使費(4D3N) = rmb 2096/人

美甲分享 - 春日小蛋黃

5天長假期開始了，一抹淡黃為長假期掀開序幕，主題是春天的小蛋黃，用漸變淡黃營造春日感覺。

香港人購買深廈高鐵初體驗篇及搶票攻略

啱啱先去完泰國，又被人撩起復活節假期旅行，呢個港人其中一個最旺旅行檔期，出國的話機票貴到飛起....想平玩的話，火車遊大陸確是好選擇。

回想起當年我都會在復活節平遊大陸, 廣西、丹霞山等等，上年啱啱開通左深廈高鐵，搭高鐵由深圳到廈門只係三個多小時，火車票二等座都係Rmb 150, 來回三舊水，機票最平都千幾人仔，絶對是復活平玩的好選擇!

相信同我一樣諗法的人實在太多，復活節期間高鐵票簡直係一票難求. 以下是一些小資料, 方便一下有興趣購買的人:

香港人如何購買深廈高鐵票 :
1) 直接於大陸火車站窗口排隊 (不建議) - 親身購買火車票，最早可預售18日的車票. 如果你不是住在大陸，可能要分兩日上去買(因為往返不同日子啊). 而且內地買火車票依家要實名認證，即係你要提供埋同行親友的回鄉証上去買，十分麻煩。 而且網上購票比直接購票早2天開售，假設大家都係share同一個票源(未經查證)，咁好可能一早已經比人搶曬票。

2) 於中旅社代出票 (不建議) - 中旅社同樣有代購大陸火車票，可直接出票，不過同樣最早可預售18日的車票，假設大家都係share同一個票源(未經查證)，咁好可能一早已經比網上的人搶曬票。

3) 於 中國客戶鐵路服務中心網站 - www.12306.cn 網上購買 ( 無奈地建議) - 這是內地鐵路局官方網站, 最早可預售20日的車票 , 接受港人購買, 但一次只可買4張, 只可用內地信用卡或支付宝付款. (此網站是非常多人會在開售時搶票，即使你坐定定在電腦前買票，也是一票難求，大陸有人專門研究各種搶票軟件，日新月異)

4) 於內地旅行社代購 - search淘寶網會搵倒一些代購高鐵票的旅行社, 他們除了安排代購高鐵票, 亦有辦法買到中轉票，即可能轉一次車，總車程比直達多半小時左右, 聽起來的確是買不到票時的2nd choice. 不過他們會針對港人收rmb 50元的手續費, 如購買他們自由行套票就可免手續費. 本人未親身試過, 大陸黃牛票假票情況屢見不鮮, 請自行衡量.

上述方法各有利弊，遇上客運高峰期(復活節) 都係要第一日開售時立即搶票, 先買去程, 過兩日再買回程, 所以是豁出去的決定啊 !!!  我選擇了在- www.12306.cn 網上購買，以下是一些網上購票小貼士 :

1) 先註冊帳戶，並向同行親友先索取回鄉証姓名及號碼，把他們的名字及回鄉証號碼先加入到 "常用聯絡人"內。同一日最多可買4張票，如有超過4名親友，就要開多個account. (留意 : 如回鄉証的名字是用簡體字，必須於登記時用簡體字啊! )

2) 付款方式 - 如果你有大陸信用卡/中銀信用卡 (不確定是否要內地發行的) 可以使用，另外有支付宝也可使用，所以要預先充值支付宝 (建議先以一等座等票價充值, 購買時可靈活使用).本人使用vvcity充值支付宝 (http://www.vvcity.com/)

3) 到左開售當日，深廈高鐵係上午11點開始發售20天後的車票，如果要購買復活節車票，就要11點坐正在電腦前準備啦 !善用"自動查詢"功能及"更多選項"功能可以更快搶到票。"自動查詢" 可以5秒自動刷新一次，"更多選項" 可以自動送出訂票內容及指定時間車次，更快搶票



善用"自動查詢"功能及"更多選項"功能

3) 開售時搶不到票嗎? . 因為同一時間在搶票的人很多, 有時即使餘票顯示還有票，當你按進去時已經被人搶走了. 但不用灰心. 因為預訂左票之後有45分鐘時間你去完成付款，45分鐘內不付款，票便會再free出來. 所以不同時間都有些人之前hold左票又free番出來的, 可以等一下再碰碰運氣.。 (親身經驗 : 我由早上11點等到下午4點才"浮" D 飛出來"

全部票都賣光的情況

4)如果真都咁不幸，都係搶唔倒票，如果唔介意車程一半時間要企，可以試下買到中途站的票。例如原先要買由廈門-->深圳的票，但理想時間賣光，可以試下search廈門-->潮汕的票，因為"潮汕"站其實係廈門-->深圳的中途站，只要你有辦法登上果班車,，根據高鐵條例在火車可以乘載倒的情況下係唔可以趕你落車既，所以你只要一上車20分鐘內向乘務員進行補票及交手續費就可以繼續坐到終點站. 咁當然啦, 去到潮汕站如果有人憑票要坐你個位你就要站起來了.

5) 最溫馨的提示 : 最好都係唔好在客運高峰期去廈門啦，好似今次我都係請多一日假才回來，時間又好又可以坐足全程, 不然只剩下10am就要回程的車票了.

而且最好兩三個人同行係比較易買飛.

祝大家旅途愉快 !

延伸閱讀 - 窮遊世界 - 復活廈門 2014 Fighting之旅
窮遊世界 - 復活廈門 2014 Fighting之旅 - 總篇
窮遊世界 - 復活廈門 2014 Fighting之旅 - Day 1
窮遊世界 - 復活廈門 2014 Fighting之旅 - Day 3-4

清明齊踏青 - 沒有紅葉的大棠

成個星期都落大雨，只有今天星期六就天朗氣清。唔想浪費左咁好既天氣，決定去郊外踏青去! 肥肥提議去大棠, 我諗住唔係紅葉季, 應該無咁多人, 動身就出發!

本身諗住二人一狗輕身走我路, 入油時肥肥又想叫埋佢屋企人....好啦, 都係問下姐, 點知佢阿媽一聽就想去, 又叫我地渣架車入建新邨飲茶之後一齊去....恐怖塞車一小時就開始了....

都唔明佢地一家點解要入到建新咁遠飲茶，我懷疑佢父母想食勻全港茶樓。入到建新, 因為鄰近青松觀, D人拜完先人就去飲茶食野, 所有停車場、街位、標位全部full, 幾個停車場前都有十幾架車等入....根本無可能泊倒車, 經歷恐怖塞車一小時我地決定放棄落車，轉去元朗飲地痞茶!

這間位於元朗廣場後面的 東方(勝記)飯店, 就是飲地痞茶的地方，基本款式的點心都有，就在路邊搭幾張枱的大排檔風味格局. 我同肥肥都係點心控，人地老人家嘆茶一盅兩件點到即止，但次次我同肥肥都係點到成枱都係點心先夠皮!

 

 



點了五款點 : 心蝦餃、燒賣、鳳抓、雞扎、牛肉，味道一般，埋單$92。價錢不比茶樓平很多，但看著一籠籠的點心山推出來，吃的是風味。

在朗屏站接埋肥肥一家 (他們自己飲完茶搭西鐵過來喇....), 出發到大棠去 ! 渣車十幾分鐘就到達大棠燒烤場，遊人不少，私家車都幾乎泊滿車道....

這裡可以眺望元朗十八鄉的景色，居高臨下，景色開揚. 燒烤場在大草坪上，有人燒烤，有人玩風爭，享受家庭樂~ 我地就四處走走，欣賞下風景~ 空氣都格外清新~

 

 

這裡亦是大棠自然教育徑的入口，全程行三小時，我們就隨便行了15分鐘，吸收下樹木的芬多精~

 

就在郊野公園hea下又過到了4點，聞說附近有有大棠荔枝山莊，有小動物看，便駕車前往，距離郊野公園大約5分鐘車程, 便到了大棠荔枝山莊的入口.

入口處除左個公廁係免費之外，入去參觀下都要收$30/人的入場費. 俾$80可以玩埋騎馬仔，餵錦鯉，坐牛車等....我堅決不付錢，揪身離去.

我決定抵制呢個荔枝山莊的原因如下:
1. 呢個山莊之前已經有欺凌隔離 "流浪牛之家" 的新聞, 如今眼見一隻牛在拉一架載滿5-6個大人的牛車， 於心不忍.
2. 呢間野個負責人 - 十八鄉主席 梁 X 元 (看他身上掛著"齊心"襟章，可知其背景) 起呢個山莊原來係霸佔官地，家陣佢霸佔官地仲要收我地入場費?? 我係唔會屈服俾佢. 加上收銀處D職員黑口黑面, 真係令人火滾.

詳見昔日新聞 : 荔枝山莊咆哮 連環陣阻清拆  <-- BTW,  D村民使用"三桶屎尿夾雜的疑似有機肥料擺出屎尿陣迎戰 不時有村民用木棍翻撈肥料，看得旁人心寒" 是亮點.





帶著傲骨揪身而去，肥家姐提議去錦田鄉村俱樂部玩，果邊同樣有士多啤梨摘，有小動物，有燒烤場，重點係唔收入場費. 都幾好呀, 襯天色未黑，趕快渣車出發去!

錦田鄉村俱樂部位於錦田水尾村，距離大棠約十幾分鐘車程，都幾入架，但估唔到有咁多人去，熱鬧得很 ! 但呢個俱樂部佔地很大，所以唔覺得迫人喎，又有大草地、有機農田、兔仔樂園、燒烤場、仲有兒童彈床、兒童電單車等，好適合一家大細郊遊玩樂. (最緊要係唔使入場費，所有野按使用收費，豐儉由人)

這是什麼卡通人物 ? 四腳叮噹 ?

 

 

行下hea下又到六點，我地決定去 大榮華酒樓 吃晚飯，早去唔使等位，佢個餐牌好似加左價 (!?) 全部小菜要 $80 !! 什至是一客8件的馬拉糕 !!!!! $80/份馬拉糕......吃不起了.....

 

 

圍村五味雞 - 雞滑、入味

 

陳皮豆豉蝦 - 陳皮炒得幾香，但蝦細隻左D

鳳凰蟹肉炒長遠 - 即係雞蛋蟹肉炒粉絲，被個咁有霸氣既名呃左，其實平平無奇.

 

 

食飽飯今天行程結束，踏青之行表現滿意，雙腿累了，心靈卻大滿足。