半職人妻

2013年10月14日星期一

窮遊沙巴 Day 3

Day 3 : 10:00 Jesselton Point搭船到 Mamutik島浮潛 --> Manukan 島lunch and swim --> 酒店休息-->大茄來海鮮-->菲律賓夜市

這天起床看到太陽伯伯, 真係開心. 所以就搭第一班shuttle bus 10:00去Jesselton Point出外島, 提早左出外島的時間, 所以今日決定玩兩個島 : Manutik 及Manukan 島. 今次都係幫襯Burneo Ferry, 但今次就等都唔使等, 俾左錢(RM120, HKD$291)立即上快船出島.

出發喇!

去到Manutik島, 再俾上島費(RM20, HKD$48.6). 食個早餐先, 一杯美綠及漢堡包, 味道一般啦. 飽飽後就落水了, 但這裡的水很多石, 都算多野睇, 水亦比Sapi相對清些(但仍與蘇梅有很大距離). 玩到1點我地就搭船到Manukan島了.

Manukan島是三島中面積最大, 有些較休閒的餐廳及酒店, 我地選了間較舒適的餐廳食lunch, 聽著音樂對住大海, 點了兩份咖喱雞飯, total大約RM 60(HKD$145.8). 順帶一提, 這裡的服務真係好慢, 得果三枱客, 等到頸都長, 催一催下侍應, 原來一早做好了, 只是侍應沒有留意 !? OMG....

食完飯在沙灘上攤陣再落水, 但呢個島浮潛就無野睇, 只係適合游水, 但浪很大, 呢個島反而無咩遊人. 4點要回去了, 在碼頭等pick up船, 個碼頭好平靜, 好舒服.

回到Jesselton Point, 買左兩條牛油果味及榴槤味的雪條, 真係好美味啊!

搭的士回酒店休息, 居然因為塞車要RM20 (HKD$48.6)!? 回到酒店想預約shuttle bus 出番去食晚餐, 居然fully book!! 唉又要使多RM15搭的士出去食飯!!! 愈諗愈覺得揀呢間酒店真係大錯特錯!!! >.<

今晚晚餐決定到大茄來食海鮮, 我地大約7點鐘到, 已經坐無虛席, 不過都幸運地找到一張吉枱. 所有枱都集中在魚缸果邊叫海鮮, 好不容易才找到一名侍應幫我地落單, 呢度揀海鮮就無即場秤重俾我地睇, 但價錢就比華興抵食, 尤其是肉蟹, 大肉蟹(約1kg /2隻) 只是RM60 (HKD$145.8)又係食全海鮮宴, 今次點了四款海鮮一碟菜, 比昨天還要加多一碟, 如下:

超級多人落柯打, 要捉實D侍應

薑蔥煮象拔蚌

咸魚炒芥蘭仔 (原來這是沙巴菜, 起初以為佢俾錯左生菜我地)

超鮮甜沙白蜆湯

濕奶油游水虎蝦仔, 有8-10隻架

正正正, 咸蛋炒大肉蟹! 兩大隻!!

成枱都係海鮮呀~~~好滿足!

埋單了, 這一餐居然比昨天仲抵, 只係RM158! (HKD$383.9) 好抵食啊!! 之後我地再戰菲律賓夜市, 呢度除左賣小吃之外, 其實仲係街市咁, 有D魚呀菜呀賣的. 亮點當然係燒烤小食啦! 雖然好飽, 但仍然買少少小吃回酒店當宵夜吧!

又有呢D燒烤檔, 今次仲有燒粟米

有好多擺曬O係度既燒魚, 買左一條燒泥猛(RM20, HKS$48.6), 點知返去食落覺得臭, 即刻唔敢再食.

呢D冰飲又係似乎由早放到晚, 估計含菌量超高, 唔敢試.

幫襯左呢位貌似Mario的叔叔點了一份炒麵, RM7 (HKD$17)

回到酒店食埋昨天食剩的榴槤 (勁大陣味), 訓覺ZZZZZ.

窮遊沙巴 - Day 1-2

Day 1 : 19:50 (香港) --> 22:45 (亞庇) -->到酒店訓覺ZZZZ

Day 1 我地大約6點到達機場, 一早已經做好網上check in及print埋登機証, 可以唔使排隊check in 直接入登機閘慳番D時間, 所以特登到T2食米芝蓮一星的"阿鴻小吃"做晚餐, 他們的滷水真的好好味, 特別香. 滷水鵝片太貴了, 所以點了滷水鴨舌及豆腐.

怎料食下食下食到六點二十分, 飛奔到登機口, 原來班機提早左20分鐘!! 個死人登機口仲要係果D衛星閘口, 要再坐接駁車先去倒, 坐車果時已經final call, 地勤仲打電話來說全架機都上曬得番我地兩個>.<, 好緊張呀落車即刻衝衝衝, 好彩俾我地上倒飛機, 眾乘客則回報一個想殺人的眼神吧........

飛行時間3小時左右, 無飛機餐時間都好易過, 睇左三集半澤直樹就到沙巴. 到埗已經11點幾了, 搭10分鐘的士就到酒店(RM30, HKD$72.9). 果然酒店附近係咩都無得食, 餓住真係訓唔著, 所以同肥肥叫左個馬拉炒飯 (RM19, HKD$46.17), 點知等左半個鐘先到, 來到簽單只係 (RM10.45? HKD$25.39)? 無啦啦優惠左?

Day 2 : Wisma Merdeka唱錢及買電話卡 -->富源食咖央多-->Jesselton Point搭船到Sapi島-->佑記食肉骨茶-->酒店休息-->華興海鮮樓晚餐-->附近買小食及榴槤-->到酒店訓覺ZZZZ

第二天搭10點的shuttle bus到Wisma Merdeka商場, 網上說這裡唱錢最抵, 有好多間兌換店, 稍為找了兩三間對較下, 果然相差幾大, 最後兌了1RM=HKD$2.43, 同我在香港兌一樣. 而電話卡就好抵玩, 連100MB上網只係RM15(HKD$36.45), 又要插卡又要註冊, 全部由店員搞掂.

Wisma Merdeka商場

之後去富源食早餐, 試了拉茶、牛油咖央多、花生醬咖央多、半熟蛋. 咖央甜甜地幾好味, 配埋半熟食, 不過食得好"呢hea". 拉茶的味道似台式珍珠奶茶, 我覺得港式奶茶好味D. 至於其他中式點心, 熟食(腸仔, 魚旦)就麻麻地.

富源茶室

拉茶

半熟蛋沾多士

食完之後慢慢步行10分鐘左右到Jesselton Point碼頭到Sapi島浮潛, 我地選了5號的Burneo Ferry, 2人連租用mask&life jacket約RM110(HKD$267.3). 其實間間價錢一樣, 但我地11:45俾左錢之後, 等到12:30先有船......-_-"

我們用的是5號, 不過其實間間都一樣價錢

搭10分鐘快船就到了Sapi島, 好多人啊!! 仲要俾上島費RM20/2人 (HKD$48.6) 感覺有點似西貢外島咁......沒有locker, 我們就把物品放在沙灘, 貴重野就放防水袋隨身攜帶. 開始浮潛喇......水底都幾多小魚, 但水都幾混濁, 感覺麻麻, 同蘇梅布吉無得比>.<

襯好天氣拍了一張

由香港帶來的水泡

玩左差唔多1小時, 突然救生員叫曬D人上岸, 原來有storm黎緊!!! 全個島幾十人被迫埋在一百呎的小涼亭內, 好辛苦好狼狽>.< 大雨下了半小時左右, 無咩人再落水, 但因為我地約的pick up time係4點, 就要呆等到4點先有船回去, 好無mood啊.....>.<

暴風雨過後的Sapi

回到KK市, 我地去左佑記肉骨茶, 舊式店舖內人聲鼎沸, 幸運地找到一張枱坐下, 點了豬腸, 排骨, 肉丸, 豬手, 豬肝, 全部都超好味!! 我尤其喜愛肉丸, 豬腸, 豬肝!! 終於可以一掃今天的bad mood. (大約RM45, HKD$109)

成枱人就在終極開蒜頭, 開到成枱都係

豬腸(賣飛佛)、排骨、豬手

肉丸(賣飛佛)、豬肝(賣飛佛)

之後再到Wisma Merdeka等shuttle bus回酒店, 等車時仲食左杯榴槤綿綿冰, 超好味啊!!! 濃郁綿綿冰再加榴槤肉, 馬來西亞榴槤果然非同凡響!! 正!!

回酒店沖個涼休息下之後, 就再搭shuttle bus到Sedco Square食海鮮, 這裡有多間海鮮店,以双天海鮮樓及華興海鮮樓最受遊客歡迎, 我地就食左"華興".

Sedco Square

D海鮮都是在魚缸裡挑選的, 我地選的都是活的, 選了就放在籃內即場秤重量計錢. 不知道那個籃有幾重, 但感覺都不算十分便宜. 我食左三款海鮮一碟菜, 如下:

濕奶油煮國寶大虎蝦1隻(開邊食)--> 濕奶油是馬拉煮法, 好似白汁咁, 咸咸甜甜, 好味!

白胡椒炒膏蟹--> 白胡椒炒得非常惹味! Yummy!

清蒸魚

桔仔冰, 馬來西亞特飲

馬拉盞炒通菜

呢一餐兩人共吃了RM200 (HKD$486), 感覺價錢一般, 未至於我想像中咁抵食. 食完之後又落雨, 咁啱餐廳旁就泊了一輪貨van賣榴槤, 嘻嘻, 買了一盒貓山皇Mausan King做飯後果回酒店吃, RM35 (HKD$85), 內有四件, 果然係AA級, 口感淋滑, 入口香濃, 好好味!

原本想去菲律賓夜市再買點宵夜, 可是行到半路突然橫風橫雨, 唯有放棄, 只到餐廳附近的小吃檔買了燒雞翼回去, 十分便宜, 燒雞全翼只是RM1.5/隻 (HKD$3.6). 沒有肚痛.

搭的士 (RM15, HKD$36.45) 回酒店, 其實很近, 只是5分鐘而已. 吃過宵夜訓覺ZZZZZ.

2013年10月13日星期日

窮遊世界 - 沙巴之旅總篇

久未執筆，實情係無咩好寫，生活悶得令我質疑人生存的意義，今年半份bonus沒有發放，旅行的budget都大大削減，今次去沙巴純粹是因為見倒平套票，又是"空氣亞洲"的優惠:

去程: 8/10 19:50 (香港) --> 22:45 (亞庇)
回程: 12/10 6:30 (亞庇) --> 9:20 (香港)
住宿: Ming Garden Hotel (4stars)
價錢 : $1890/人 (已保所有附加費)

二千蚊唔使包機票酒店，真係好吸引，當係打個白鴿轉都好，於是我同肥肥就立即扑搥，但其實都計得好盡 :

1. 晚機去, 超早機返, 實玩三日兩夜.不過買果時已經預左，所以無咩所謂. 飛機無飛機餐及無寄倉行李, 以前我搭Airasia都會好傻豬豬咁加錢買寄倉行李同揀位, 不過今次我決定死都唔加, 全handcarry行李兼分開坐, 貫徹窮撚的作風

2. Ming Garden 酒店so called "4星級", 其實勁多大陸人, 同大陸酒店差唔多. 不過算啦, 都係在房間訓覺姐, 張床同間房都幾舒服既. 起初貪佢近機場方便到踄及回程, 但今次真係蠢左, 應該住入KK市, 因為成個KK市都係20分鐘車程內, 而我地間酒店勁隔涉, 周圍連7仔士多都無間, 出入只可靠酒店shuttle bus (1小時1班, 最後一班7點), 所以好多時都要搭的士出入. 的士一D都唔平, 市內不論遠近都要RM15 (約HKD$36.5), 所以條數都幾襟計.

3. 沙巴亞庇市比我想像中差好遠, 我以為好似布吉咁, relax及國際化, 但實情係有少少似大陸的鄉下, 或者係澳門, 好生活化, 放工時間仲會塞車添! 一D都唔relax lor -_-"
而D外島又唔靚, 要靚果D除非去搭45分鐘船的美人魚島啦, 不過我去三日落左兩日雨, 去美人魚島要RM290 (HKD$704.7)/人, 唔抵lor >.<

上述都係彈多過讚, 不過沙巴的海鮮真係為呢個地方挽回不少分數, 烹調方法以廣東口味做base, 再加馬拉特色, 真係好好味! 比香港食的更加合口味!! 正!

以下係5D4N (實3D2N)的行程:
Day 1 : 19:50 (香港) --> 22:45 (亞庇) -->到酒店訓覺ZZZZ
Day 2 : Wisma Merdeka唱錢及買電話卡 -->富源食咖央多-->Jesselton Point搭船到Sapi島-->佑記食肉骨茶-->酒店休息-->華興海鮮樓晚餐-->附近買小食及榴槤-->到酒店訓覺ZZZZ
Day 3 : 10:00 Jesselton Point搭船到 Mamutik島浮潛 --> Manukan 島lunch and swim --> 酒店休息-->大茄來海鮮-->菲律賓夜市
Day 4: 酒店早餐--> 舊街場飲白咖啡 --> 怡豐茶室食喇沙 --> Warisan Square 按摩 --> 買手信--> waterfront 看日落 -->大茄來海鮮-->到酒店訓覺ZZZZ
Day 5 : 6:30 (亞庇) --> 9:20 (香港)

總使費: 機票+酒店: $1890/人 , 在地消費 $4200/2人, 總使費 $4000/人.

2013年6月10日星期一

我的私密後花園

上星期五下午休半天，放工後一個人去左萬豚屋食石燒烏冬，縱使三十幾度的氣溫，這碗熱到辣咀的石燒烏冬仍是我的至愛，最多加杯凍奶茶降降溫!

肥肥很有誠意地到尖咀接我，原先諗住返屯門唱K，但望見咁好天氣又唔捨得唔同陽光玩遊戲，索性直接把車駕到我們的私密後花園 - 龍鼓灘。

龍鼓灘距離屯門市中心約20分鐘車程，位於新界西面盡頭，由於來往巴士極之稀少，加上路段中途都是無人之境(例如水泥廠、內河碼頭)，一般住屯門的居民都甚少前往，何況區外人呢! 這正正造就了與世隔絕的私密後花園，足以避開遊人如鯽的屯門市中心。

龍鼓灘無咩玩，就是對正海邊有一個BBQ場，一個不能游水的泥灘。我同肥肥通常都會幫襯BBQ場，貪佢有一排海邊位，對正海岸線，強勁的海風和樹蔭，即使三十幾度烈日當空都唔覺得熱。我地去到果時只有一個麻甩佬一個人渣架benz來燒野食，我地係全場第二枱客，不久之後個麻甩佬都走埋，得我同肥肥包場。

價錢$100/人任坐任食，食物方面普普通通，次次來這BBQ場都播著劉華的歌，令我99%相信店主一定係華仔天地的死硬粉絲。我同肥肥三點幾一路慢慢燒慢慢坐到6點幾，多左D人專登來影日落。無錯，呢度既日落我懷疑係全香港最靚既，不過咁啱今日有舊雲，如果唔係個咸蛋黃一定仲靚!

(好似去左外國咁~是instagram效果)

同肥肥一路坐到9點才走，坐左差唔多6個鐘，好似叉左電咁，二十分鐘車程便返到屋企。唔敢介紹俾朋友，一來太遠根本無人會入來，二來不是個個都懂得享受呆坐的時光。

開始左煮飯帶飯的日子有個多月，除了自己的飯盒還有肥肥的愛心便當，咁樣先最慳倒錢。肥肥說他的女同事讚他有一個好勁的老婆，我自己都認同，唔係因為煮飯俾老公係好勁，而係勁在六七點放工仲去買餸再搭差唔多成個鐘車返屯門再煮一個鐘頭飯差唔多九點幾先開飯，加埋高溫三十幾度對住個火爐d汗多到醃眼，我維持倒個幾月連我自已都意想不到。

都唔知自己可以維持倒幾耐，我知我可能只係因為生活無寄托，好不容易終於向同事們公佈了我把生育計劃押後兩年，其實我係迫不得已，唔想個個成日問住幾時輪到我之類的話，亦受夠了每個月幻得幻失的壓力，我希望兩年之後，天上的寶寶會願意選我成為他的母親......

P.S. 這是為剛生產的同事特登做的賀咭，我把同事的相片和她BB的相片剪出來貼在立體BB車上，我覺得自己還蠻有心思的。

2013年6月5日星期三

愛心home made早餐

最近像發現新大陸般玩Instagram, 原來有很多影得好有style的相片發表在instagram內, 有少少似pinterest, 攪到我好想模仿裡面d人post 食物的照片影相.....hehe

因為今日9點半先返元朗，可以遲一個鐘出門口，所以得閒煮下愛心早餐。而且前幾日在城市超級買了日清強力粉，聽聞做麵包好正，呢個粉一出就好快俾人一掃而空(759都長期缺貨)，所以咁啱見倒就即刻入手。今次我用左日清孖寶 - 日清強力粉 & 日清酵母，睇下日本仔D野係咪真係咁正先!